تاياۋ شىعىس ەلدەرىنىڭ ا ق ش- تىڭ سيرياعا اسكەري سوققىسىنا كوزقاراسى قانداي
وسىعان وراي قازاقپارات ءتىلشىسى تاياۋ شىعىس ەلدەرىنىڭ بۇل شابۋىلعا قاتىستى پىكىرلەرىن زەردەلەپ كورگەن بولاتىن.
ايتا كەتەرلىگى، بۇگىن ا ق ش پرەزيدەنتى دونالد ترامپ ۆاشينگتوننىڭ سيرياعا قارسى تاياۋداعى اسكەري ءىس- قيمىلىنا بايلانىستى ساۋد ارابياسىنىڭ كورولى سالمان بەن ابدەل ازيز ال ساۋدقا قوڭىراۋ شالدى. تەلەفونمەن سۇحباتتاسۋ بارىسىندا ت. ترامپ ساۋد ارابياسى كورولىنە 59 جوعارى دالدىكتى باسقارىلاتىن زىمىران ۇشىرعاندىعىن جانە ولار سيرياداعى شايرات اەرودرومىنا ءدال تيگەندىگىن ايتتى. باتىس ساراپشىلارىنىڭ پايىمىنشا، اتالعان اسكەري نىساننان 4 -ءساۋىر كۇنى سيريانىڭ ۇكىمەتتىك اسكەري حيميالىق قارۋدى پايدالانىپ شابۋىل جاساعان.
مىسىر پرەزيدەنتى ا. ال سيسي اعىمداعى جىلدىڭ ناۋرىزىندا د. ترامپ اكىمشىلىگى اق ۇيگە رەسمي ساپارمەن كەلۋگە شاقىرتۋ العان ءبىرىنشى اراب كوشباسشىسى بولىپ وتىر. امەريكالىق اۋە سوققىسىنان كەيىن مىسىر ا ق ش پەن رەسەيگە «جانجالدى توقتاتىپ»، سيريالىق داعدارىستى تۇبەگەيلى شەشۋگە قول جەتكىزۋگە شاقىردى.
ا ق ش- تىڭ اسكەري ارەكەتىن باحرەين دە قولداپ وتىر. بۇل ەلدىڭ سىرتقى ىستەر ءمينيسترى «مۇنداي قادام زورلىق- زومبىلىقتى جانە جاپپاي قىرىپ- جويۋ قارۋىن تاراتۋدى توقتاتۋ ءۇشىن قاجەت» ەكەندىگىن مالىمدەدى.
يران باسشىلىعى بولسا ا ق ش- تىڭ بۇل ارەكەتىنە نارازىلىق ءبىلدىرىپ، سيريانىڭ اسكەري نىسانىنا جاسالعان سوققىنى «دەسترۋكتيۆتى ءارى قاۋىپتى» دەپ باعالادى. «ءبىز بارلىق ءبىرجاقتى اسكەري ءىس- قيمىلداردى جانە ا ق ش اسكەري كەمەلەرىنەن جاسالعان زىمىران سوققىسىن ايىپتايمىز»، - دەدى يران س ءى م- نىڭ رەسمي وكىلى باگرام حاسسەمي.
جالپى، بۇگىندە سيريالىق تەكەتىرەستە رەسمي داماسكىنىڭ ەڭ جاقىن سەرىكتەسى تەھران مەن ماسكەۋ بولىپ وتىرعانى بەلگىلى. ال يزرايل پرەمەر- ءمينيسترى بەنيامين نەتانياحۋ ءوز كەزەگىندە رەسمي تەل-اۆيۆتىڭ ا ق ش ارەكەتىن تولىقتاي قولدايتىندىعىن، «مۇنداي شارالار تەك سيريانىڭ عانا ەمەس سونىمەن بىرگە يران جانە ك ح د ر- دىڭ باسشىلىعنا دا اسەر ەتۋى تيىستىگىن» باسا ايتقان.
ايتا كەتەيىك، بۇگىن قازاقستان سىرتقى ىستەر مينيسترلىگى سيرياداعى شيەلەنىستىڭ ءورشي تۇسۋىنە بايلانىستى ءوزىنىڭ الاڭداۋشىلىعىن ءبىلدىردى. سونىمەن قاتار قاقتىعىستىڭ ودان ءارى ءورشۋى جانە تاراپتار ۇستانىمدارىنىڭ قاتاڭدانۋى حالىقارالىق قوعامداستىقتىڭ تەرروريستىك قاۋىپكە قارسى كۇرەس بويىنشا بۇرىن قول جەتكىزگەن بارلىق، ونىڭ ىشىندە جەنەۆا جانە استانا پروتسەستەرى شەڭبەرىندەگى ۋاعدالاستىقتارىنا قاۋىپ توندىرەتىندىگىن جانە سيريا جەرىندە بارلىعىن قامتيتىن بەيبىتشىلىك پەن كەلىسىمگە جەتۋ پەرسپەكتيۆاسىن الىستاتاتىندىعىن اتاپ وتكەن ەدى.
اۆتور: مارلان جيەمباي
