قازاقستاننىڭ قارۋلى كۇشتەرىندە اۋقىمدى تەكسەرۋ وتۋدە - فوتو
اتالمىش تەكسەرۋ قىسقى وقىتۋ كەزەڭىنىڭ قورىتىندىسى بويىنشا بولىمشەلەردىڭ جاۋىنگەرلىك ازىرلىگى مەن جاۋىنگەرلىك قابىلەتتىلىگىنىڭ دەڭگەيىن باعالاۋ ءۇشىن بارلىق اسكەري بولىمدەر مەن تۇرلەر، اسكەر تەكتەرى قۇرامالارىندا جانە وڭىرلىك قولباسشىلىقتاردا وتكىزىلەدى، دەپ حابارلايدى ق ر ق م باسپا ءسوز قىزمەتى.
نەگىزگى ماقساتى جەكە قۇرامنىڭ ماشىعىن، ۆزۆود، روتا، قۇرامالار مەن بولىمدەردىڭ باتالوندارى باسقارمالارىنىڭ جاۋىنگەرلىك دايارلىعىنىڭ شىنايى دەڭگەيىن، بولىمشەلەردىڭ قويىلعان جاۋىنگەرلىك تاپسىرمالاردى قىسقا مەرزىمدە ورىنداۋعا ازىرلىكتەرىن جان-جاقتى تەكسەرۋ، سونداي-اق، وقۋ-جاۋىنگەرلىك تاپسىرمالاردى پىسىقتاۋ بارىسىندا بولىمشەلەر مەن ولاردىڭ باسقارۋ ورگاندارىنىڭ جاۋىنگەرلىك دايارلىعى مەن ۇيلەسىمدىلىگى، جاۋىنگەرلىك دايارلىق جوسپارلارى مەن باعدارلامالارىن ورىنداۋ دەڭگەيىنە باعا بەرۋ بولىپ تابىلادى.
ق ر ق ك باس شتابىمەن ارنايى كەشەندى كوميسسيا قۇرىلدى. اتالعان كوميسسيا ەلىمىزدىڭ بارلىق وڭىرلەرىنە جىبەرىلدى. باقىلاۋ تەكسەرىسى ەكى كەزەكتە وتكىزىلەدى. تەكسەرۋگە باتالونداردىڭ (ديۆيزيونداردىڭ) بارلىق باسقارمالارى، ۆزۆودتار، روتالار (باتارەيالار) جانە جاۋىنگەرلىك وق اتۋلار مەن تاكتيكالىق وقۋ-جاتتىعۋلاردى وتكىزە وتىرىپ، شتاتتىق جاۋىنگەرلىك تەحنيكاسى بار ولارعا تەڭەستىرىلگەندەر تارتىلدى.
ۆزۆودتار مەن روتالار جاۋىنگەرلىك وق اتۋلار (ۆ ج ا)، روتالىق تاكتيكالىق جانە جاۋىنگەرلىك وق اتۋلارى بار ارنايى وقۋ-جاتتىعۋلار بارىسىندا تەكسەرىلەدى. تەكسەرىلەتىن پاندەردىڭ قاتارىندا وق اتۋ، تاكتيكالىق، ارنايى دايىندىق، ۇرىس ماشينالارىن جۇرگىزۋ، اسكەري توپوگرافيا، ينجەنەرلىك، دەنە جانە ساپتىق دايارلىق بار. سونىمەن قاتار، كوميسسيا قارۋ-جاراق پەن اسكەري تەحنيكانىڭ جاي-كۇيىن، باعىنىستى قۇرامالاردا جاۋىنگەرلىك دايارلىقتى باسشىلىققا الۋ جونىندەگى لاۋازىمدى ادامداردىڭ جۇمىسىنىڭ ۇيىمداستىرىلۋ جۇيەسىن، جاۋىنگەرلىك جانە جۇمىلدىرۋ ازىرلىگىن تەكسەرەدى.
ءاربىر اسكەري قىزمەتشىگە جەكە دارا تارتىپتە جانە بولىمشەلەر قۇرامىندا تەوريا جۇزىندە عانا ەمەس، سونىمەن بىرگە، ءىس جۇزىندە ەمتيحان تاپسىرۋعا تۋرا كەلەدى. وقىتۋ پاندەرى بويىنشا باقىلاۋ ساباقتارى بولىمدەردىڭ ۇدايى ورنالاسۋ پۋنكتتەرىندە جانە وقۋ-جاتتىعۋ ورتالىقتارى مەن پوليگونداردا وتۋدە.
العاشقى كۇننىڭ قورىتىندىسى بويىنشا جوعارى ناتيجەلەر كورسەتىپ كەلە جاتقان ءبىرقاتار اسكەري قىزمەتشىلەر جاقسى جاعىنان اتاپ ءوتىلدى. ولاردىڭ قاتارىندا 10810 اسكەري ءبولىمىنىڭ تانكتى باتالون كومانديرى پودپولكوۆنيك ەربول اۋباكىروۆ، ونىڭ بولىمشەسى وق اتۋ دايارلىعىندا ۇزدىك ناتيجەلەر كورسەتتى. پراكتيكالىق وق اتۋلاردا 32039 اسكەري ءبولىمى 1-موتواتقىش روتاسىنىڭ 2-موتواتقىش ۆزۆودى مەن 91678 اسكەري ءبولىمى تاۋلى-ەگەرلىك روتاسىنىڭ كومانديرلەرى لەيتەنانت دارحان بەكەمباي مەن ۇلان كاپيتانى جومارت ابدۋلايەۆ ۇزدىكتەردىڭ اراسىنان توپ جاردى.
