مۇراجاي، «عالامتور»، «سۋبۇرقاق» سوزدەرى حالىقارالىق تەرميندەرمەن الماستىرىلدى
دەپ حابارلايدى قازاقپارات.
«قازاقستاندىقتاردىڭ ءتىل مادەنيەتى دەڭگەيىن ارتتىرۋ تەرمينولوگيا جانە ونوماستيكا ماسەلەلەرىنىڭ ورنى ەرەكشە. بۇل باعىتتا ماقساتتى جۇمىستار جۇرگىزىلدى. ەسەپتىك كەزەڭدە (2014-2016 -جىلدارى) 8 مىڭنان اسا تەرمين بەكىتىلدى. 2014 -جىلى ەلباسىنىڭ تاپسىرماسى بويىنشا، حالىق اراسىندا اركەلكى قولدانىلىپ، قوعامدا كەلەڭسىزدىك تۋدىرعان ءبىرقاتار تەرميندى تەرمينولوگيا كوميسسياسى قاراپ بەكىتتى.
مىسالى، 2014 -جىلعى جەلتوقسان ايىندا اۋىزەكى ءتىل قولدانىسىنداعى شاپتىرما، سۋبۇرقاق - حالىقارالىق قولدانىستاعى فونتان بولىپ، قايتا وزگەرتىلدى. كۇيساندىق - فورتەپيانو، پيانينو، وتاشى - حيرۋرگ سوزىنە، مۇراجاي - مۋزەي، قيسىن - لوگيكا، سازگەر - كومپوزيتور، عالامتور - ينتەرنەت بولىپ بەكىتىلدى. سونىمەن قاتار تەرمينكومدا بەكىتىلىپ، جارىسپالى تۇردە قولدانىلىپ جۇرگەن ءبىرقاتار تەرمين قايتىپ قارالىپ رەتتەلدى. مىسالى، مۇراعات - ارحيۆ، ماسەلە - پروبلەما، ۇدەرىس - پروتسەسس بولىپ قايتا بەكىتىلدى»، - دەدى مينيستر.
ونىڭ ايتۋىنا قاراعاندا، اعىمداعى جىلى تەرمينكومدا ءبىرقاتار حالىقارالىق تەرميندەردى قايتا قاراۋ جوسپارلانىپ وتىر.
«مىسالى، پايىز - پروتسەنت سوزىنە، ءانۇران - گيمن، يەگەرى ءسوزى - لاۋرەات تەرميندەرى رەتىندە بەكىتۋدى ۇسىنىپ وتىرمىز. نەگە دەسەڭىزدەر، لاۋرەات مەجدۋنارودنوگو كونكۋرسا دەگەندى حالىقارالىق كونكۋرستىڭ يەگەرى دەپ ءجۇرمىز. يەگەرى ول سوبستۆەننيك قوي ەندى. سول ءۇشىن لاۋرەات ءسوزىن حالىقارالىق قولدانىستاعى قايتادان ورنىنا كەلتىرۋ ۇسىنىلىپ وتىر»، - دەپ اتاپ ءوتتى ا. مۇحامەدي ۇلى.
«ەندى مۇددەلى مەملەكەتتىك ورگاندارمەن بىرلەسە وتىرىپ، تەرميندى ستاندارتتاۋ ماسەلەسىن پىسىقتاۋعا كىرىسەمىز. ونوماستيكا ماسەلەلەرى بويىنشا ءبىرقاتار نورماتيۆتىك- قۇقىقتىق اكتىلەرگە وزگەرىستەر مەن تولىقتىرۋلار ەنگىزىلدى. ءۇش جىل ىشىندە رەسپۋبليكا بويىنشا 239 وبەكت، 492 كوشە، 90 ستانسا اتاۋىنا وڭ قورىتىندى بەرىلدى. سونىمەن قاتار ەلدەگى كوشە، ەلدى مەكەن اتاۋلارىنا تالداۋ جۇمىستارى جۇرگىزىلدى. ونىڭ قورىتىندىسى بويىنشا رەسپۋبليكا كولەمىندە كەيبىر اۋىلدار مەن كوپتەگەن كوشەلەردىڭ يدەولوگيالىق تۇرعىدا ەسكىرگەنى جانە اتاۋلاردىڭ قايتالاناتىنى انىقتالدى. سونداي- اق وسى رەتتە ەلباسىنىڭ تاپسىرماسىنا سايكەس، يدەولوگيالىق تۇرعىدا ەسكىرگەن، قايتالاناتىن اتاۋلاردى تاريحي جەر- سۋ اتاۋلارىمەن، ۇلتتىق تانىمعا جاقىن ءداستۇرلى اتاۋلارمەن وزگەرتۋ بويىنشا ناقتى جۇمىستار جۇرگىزىلۋدە»، - دەپ ءتۇيدى ءسوزىن مينيستر.
اۆتور: جاسۇلان جولدىبايەۆ
