پروكۋرورلار جۇمىس ۋاقىتىندا «كوڭىل كوتەرمەيتىن» بولدى - فوتو

شىمكەنت. قازاقپارات - پروكۋراتۋرا قىزمەتكەرلەرىنە تۋعان كۇنگە سىيلىق بەرۋ مەن شىعىنى كوپ شارالاردى وتكىزۋگە تىيىم سالىندى.

سونداي-اق جۇمىس بابىمەن كەلگەن باسشىنى نەمەسە تەكسەرۋشىنى كۇتىپ الىپ، داستارحان جايعاندار دا جۇمىستارىمەن قوش ايتىسادى. ەلىمىزدىڭ باس پروكۋراتۋراسى قابىلداعان جاڭا باعدارلامانى شىمكەنتتە وبلىس پروكۋرورى يبراھيم يمانوۆ تانىستىردى، دەپ حابارلايدى قازاقپارات ح ا ا ءتىلشىسى.

قاداعالاۋشى ورگان وكىلدەرىنىڭ جۇمىسىن جۇيەلەۋگە باعىتتالعان «حالىققا ارنالعان پروكۋراتۋرا» جوباسىمەن تانىسۋعا وبلىستىق ءماسليحاتتىڭ دەپۋتاتتارى مەن قاداعالاۋشى ورگان قىزمەتكەرلەرىنىڭ وتباسى مۇشەلەرى قاتىستى. جۋىردا قابىلدانعان قۇجاتقا سايكەس، ەندى جاڭادان قىزمەتكە تاعايىندالعان باسشى بىردەن ءوز كومانداسىن جاساقتاي المايدى. بۇرىنعى قىزمەتكەرلەردى 6 اي مەرزىمگە دەيىن ورنىنان اۋىستىرۋعا قۇقىعى جوق. پروكۋرورعا سىي- سياپات كورسەتۋدىڭ ءوزى زاڭسىزدىق بولىپ ەسەپتەلەدى.

ۇجىم ىشىندە توي تويلاپ، شىعىن شىعارۋعا دا تىيىم سالىندى. ونىڭ ورنىنا قوعام ءۇشىن قالتقىسىز جۇمىس ىستەۋ مىندەتتەلگەن. «پروكۋراتۋرا ورگاندارىندا ءاربىر تاعايىنداۋلار مەن جۇمىستان بوساتۋدىڭ زاڭدىلىعى جان- جاقتى تەكسەرىلەتىن بولادى. ءادىلسىز، سوراقى فاكتىلەر تابىلسا - بۇيرىقتىڭ كۇشى جويىلىپ باسشىسى جاۋاپقا تارتىلادى. سونداي-اق ۇجىمنان اقشا جيناۋعا دا تىيىم سالىنادى. ياعني، توگىپ-شاشىپ داستارحان جايۋدى، جيىن جاساۋدى قويۋ كەرەك. ۇجىم قىزمەتكەرلەرىن بىرىكتىرۋدىڭ باسقا دا تاسىلدەرى بار. ماسەلەن، ۇجىمدىق رۋحتى سپورتپەن شىنىقتىرۋ كەرەك. بۇدان بولەك، باسشى نەمەسە تەكسەرۋشى كەلسە، ولاردى كۇتىپ الۋ، شىعارىپ سالۋ، سول ءۇشىن اقشا جيناۋعا رۇقسات جوق.

پروكۋرورلارعا كەلگەن ادامعا قوناق ءۇي نەمەسە پاتەر جالداپ، ەسەبىن تولەۋ، ولاردى اپتالاپ، ايلاپ تاماقتاندىرۋ، ءتىلىن تابۋدى تىيۋ تالاپ ەتىلەدى. ەگەر ىشكى قاۋىپسىزدىك قىزمەتى وسىنداي كەلەڭسىزدىكتى انىقتاسا، كەلگەن ادام دا، كۇتۋشىلەر دە جۇمىستان ايىرىلادى»، - دەدى جاڭا باعدارلامانى تۇسىندىرگەن ي. يمانوۆ.

