دەپۋتات ەفيردەگى قىسىر ءسوز، جالعان كۇلكى مەن ادەپسىز مازاقتى سىنعا الدى
ءماجىلىس دەپۋتاتى باقىتبەك سماعۇل ءازىل- سىقاق باعدارلامارىنا كوڭىلدىلەر مەن تاپقىرلار كلۋبىنىڭ ازىلكەشتەرىن عانا ەمەس، قازاقى قالجىڭنىڭ مايىن تامىزىپ، ونەردىڭ بەل ورتاسىندا جۇرگەن ساتيريكتەر مەن سىقاقشىلاردى تارتۋدى ۇسىندى، دەپ حابارلايدى Sputnik.
«دەپۋتاتتىق ساۋالعا سايلاۋشىلارمەن كەزدەسۋ بارىسىندا جۇرتشىلىق تاراپىنان قازاق ءتىلدى تەلەكونتەنتكە قاتىستى ايتىلىپ جۇرگەن وي- پىكىرلەر نەگىز بولىپ وتىر. اسىرەسە ءازىلدى ءاجۋاعا، كۇلكىنى سايقىمازاققا اينالدىرعان ءازىل- سىقاق باعدارلامارىنا كوپ سىن ايتىلادى. جايدارى كۇلكى جان ساۋلىعى دەسەك تە، الايدا قازاقستاندىق تەلەارنالاردان بەرىلەتىن ءازىل- قالجىڭ ساپاسىنىڭ تومەندىگى الاڭداتادى. ورىنسىز ءارى جالعان كۇلكى، ۇلتتىق قۇندىلىقتاردى كەلەمەج ەتۋ، قىسىر سوزدەر، بوس قىلىق، ىرجالاق، ادەپسىز مازاقتار ءازىلدىڭ قادىرىن كەتىرۋدە»، - دەدى دەپۋتات اقپارات جانە كوممۋنيكاتسيا ءمينيسترى داۋرەن ابايەۆقا جولداعان دەپۋتاتتىق ساۋالىندا.
ونىڭ ايتۋىنشا، كوپتەگەن ەلدەردە ءازىل- وسپاق تەلەباعدارلامالارى تاپتىرماس، تاماشا يدەولوگيالىق قۇرال دا بولىپ وتىر. ءازىل- قالجىڭ تەلەونىمدەرى وتكىر، ءبىراق جاراسىمدى. سىني، ءبىراق شىنايى سىقاقتار مەن ءازىل- وسپاقتار ومىردە بولىپ جاتقان وقيعالاردى، وزەكتى ماسەلەلەردى جانە ۇلتتىق ۇستانىمدى تۇسىندىرەدى.
«وتاندىق باعدارلامالارعا كوبىنەسە قيسىندى قاعىتپا قالجىڭدار، ويناقى دا ورىندى ازىلدەر، كونتەكستى استارلاپ، ءازىل تۇرىندە ۇتقىر جەتكىزەتىن ۇشقىر وي مەن تاپقىرلىق، شەشەندىك جەتىسپەيدى. ادەمى ءارى ورىندى ءازىل ارقىلى حالىق، سونىڭ ىشىندە جاستار اراسىندا جالپى ۇلتتىق يدەيالاردى دا، مەملەكەتتىك باعدارلامالاردى دا ىلگەرىلەتۋگە، تۇسىنىكتى ءارى تانىمدى تۇردە ناسيحاتتاۋعا بولادى. ال ادەپسىز ءارى ساپاسىز ازىلگە مۇنداي ميسسيا ارتۋ قورقىنىشتى، ول تەك تەرىس ناتيجە اكەلمەك. بەيادەپ ءازىلدىڭ قاۋىپتى جاعى تاعى بار. ولار ۇلتتىق قۇندىلىقتاردى كاريكاتۋراعا اينالدىرادى، قۇنىن تۇسىرەدى»، - دەيدى سماعۇل.
دەپۋتاتتىڭ پىكىرىنشە، ءازىل باعدارلامالارىنىڭ ەلىمىزدەگى رەيتينگى ەڭ جوعارى تەلەونىمدەر قاتارىنا جاتاتىنىن ەسكەرۋ كەرەك. ولار ەفيردىڭ نەگىزگى قوزعالتۋشى كۇشى، ولار ءتىپتى ينتەرنەت اۋديتورياعا دا كەڭ تارايدى.
«ايتىلعانداردى نازارعا الا وتىرىپ، كەلەسى ماسەلەلەرگە نازار اۋدارۋدى سۇرايمىن. بىرىنشىدەن، وسى باعىتتاعى تەلەباعدارلامالارعا كوڭىلدىلەر مەن تاپقىرلار كلۋبىنىڭ ازىلكەشتەرىن عانا ەمەس، مادەنيەت سالاسىنداعى كورەرمەندەرگە رياسىز كۇلكى سىيلاپ جۇرگەن، قازاقى قالجىڭنىڭ مايىن تامىزىپ، ونەردىڭ بەل ورتاسىندا جۇرگەن ساتيريكتەر مەن سىقاقشىلاردى، مامان سەناريستەر مەن جازۋشىلاردى كەڭىنەن تارتۋعا كوڭىل بولگەن ءجون. ەكىنشىدەن، وتاندىق ساپالى ءازىل- سىقاق جانە ويىن-ساۋىق تەلەونىمدەرى ءوندىرىسىن دامىتۋ ماقساتىندا اقپارات جانە كوممۋنيكاتسيالار مەن مادەنيەت جانە سپورت مينيسترلىگى بىرلەسكەن شارالاردى ازىرلەپ، قابىلداۋ ماسەلەسىن قاراستىرۋدى ۇسىنامىن»، - دەپ ءتۇيدى ءسوزىن دەپۋتات.
