قازاقستاندا جۇرگىزۋشى كۋالىگىنىڭ مەرزىمى وتكەندە قايتا ەمتيحان تاپسىرۋ جويىلماق

استانا. قازاقپارات - قازاقستاندا جۇرگىزۋشى كۋالىگىنىڭ مەرزىمى وتكەن جاعدايدا قايتا ەمتيحان تاپسىرۋ جويىلادى. بۇل تۋرالى بۇگىن قر پارلامەنتى ماجىلىسىندە «جول قوزعالىسى تۋرالى» ق ر زاڭىنا وزگەرىستەر ەنگىزۋ تۋرالى» زاڭ جوباسىن تالقىلاۋ بارىسىندا دەپۋتات قانات مۋسين ءمالىم ەتتى، دەپ حابارلايدى قازاقپارات.

ونىڭ اتاپ وتۋىنشە، باستاپقىدا ءماجىلىس دەپۋتاتتارى اتالعان زاڭعا ەنگىزىلۋى ءتيىستى 120 دان استام تۇزەتۋدى قاراستىرعان. ناتيجەسىندە ونىڭ 55 ءى قالىپ وتىر.

«ويتكەنى، تۇزەتۋلەردىڭ ءبىرازىن دەپۋتاتتاردىڭ وزدەرى كەرى قايتارىپ الدى. جۇمىس توبىنىڭ تالقىلاۋى بارىسىندا دا تۇزەتۋلەردىڭ ءبىرقاتارى قابىلدانعان جوق» ، - دەدى قانات مۋسين.

 دەپۋتاتتىڭ ايتۋىنشا، زاڭدا جول ءجۇرىسى ەرەجەسىن بۇزعانى ءۇشىن اكىمشىلىك ايىپپۇلداردى ازايتۋ، قۇجاتتاردى تەكسەرۋ بارىسىندا كولىك جۇرگىزۋشىگە فوتو جانە بەينەتۇسىرىلىم جاساۋعا رۇقسات بەرۋ، كۇندىزگى ۋاقىتتا ەلدى مەكەندەر ىشىندە جۇرگەن كەزدە كولىكتىڭ جاقىن جارىعىن قوسۋ مىندەتىن الىپ تاستاۋ، ىشكى ىستەر ورگاندارىنىڭ قىزمەتكەرلەرى توقتاتقان جاعدايدا ونىڭ رۇقساتىنسىز جولاۋشىلاردىڭ كولىكتەن شىعۋعا تىيىمدى الىپ تاستاۋ، جۇرگىزۋشى كۋالىگىنىڭ جارامدىلىق مەرزىمى ءوتىپ كەتكەن جاعدايدا قايتا ەمتيحان تاپسىرۋ تالابىن الىپ تاستاۋ كوزدەلگەن.

 

اۆتور: مارلان جيەمباي