سانكت-پەتەربۋرگتەگى تەراكتىگە قازاقستاندىقتىڭ قاتىسى بولۋى مۇمكىن بە

استانا. قازاقپارات - ق ر س ءى م باسپا ءسوز قىزمەتىنىڭ باسشىسى ءانۋار جايناقوۆ ءوزىنىڭ فەيسبۋك پاراقشاسىندا سانكت-پەتەربۋرگتەگى تەراكتىگە قازاقستاندىقتىڭ قاتىسى بولۋى مۇمكىن دەگەن اقپاراتقا قاتىستى پىكىرىن ءبىلدىردى.

«كەيبىر ب ا ق- تا 3- ءساۋىر كۇنى سانت-پەتەربۋرگتەگى تەراكتىنى ورىنداۋشى قازاقستان ازاماتى بولۋى مۇمكىن دەگەن اقپارات پايدا بولدى. 3- ءساۋىر كۇنى جەرگىلىكتى ۋاقىتپەن 21:06 دا سانكت-پەتەربۋرگتەگى قازاقستاننىڭ باس كونسۋلىنا الماتىلىق يرينا ارىشەۆادان تەلەفون قوڭىراۋى كەلىپ ءتۇستى. ول جارىلىس تۋرالى اقپاراتتان كەيىن سانكت-پەتەربۋرگ ەكونوميكالىق ۋنيۆەرسيتەتىنىڭ 3-كۋرسىندا وقيتىن ءوزىنىڭ ۇلى، 1996-جىلى تۋعان ارىشەۆ ماكسيم ۆيتاليەۆيچتىڭ بايلانىسقا شىقپاي قالعانىن ايتقان. سانكت-پەتەربۋرگتە م. ارىشەۆ ءوزىنىڭ دوس قىزىمەن، اپكەسىمەن جانە جەزدەسىمەن بىرگە تۇرادى. تۋىستارىنىڭ حابارلاۋىنشا، ماكسيم سوڭعى رەت 3- ءساۋىر كۇنى 14:30 دا ساباقتان شىعىپ، سەننايا پلوشاد ستانساسىنان تەحنولوگيالىق ينستيتۋت ارقىلى ۇيگە قايتىپ كەلە جاتقانىن حابارلاعان»، - دەپ جازدى ءانۋار جايناقوۆ.

قازىرگى ۋاقىتتا سانكت-پەتەربۋرگتەگى قازاقستاننىڭ باس كونسۋلى تەراكتى قۇرباندارىن تانۋ جۇرگىزىلىپ جاتقان اۋرۋحانادا. استانا ۋاقىتىمەن تاڭعى ساعات 5:30 دا قۇرباندار اراسىندا قازاقستان ازاماتتارىنىڭ جوقتىعى انىقتالدى. «ماكسيم ارىشەۆتىڭ سانكت-پەتەربۋرگتەگى تەراكتىگە قاتىسى بار دەپ ايتۋعا ءالى ەرتە. ونى ىزدەستىرۋ جۇمىستارى جالعاسىپ جاتىر». قازا تاپقانداردىڭ تۋىستارى مەن جاقىندارىنا قايعىرا كوڭىل ايتامىن»، - دەدى ق ر س ءى م باسپا ءسوز قىزمەتىنىڭ باسشىسى ءانۋار جايناقوۆ.