قاراعاندىدا ەلەكتر باعاناسىنا بايلانعان ءتورت جاسار قىز قايىر سۇراعان

قاراعاندى. قازاقپارات - قاراعاندىدا ەلەكتر جارىعىنىڭ باعاناسىنا بايلانعان ءتورت جاسار قىز قايىر سۇراعان، دەپ جازدى «قازاقپارات» ح ا ا ءتىلشىسى.

الەۋمەتتىك جەلىدەن ونىڭ فوتوسۋرەتىن كورگەن پوليتسەيلەر جەدەل تاپتى. «قاراعاندى ءى ءى ب يۋۆەنالدى پوليتسيا قىزمەتكەرلەرى «شىعىس»، «التىن اربا»، «سامال» جانە ەكى ساۋدا ۇيىنە رەيد جۇرگىزدى. رەيدتىك شارا كەزىندە كامەلەتتىك جاسقا تولماعان، جول بويىندا قايىر سۇراپ جۇرگەن ءتورت بالا تابىلدى. بالالار ورتالىق پوليتسيا بولىمىنە جەتكىزىلدى. ولاردىڭ ەڭ ۇلكەنى 11 جاستا بولسا، وزگەلەرى 6 جانە 4 جاسار قىزدار مەن 5 جاسار ۇل»، - دەدى قاراعاندى وبلىسى ءى ءى د باسپا ءسوز قىزمەتىنىڭ جەتەكشىسى باقىتجان قۇدياروۆ.

«ءمان-جايدى انىقتاعاندا، قىزداردىڭ ۇلكەنى 4 -ءساۋىر كۇنى بازار ماڭىندا قايىر سۇراعاندارىن، انالارى سۋپەرماركەتكە كىرگەندە، وزدەرىنىڭ قاشىپ كەتكەندەرىن ءتۇسىندىردى. كىشى قىز ارقان تاۋىپ الىپ، ءوزىن باعاناعا بايلاپ قويۋدى سۇراعان. سول ۋاقىتتا ءتۇرى ەۋروپالىققا ۇقسايتىن ەر ادام ولاردى فوتوعا تۇسىرۋگە رۇقسات سۇراعان. قىزدار رۇقسات ەتپەگەن. ءبىراق، ەر ادام 50 تەڭگە بەرگەن سوڭ، كەلىسىم بەرگەن». قازىرگى ۋاقىتتا بالالار تەمىرتاۋ ق. كامەلەتتىك جاسقا تولماعانداردىڭ بەيىمدەلۋ ورتالىعىندا.