اۋەجايلار مەن ۆوكزالدارداعى نامازحانالار قايتا اشىلۋى مۇمكىن
بۇل جايىندا بۇگىن ق ر ءدىن ىستەرى جانە ازاماتتىق قوعام مينيسترلىگىنىڭ جۇمىس ناتيجەسىنە ارنالعان قوعامدىق كەڭەس وتىرىسىندا مينيستر نۇرلان ەرمەكبايەۆ ءمالىم ەتتى، دەپ حابارلايدى قازاقپارات.
«ءبىزدىڭ جۇمىسىمىزداعى ماڭىزدى ەلەمەنت بۇل ءدىني بىرلەستىكتەرمەن ىنتىماقتاستىقتىڭ كەڭ فورماتى جانە اشىق سۇحباتتاستىق. مينيسترلىك جانىندا ءدىن ماسەلەلەرى جونىندەگى ساراپشىلار كەڭەسى مەن ءدىني باسشىلار، كوشباسشىلارى جينالىسى جۇمىس ىستەيدى. جىل سايىن ءدىنتانۋشىلاردىڭ فورۋمى ءوتىپ تۇرادى. 12 كونفەسسيانىڭ وكىلدەرى، قۇقىق قورعاۋشىلار مەن ساراپشىلار اتالعان سۇحبات الاڭىنىڭ تۇراقتى قاتىسۋشىسى بولىپ وتىر. ءبىز ءدىني ساياسات ادىستەرىن بىرلەسىپ دايىنداپ، وزەكتى ماسەلەلەردى تالقىلايمىز»، - دەدى ول.
ونىڭ ايتۋىنشا، اتالعان الاڭدا مينيسترلىك ازىرلەپ جاتقان ءدىن سالاسىنداعى جاڭا زاڭ جوباسىنىڭ تۇجىرىمداماسى جان- جاقتى تالقىعا تۇسكەن.
«ساراپشىلار قوعامداستىعىمەن ىنتىماقتاستىق بارىسىندا مەملەكەتتىك ۇيىمدارعا تاقاۋ ناماز وقۋ بولمەلەرىنىڭ ورنالاسۋىنا شەكتەۋ قويۋدى جويۋ بويىنشا نۇسقاۋلىق ەنگىزىلدى. بۇعان دەيىن مۇنداي بولمەلەردى 300 مەتردەن جاقىن ورنالاستىرۋعا بولمايتىن ەدى. قازىرگى سايكەسىنشە بۇيرىق دايىن بولىپ قالدى. تاياۋ ۋاقىتتا ول شىعادى دەپ كۇتىپ وتىرمىز جانە مۇنداي شەكتەۋلەر ازىرشە ءدىني وقۋ ورنىنان بولەك ءبىلىم وردالارى ءۇشىن عانا قالادى. سونىمەن قاتار جاڭا نۇسقاۋلىق تەمىر جول ۆوكزالدارىندا، اۆتوۆوكزالداردا، اۋەجايلار مەن تەڭىز پروتتارىندا ناماز بولمەلەرىن اشۋعا تىيىمدى الىپ تاستايدى. ءدىني ادەبيەتتەردى ساتۋعا ارنالعان ارنايى ورىندار وقۋ مەكەمەسى توڭىرەگىنەن 300 مەتردەن الىس كەز كەلگەن جەردە ورنالاسا الادى»، - دەدى نۇرلان ەرمەكبايەۆ.
اۆتور: مارلان جيەمباي
