07:48, 05 - ءساۋىر 2017 | GMT +5
يتاليادا رەسەيلىكتىڭ مۇردەسى سالىنعان چەمودان تابىلدى
استانا. قازاقپارات - يتاليانىڭ ريميني پورتىندا چەموداننان 27 جاستاعى رەسەيلىك بويجەتكەننىڭ مۇردەسى تابىلدى، دەپ حابارلايدى ر ي ا نوۆوستي.
چەمودان 25 -ناۋرىز كۇنى ادريات تەڭىزىنەن الىنعان. ساۋساق ىزدەرى كورسەتكەندەي، قازا تاپقان قىز رەسەي ازاماتشاسى بولىپ شىقتى. ول بىرنەشە جىل بويى يتاليادا تۇرىپ كەلگەن. پوليتسەيلەر ونىڭ دەنەسىنەن زورلىقپەن ادام ءولتىرۋدىڭ جانە سۋعا تۇنشىعىپ ءولۋدىڭ بەلگىلەرىن تاپپادى.
ولار ايەلدىڭ مۇردەسىندە قىلمىستىق ىزدەردىڭ جوقتىعىن، ونىڭ ولىمىنە ءومىر ءسۇرۋ جاعدايى اسەر ەتىپ، اعزاسىنىڭ السىرەۋى سەبەپكەر بولۋى مۇمكىن دەپ بولجاۋدا. يتاليالىق قۇقىق قورعاۋشىلار بىرەۋ دەنەدەن قۇتىلعىسى كەلىپ، ونى تەڭىزگە چەمودانعا سالىپ لاقتىرعانىن تاعى ءبىر نۇسقا رەتىندە قاراستىرۋدا. ريميني پروكۋراتۋراسى تەرگەۋ جۇرگىزۋدە. سوڭعى ايلاردا ايەلدىڭ بىرنەشە رەت "انورەكسيا" دياگنوزىمەن اۋرۋحاناعا تۇسكەنى بەلگىلى بولدى. ول كوز جۇمعان ۋاقىتتا 35 كەلى بولعاندىعى حابارلانۋدا.
