قازاق ءتىلدى ۇستازدار ورىس ءتىلىن بىلۋدەن سايىستى

قىزىلوردا. قازاقپارات -  قىزىلوردادا قازاق ءتىلدى ۇستازدار ورىس ءتىلىن بىلۋدەن ءوزارا سايىسقا ءتۇستى، دەپ حابارلايدى قازاقپارات ح ا ا ءتىلشىسى.

قازالى اۋدانى اكىمدىگىنەن ءمالىم ەتكەندەي، «وي - سانا» اتتى ورىس ءتىلى بىلگىرلەرىنىڭ اۋداندىق بايقاۋىن مادەنيەت جانە تىلدەردى دامىتۋ ءبولىمى مەن ءبىلىم ءبولىمى ۇيىمداستىرعان. سايىسقا 10 عا جۋىق تالاپكەر قاتىستى. ولار ءبىرىنشى كەزەڭدە ورىس ءتىلىنىڭ لەكسيكاسى مەن گرامماتيكاسىن بىلۋگە ارنالعان تەست تاپسىرمالارىن ورىندادى.

ەكىنشى كەزەڭنىڭ جازباشا بولىگىندە بەرىلگەن تاقىرىپتا ەسسە جازسا، ۆيكتورينالىق بولىگىندە ورىس ءتىلى مەن ادەبيەتىنە، وسى حالىقتىڭ مادەنيەتى مەن سالت- داستۇرىنە ارنالعان سۇراقتارعا جازباشا جاۋاپ بەردى. ال ءۇشىنشى كەزەڭدە كەز كەلگەن جانرداعى ءماتىندى مانەرلەپ وقۋدان سىنعا ءتۇستى. ارنايى قۇرىلعان قازىلار القاسىنىڭ قۇرامىندا اۋداندىق ءبىلىم ءبولىمىنىڭ ادىسكەرى ۇلان قاليەۆ، №249 -مەكتەپ- ليتسەيدىڭ ورىس ءتىلى ءپانىنىڭ مۇعالىمى شامشىراق جاراسوۆا، اۋداندىق مادەنيەت جانە تىلدەردى دامىتۋ ءبولىمىنىڭ جەتەكشى مامانى رايسا تاسىبايەۆا بولدى.

ناتيجەسىندە ءبىرىنشى ورىندى №249 -مەكتەپ- ليتسەيدىڭ مۇعالىمى ەلۆيرا قوجاحمەتوۆا جەڭىپ السا، جۇلدەلى ەكىنشى ورىندى №258 -مەكتەپتىڭ مۇعالىمى ساندىگۇل جالعاسباي، ءۇشىنشى ورىندى №70 -مەكتەپتىڭ مۇعالىمى نازگۇل ساعىندىقوۆا يەلەندى. جەڭىمپازدار ارنايى ديپلومدارمەن جانە باعالى سىيلىقتارمەن ماراپاتتالدى.

اۆتور: ەلۋباي اۋەزوۆ