تالعات تەمەنوۆ «توقال» فيلمىنىڭ رەجيسسەرىن توپاسقا تەڭەدى
جۇرگىزۋشى ايگەرىم سەيفوللانىڭ «ءوزى جۋرناليست، ءوزى ءانشى، ءوزى اكتەر، ءوزى پروديۋسەر، ءوزى اكتەر» بولىپ جۇرگەن امبەباپ ماماندار تۋرالى سۇراعىنا جاۋاپ بەرە كەلىپ، «توقال» فيلمىن تىلگە تيەك ەتكەن.
«قولىنان كەلىپ تۇرسا، تالانتىن تانىتسا «جولىڭ بولسىن» دەيمىز. جالپى اكتەر ماماندىعى باعىنىشتى ماماندىق. ويتكەنى اكتەر تەك ورىنداۋشى. ونىڭ سەناريىن باسقا ادام جازادى، رەجيسسەر قويادى. جاقىندا «توقال» دەگەن فيلمدى كوردىم. گاۋھاردى تانيمىن. ءوزى پروديۋسەر، ءوزى رەجيسسەر، ءوزى كينوعا تۇسكەن. سول كينودان قارنىم اشىپ شىقتى. ءار نارسەنىڭ باسىن ءبىر شالعان. ەڭ جامانى قازاقتىڭ، ۇلتتىڭ نامىسىنا تيەتىن دۇنيەلەر بار. بۇل رەجيسسەردىڭ كورگەنسىزدىگى. رەجيسسەردە قۇداي بەرگەن تالانت بولۋ كەرەك. رەجيسسەر بولىپ قالىپتاسپايدى، رەجيسسەر بولىپ تۋادى. اقىن بولۋ ءۇشىن دە سولاي. وسى تۇرعىدان كەلگەندە رەجيسسەر توپاستاۋ بولعاننان كەيىن اكتەرلىك ويىن دا توپاستاۋ، سەناريى دە توپاستاۋ. شالاجانسار دۇنيەدەن ءبۇتىن دۇنيە شىقپايدى. ەسەكتەن ەسەك تۋادى. ەسەكتەن تۇلپار تۋمايدى. سوندىقتان ءوزى پروديۋسەر، ءوزى رەجيسسەر، ءوزى اكتەر بولعانداردىڭ مۇنداي ءىسىن قۇپتامايمىن» - دەيدى كينورەجيسسەر.
سونداي-اق وتاندىق تەلەارنالارداعى ءازىل- سىقاق باعدارلامالارىن سىنعا الدى.
«ءيت جوق جەردە شوشقا ۇرەدى. تەلەديدارلارداعى ءازىل- سىقاق باعدارلامالارىن كورمەيمىن. كورسەم قان قىسىمىم كوتەرىلەدى. ءاجۋالايتىندارى اۋىلداعى انالارىمىز، اكەلەرىمىز بەن كەلىندەرىمىز. تۇگەل كەلەڭسىز ەتىپ كورسەتەدى. ەكران - يدەولوگيا. ەكراندا سىناۋ بار دا، مىنەۋ بار، كۇلۋ بار دا، كەلەمەج ەتۋ بار. بۇگىنگىلەر مىنە وسىنى اجىراتا المايدى. سوندىقتان دا ءقازىر تەلەديداردا ءبىر- بىرىنە تاۋىقتىڭ جۇمىرتقاسىنداي ۇقساس، ويى دا، ورەسى دە ۇقساس، ءتىپتى توپاستاۋ باعدارلامالار كوپ» - دەگەن.
