قازاقستان دۇنيەجۇزىلىك تاۋ-كەن جينالىسىن وتكىزۋگە دايىندالۋدا
وندا قازاقستان رەسپۋبليكاسى ينۆەستيتسيالار جانە دامۋ مينيسترلىگى يندۋستريالدى دامۋ جانە ونەركاسىپتىك قاۋىپسىزدىك كوميتەتى ءتوراعاسىنىڭ ورىنباسارى، دۇنيەجۇزىلىك تاۋ-كەن كونگرەسى حالىقارالىق ۇيىمداستىرۋ كوميتەتىنىڭ مۇشەسى قانات بايتوۆ «Astana Mining مەن Metallurgy» كونگرەسى بازاسىندا 2018 -جىلدىڭ 19-22 -ماۋسىمىندا استانادا وتەتىن 25- دۇنيەجۇزىلىك تاۋ- كەن كونگرەسىنە (د ت ك) دايىندىق جونىندە ەسەپ بەردى.
بۇگىنگى كۇنى ۇلتتىق ۇيىمداستىرۋ كوميتەتى (ۇ ۇ ك) قۇرىلىپ، ول ءساتتى جۇمىس ىستەۋدە. ۇۇك قۇرمەتتى ءتوراعاسى - قازاقستان رەسپۋبليكاسىنىڭ پرەمەر- ءمينيسترى. قۇرامىنا ۇلتتىق كومپانيالار، سالالىق قاۋىمداستىقتار، عىلىمي ينستيتۋتتار مەن بيزنەس كوشباسشىلار ەنگەن ۇۇك وتىرىستارى قر ينۆەستيتسيالار جانە دامۋ مينيسترلىگىنىڭ بازاسىندا وتەدى. شارانىڭ وپەراتورى رەتىندە Iteca كورمە كومپانياسى بەكىتىلدى.
بۇل كومپانيا 20 جىلدان استام ۋاقىت قازاقستان بويىنشا ءىرى حالىقارالىق كونفەرەنتسيالار مەن كورمەلەردى وتكىزىپ كەلەدى. ۆەناداعى وتىرىستا ءتۇرلى تاقىرىپتاردى جانە تاۋ-كەن مەتاللۋرگيالىق كەشەنىنىڭ بارلىق تىزبەگىن قامتيتىن د ت ك-نى وتكىزۋدىڭ كەڭەيتىلگەن باعدارلاماسى تانىستىرىلدى. وندا گەولوگيالىق بارلاۋ مەن وندىرۋدەن باستاپ، بايىتۋعا دەيىنگى، باعالاۋ تاۋەكەلدەرىنەن باستاپ حالىقارالىق قارجىلاندىرۋدى تارتۋعا دەيىنگى تاقىرىپتار قامتىلادى. باعدارلامادا ونەركاسىپتىڭ بارلىق بازالىق سالالارىن جاڭعىرتۋعا، يندۋستريا 4.0 باعدارلاراماسىنىڭ ەلەمەنتتەرىن ەنگىزۋگە جانە الەمدىك تاۋ-كەن مەتاللۋرگيالىق كەشەنىندە ونى ۇزدىك تاجىريبەمەن قولدانۋ ماسەلەلەرىنە ايرىقشا باسىمدىق بەرىلدى.
الدا بولاتىن كونگرەستە تاۋ-كەن مەتاللۋرگيا سالاسىن ينۆەستيتسيالاۋ ماسەلەلەرىنە نازار اۋدارۋ جوسپارلانۋدا. دايىندىق بارىسىندا Mines مەن Money (ەۋروپاداعى تاۋ- كەن ءوندىرۋ ونەركاسىبىن ينۆەستيسيالاۋ جونىندەگى ءىرى كونفەرەنسيا) كونفەرەنسياسىمەن كەلىسسوزدەر جۇرگىزىلدى جانە 2018 -جىلى د ت ك بازاسىندا ينۆەستيتسيالىق كونفەرەنسيا وتكىزۋ تۋرالى كەلىسىم تالقىلانۋدا.
بۇل كەلىسىم جۇزەگە اسسا، بولاشاقتا قازاقستانعا 300 دەن استام ينۆەستور تارتۋعا مۇمكىندىك بەرەدى. بۇدان بولەك، كونگرەستى وتكىزۋ باعدارلاماسى تارتىمدىلىقتى ارتتىرۋعا جانە قارجىلىق- ينۆەستيتسيالىق توپتاردىڭ كوپتەپ قاتىسۋىن قامتاماسىز ەتۋگە باعىتتالىپ، ازىرلەندى.
بۇل جەردە جەر قويناۋى تۋرالى كودەكستىڭ قابىلدانۋى جانە «استانا» حالىقارالىق قارجى ورتالىعىنىڭ بولاشاقتاعى قىزمەتى وتە ماڭىزدى.
ەسكە سالا كەتەيىك، 2016 -جىلدىڭ 21 -قازانىندا ريو- دە- جانەيرودا وتكەن دۇنيەجۇزىلىك تاۋ- كەن كونگرەسى اياسىندا كونگرەستىڭ ءداستۇرلى سيمۆولى «ماي شامدى» تاپسىرۋ سالتاناتى ءوتىپ، د ت ك وتكىزۋ قۇقىعى ەستافەتاسى قازاقستان رەسپۋبليكاسىنا بەرىلگەن بولاتىن.
«قازاقستان ءۇشىن تاۋ- كەن مەتاللۋرگيا كەشەنى ەل ەكونوميكاسىنىڭ ماڭىزدى سالالارىنىڭ ءبىرى بولىپ تابىلادى. جالپى ونەركاسىپ ءوندىرىسى قۇرىلىمىندا ت م ك %18 قۇرايدى. سوندىقتان، 2018 -جىلى دۇنيەجۇزىلىك تاۋ- كەن كونگرەسىن استانادا وتكىزۋ ءبىز ءۇشىن ۇلكەن وقيعا بولماق. بۇل شارا ەلىمىزدىڭ بارلىق سەكتورىنا جاعىمدى اسەر بەرەتىنى ءسوزسىز. بۇگىنگى دەيىن جيناعان تاجىريبەمىز بەن بىلىمىمىزگە سۇيەنە وتىرىپ، 2018 -جىلى دتك- ءىن جوعارى حالىقارالىق دەڭگەيدە وتكىزەتىنىمىزگە سەنىمدىمىن»، - دەپ اتاپ ءوتتى قانات بايتوۆ. سونداي-اق، قانات بايتوۆ: «دۇنيەجۇزىلىك تاۋ-كەن كونگرەسىنىڭ قۇندىلىعى ونىڭ زەرتتەۋگە جانە سالانىڭ ءىرى كومپانيالارى قىزىعۋشىلىق تانىتىپ وتىرعان سوڭعى زەرتتەمەلەرگە عىلىمي ينستيتۋتتار كوپتەپ تارتىلاتىنىندا»، - دەپ اتاپ ءوتتى.
ونىڭ ايتۋىنشا، قازىرگى ۋاقىتتا حالىقارالىق كوممەرتسيالىق جانە ينۆەستيتسيالىق ۇيىمدار تاراپىنان كونگرەسكە قاتىسۋعا قىزىعۋشىلىق جوعارى. جانە ولاردىڭ قارجىلىق قولداۋى اۋقىمدى شارانى جوعارى دەڭگەيدە ۇيىمداستىرۋعا مۇمكىندىك بەرەدى.