وبلىس پروكۋرورىنىڭ سوزىنشە، قاداعالاۋشى ورگان قىزمەتكەرلەرىن گازەت، جۋرنالدارعا ءماجبۇرلى تۇردە جازدىرۋعا دا جول بەرىلمەيدى. سەبەبى، مۇنداي باسىلىمداردىڭ ءبىر جىلدىق جازىلۋ باعاسى 10 مىڭ تەڭگەدەن اسىپ كەتكەن. بۇل قاراپايىم پروكۋروردىڭ قالتاسىنا اجەپتاۋىر سالماق بولارى انىق. يبراھيم يمانوۆ سونىمەن قاتار پروكۋرورلارعا قاداعالاۋداعى وزگە ورگانداردان نەمەسە بيزنەسمەندەردەن قاعاز سۇراۋدى دوعارىپ، باس پروكۋرور وبلىستاردى كەڭسە تاۋارلارىمەن قاجەتتى مولشەردە قامتاماسىز ەتۋدى تاپسىرعانىن اتاپ ءوتتى.

«پروكۋراتۋرا قىزمەتكەرلەرى اراسىندا كەرەك ەمەس كەزەكشىلىكتى الىپ تاستاۋ تاپسىرىلدى. بۇعان دەيىن قىزمەتكەرلەر جۇمىس ورنىندا تۇنەپ جۇرگەن. كەزەكشىلىككە سەنبى، جەكسەنبى كۇندەرى دە شىعاتىن ەدى. قازىر اقپاراتتاندىرۋدىڭ ناقتى الگوريتمى جازىلۋدا. وعان تەلەفوندار مەن پوشتا جۇيەسىن پايدالانۋ تاپسىرىلدى. سونىمەن قاتار، ايماقتاردا ساعات 18:00 دەن كەيىن جانە دەمالىس كۇندەرى جينالىس وتكىزۋگە تىيىم سالىندى. باسشىلار جۇمىس كۇنىن تياناقتى جوسپارلاۋدى ۇيرەنۋى قاجەت. باسشىلارعا قىزمەتكەرلەرگە قامقور بولۋ تاپسىرىلدى. ناقتى سەبەپ بولسا عانا جۇمىستا قالدىرۋ تاپسىرىلدى. جۇمىس سوعان بەرىلگەن ۋاقىتتا ىستەلۋى قاجەت. سودان كەيىن قىزمەتكەرلەرگە وتباسىلارىنا نەمەسە سپورتزالعا بارۋىنا جاعداي جاسالاتىن بولادى. جاقىندارىن قۋانتسىن، بالالارعا كوڭىل ءبولسىن، ۇيلەنبەگەندەر وتباسىن قۇرسىن»، - دەدى وبلىس پروكۋرورى.

جاڭا باعدارلاما جاڭا مىندەتتەر جۇكتەيدى. ەندى وبلىستىڭ پروكۋراتۋرا قىزمەتكەرلەرى وسى باعدارلاماعا ساي جۇمىس ىستەۋدى جوسپارلاپ وتىر. بۇل ءوز كەزەگىندە قاداعالاۋشى ورگان جۇمىسىن جانداندىرۋعا نەگىز بولماق. ءارى جۇمىسىنا ءجۇردىم- باردىم قارايتىن مامانداردىڭ قىسقارتۋعا ىلىگۋى دە عاجاپ ەمەس.

«اتالعان 10 قادام - بارلىعى وتە جاعىمدى. بۇل ءوز كەزەگىندە پروكۋراتۋرانىڭ تازا بولۋىنا شاقىرادى. سونداي-اق، باسقا ورگاندار دا وسى پروكۋراتۋرادان ۇلگى السىن دەپ جاسالعان جۇمىس دەپ بىلەمىن»، - دەيدى بۇرىنعى پروكۋرور، قازىرگى وبلىستىق ءماسليحاتتىڭ حاتشىسى قايرات بالابيەۆ.

اۆتور: اينۇر اقبايەۆا