قانات يسلام: باستى ماقساتىم- ۇلتىما پايدامدى تيگىزۋ، ادام بولۋ
وسى جىلدىڭ 18 -اقپانىندا برازيليالىق بوكسشى روبسون اسسيستى نوكاۋتپەن جەڭگەننەن كەيىن قانات يسلام ەلگە ورالعان بولاتىن. وسى ءساتتى پايدالانىپ سپورتشىمەن ءبىرقاتار ساۋالدار توڭىرەگىندە تىلدەسىپ ۇلگەردىك. سپورتشى، مەيلىنشە جوعارى جەتىستىككە جەتۋگە تالپىناتىنىن، ءبىراق ادامگەرشىلىك قاي كەزدە دە بارىنەن بيىك تۇرۋى كەرەكتىگىن قاداپ ايتتى.
«دەنى ساۋ ەكى ادامنىڭ ءبىرى چەمپيون بولادى. ءبىراق ادام بولۋ قيىن. سوندىقتان ءبىزدىڭ ويىمىزدا تەك چەمپيون، بوكس دەگەن ۇعىمدار عانا ەمەس، ۇلت دەگەن ۇعىم دا بار. قاي سالادا، قاي كاسىپ تە بولماسىن ۇلتتىڭ مۇدەسى بيىك تۇرماسا، ول ادام قاتەلىككە ۇشىرايدى. سول ءۇشىن ويلايمىن، مەنىڭ موينىمدا دا ۇلتتىڭ مۇدەسى تۇر. بىزدەن كەيىن ءوسىپ كەلە جاتقان ۇل- قىزدار بىزگە قاراپ بوي تۇزەيدى»، - دەيدى قانات يسلام.
بوكسشى الداعى ءبىر اپتا كولەمىندە مامىر ايىندا وتكىزەتىن جەكپە- جەگى تۋرالى مالىمەتتەردى جاريالايتىنىن دا ايتتى. سونىمەن قاتار، مەكسيكالىق ازۋلى ساۋل كانەلو الۆارەسپەن ايقاسقا شىعۋى مۇمكىن دەگەن سىبىسقا دا ءوز جاۋابىن بەردى.
«مۇمكىن ونىڭ دارەجەسى مەنەن جوعارى شىعار، ءبىراق مەندە بوكسقا كەشە كەلگەن بالا ەمەسپىن. بىلعارى قولعاپ كيىپ جۇرگەنىمە 20 جىلداي بولدى. قازاق ايتادى «قۇلاساڭ ناردان قۇلا» دەيدى. بۇل ماسەلەنى ەكى جاقتىڭ پروموۋتەرلەرى سويلەسە جاتىر»، - دەيدى بوكسشى.
قانات يسلام، مامىر مەن قىركۇيەك ايىنداعى كەزدەسۋدەن كەيىن، جىل سوڭىنا دەيىن تاعى ءبىر جەكپە- جەك وتكىزۋى مۇمكىن.
«بارىنشا دۇرىس رەجيم ۇستانۋعا تىرىسامىن. كۇندە كەشكى 10 عا دەيىن ۇيىقتاپ قالۋعا تىرىسامىن. توي، جيىندارعا بارا الماي جاتامىن. رەنجىپ تە جاتادى. سپورتشىنى قۇرتاتىن نارسە - قىدىرۋ، قوناق بولۋ، ماقتاۋ ءسوز. كىم ماقتاۋدى جەك كورەدى. ءبىر جەرگە قوناققا شاقىرىپ، الدىڭا ءشاي قويىپ، ۇستىڭە شاپان جاۋىپ جاتسا، جاقسى ارينە. بىزدە وليمپيادا چەمپيوندارىنىڭ كوبى ءبىر مارتە چەمپيون بولدى دا، بوكستان كەتىپ قالدى. ولار وزدىگىنەن كەتكەن جوق، ولار شارشاعان سوڭ كەتتى. تالاي جەڭىسكە جەتەتىن جىگىتتەر ەدى. سول سەبەپتى اياقتى سوزىپ تاستاپ جاتاتىن ۋاقىت جوق. وتباسى، بالا- شاعانىڭ ءبارىن تاستاپ، تاۋەكەلگە بەل بۋىپ، دايىندالىپ جاتىرمىز»، - دەيدى قانات.
بۇعان دەيىن قانات يسلامنىڭ الماتىدا وتكىزگەن اشىق جاتتىعۋ بارىسىندا كىشكەنتاي بالانىڭ تۇساۋىن كەسكەنىن حابارلاعان ەدىك.
2012 -جىلدان باستاپ كاسىپقوي بوكستا جۇرگەن قانات يسلام، وسى كەزگە 23 جەكپە- جەك وتكىزىپ، ونىڭ بارلىعىندا دا جەڭىسكە جەتكەن. ونىڭ 19 ىن نوكاۋتپەن اياقتاعان.
