ماڭعىستاۋ ۇنىن قىتايدا ساتۋدى جوسپارلاۋدا

اقتاۋ. قازاقپارات - ماڭعىستاۋ بەينەۋ استىق تەرمينالىنىڭ ۇنىن قىتايعا ەكسپورتتاۋدى جوسپارلاۋدا.

بۇل تۋرالى ماڭعىستاۋ وبلىسىنىڭ اكىمى ەرالى توعجانوۆ جۇمىس ساپارىمەن بەينەۋ اۋدانىنا بارعان كەزدە بەلگىلى بولدى، دەپ حابارلادى «قازاقپارات» ح ا ا ءتىلشىسى.

بەينەۋ استىق تەرمينالى 2010-جىلى پايدالانۋعا بەرىلگەن. 16 گەكتار الاڭعا استىقتى قايتا وڭدەيتىن، قۇراما جەم وندىرەتىن اۆتوماتتاندىرىلعان سەح، ەليەۆاتور ورنالاسقان. تەرمينالدىڭ جۇك اينالىمى جىلىنا 2 ميلليون توننانى قۇرايدى. جىل سايىن 40 مىڭ توننا ۇن، 11 مىڭ توننا قۇراما جەم وندىرىلەدى. نىساندا بەينەۋ اۋدانىنىڭ 146 تۇرعىنى جۇمىس ىستەيدى. دايىن ءونىم ماڭعىستاۋ، اتىراۋ وبلىستارىنا جەتكىزىلىپ، اۋعانستان، تاجىكستان، وزبەكستان، يرانعا ەكسپورتتالادى.

«كۇزدە استىق ارزاندايدى. سوندىقتان ەليەۆاتوردى تولتىرۋ ءۇشىن ناق وسى كەزەڭدە ءبيدايدى كوبىرەك ساتۋ مۇمكىندىگىن قاراستىرۋ قاجەت. بۇدان باسقا، وبلىس اكىمىنىڭ ورىنباسارى رايىمبەك ءامىرجانوۆقا اقتاۋ يندۋستريالدىق ايماق اۋدانىندا جەرگىلىكتى تاۋار وندىرۋشىلەر ءۇشىن وراما دايىنداۋ سەحىن اشۋ ماسەلەسىن پىسىقتاۋدى تاپسىرامىن. وسى جەردە اشۋعا بولاتىن بولسا، ونى نەگە باسقا وڭىردەن ساتىپ الامىز؟ سونداي-اق بەينەۋ تەرمينالىنىڭ ۇنىن قىتايعا ەكسپورتتاۋدى رەتتەۋدى تاپسىرامىن. ولارعا جەتكىزۋ گەوگرافياسىن كەڭەيتۋگە جاردەمدەسۋ قاجەت»، - دەپ اتاپ ءوتتى ماڭعىستاۋ وبلىسىنىڭ اكىمى ەرالى تۇعجانوۆ.

ءوڭىر باسشىسى بەينەۋ اۋىلىنداعى سۋ تازالايتىن قۇرىلعىنى قاراپ شىقتى. نىسان 2016- جىلعى جەلتوقساندا پايدالانۋعا بەرىلگەن. «اقبۇلاق» مەملەكەتتىك باعدارلاماسىنا ەنگىزىلگەن جوبانىڭ قۇنى 2 ميلليارد تەڭگەدەن اسادى. 45 مىڭ تەكشە مەتر سۋ ءۇشىن بەس رەزەرۆۋار بار. جابدىقتاردىڭ 65 پايىزى قازاقستاندا ساتىپ الىنعان، قالعانى گەرمانيا مەن وڭتۇستىك كورەيادان الىندى.