تۇركى الەمىنىڭ «كۇلكى جارمەڭكەسى» حالىقارالىق فەستيۆالى ءوتتى - فوتو

شىمكەنت. قازاقپارات - تۇركىستاندا «تۇركىستان - تۇركى الەمىنىڭ مادەني استاناسى» جىلى اياسىندا تۇركى الەمىنىڭ «كۇلكى جارمەڭكەسى» حالىقارالىق فەستيۆالى ءوتتى.

تۇركىتىلدەس مەملەكەتتەر اراسىنداعى سايىسقا تۇركيا، ازەربايجان، قىرعىزستان، وزبەكستان، قاراقالپاقستان، قىتاي حالىق رەسپۋبليكالارىنىڭ ساتيرا ساڭلاقتارى مەن وڭتۇستىك قازاقستان وبلىسىنىڭ ءازىل- سىقاق جانە ساتيرا تەاترى، «شانشار»، «شىمكەنت- شوۋ»، «الداراسپان»، «نىسانا» سىندى ونەر ۇجىمدارى قاتىستى.

رەسپۋبليكاعا تانىمال جازۋشى- سىقاقشى مۇحتار شەرىم دە ارنايى كەلىپ، ازىلمەن ارلەنگەن ونەر تارتۋىن ارنادى، دەپ حابارلايدى قازاقپارات ح ا ا ءتىلشىسى. باۋىرلاس ازىلكەشتەر باسقوسۋىن تۇركىستان قالاسىنىڭ اكىمى الىپبەك وسەربايەۆ پەن و ق و مادەنيەت باسقارماسىنىڭ ءبولىم باسشىسى عاليا شارافيەۆا قۇتتىقتاۋ سوزبەن اشىپ بەردى. تۇركىتىلدەس ۇلتتار اراسىنداعى باۋىرلاستىق بايلانىستار مەن دوستىقتى نىعايتۋدى، تۇركىلىك مادەنيەت پەن ونەردى ۇرپاقتان ۇرپاققا جەتكىزۋدى، سونداي- اق ساتيرا سالاسىنداعى ونەر شەبەرلەرىنىڭ ءبىر- بىرىمەن قارىم- قاتىناسىن دامىتا وتىرىپ تاجىريبە الماستىرۋ ماقساتىندا ۇيىمداستىرىلعان شارا ەكى كۇنگە سوزىلدى.

قىزۋ ءارى تارتىستى وتكەن ءازىلقويلار مەن تاپقىرلار سايىسىندا ءار ۇجىم حالىقتى كۇلكىگە قارق قىلدى. كورەرمەن قاۋىمىن شات كۇلكىگە بولەگەن قالجىڭ دوداسىندا قاعىتپا ءسوز ارقىلى قاتىسۋشىلار تولعاقتى تۇيىندەرگە دە توقتالدى. ەلدەگى تىنىشتىق پەن بەيبىتشىلىكتى، قوعامداعى قايشىلىقتار مەن كەلەڭسىزدىكتەردى استارلاپ ازىلمەن جەتكىزدى.

ءازىل كەشىنىڭ سوڭىندا سوڭىندا جەڭىمپازدار انىقتالىپ، "شانشار" ءازىل- سىقاق تەاترىنىڭ ديرەكتورى ۋاليبەك ءابدىرايىموۆ فەستيۆالگە قاتىسقان 11 تەاتر ۇجىمىنا وبلىس اكىمدىگى اتىنان ارنايى العىس حات پەن 350000 تەڭگە قارجىلاي سىيلىقتاردى تاپسىردى.

سونىمەن قاتار، ساتيرا سالاسىنىڭ اعا بۋىنى، جازۋشى- ىسقاقشى مۇحتار شەرىمگە وبلىستىق مادەنيەت باسقارماسى اتىنان شاپان جابىلىپ، تۇركىستان قالاسى اكىمدىگىنىڭ دە ارنايى سىي- سياپاتتارى تابىستالدى. فەستيۆال سوڭىندا وبلىستىق ساتيرا تەاترىنىڭ ازىلكەشتەرى تۇركسوي ۇيىمى باسىن قوسقان تۇركى ەلدەرى اراسىنداعى دوستىق پەن ىنتىماقتاستىق اندەرىن ورىندادى. ەسكە سالايىق، ەلىمىزدە "كۇلكى جارمەڭكەسى" فەستيۆالىنىڭ تاريحي 1986 -جىلدان باستاۋ السا، كۇنى بۇگىنگە دەيىن شارا اياسىندا «شانشار»، «شىمكەنت- شوۋ»، «الداراسپان» سىندى كوپتەگەن ەلگە تانىمال تەاترلارىنىڭ تۇساۋى كەسىلگەن.

بۇل جولعى شارانىڭ قۇرىلتايشىسى - قازاقستان رەسپۋبليكاسىنىڭ مادەنيەت جانە سپورت مينيسترلىگى. ۇيىمداستىرۋشىسى - تۇركسوي حالىقارالىق ۇيىمى، و ق و اكىمدىگى جانە وبلىستىق مادەنيەت باسقارماسى بولدى.

اۆتور: اينۇر اقبايەۆا