نامازحانالار قوعامدىق ورىنداردا قايتا اشىلادى

استانا. قازاقپارات - ق ر ءدىن ىستەرى جانە ازاماتتىق قوعام مينيسترلىگى عيبادات ەتۋ بولمەلەرى (نامازحانا) مەن ءدىني ادەبيەتتەر ساتاتىن كىتاپ دۇكەندەرىنە قويىلاتىن تالاپتاردى قايتا قاراپ شىقتى، دەپ حابارلايدى قازاقپارات ءتىلشىسى.

رەسمي مالىمەتكە سايكەس، كوميتەت ءدىندار ازاماتتار مەن ساراپشى مامانداردىڭ وي- پىكىرلەرىن ەسكەرە وتىرىپ، عيبادات ەتۋ ۇيلەرى مەن ءدىني ادەبيەتتەر ساتىلاتىن ءۇي- جايلاردىڭ ورنالاسۋىنا ارنالعان نۇسقاۋلىقتىڭ جاڭا رەداكسياسىن ازىرلەدى.

"نۇسقاۋلىقتاعى تۇبەگەيلى جاڭالىق رەتىندە وسىنداي ءۇي- جايلاردىڭ مەملەكەتتىك ۇيىمدار مەن مەكەمەلەردەن 300 مەتردەن كەم ەمەس قاشىقتىقتا ورنالاسۋىنا قويىلعان بۇرىنعى تىيىم كۇشىنىڭ جويىلعانىن ايتا كەتۋ كەرەك.

مۇنداي تالاپ بۇگىنگى ەلدى مەكەندەردىڭ ورنالاسۋ ەرەكشەلىكتەرىنە جاۋاپ بەرە المايدى. نۇسقاۋلىقتىڭ جاڭا رەداكسياسىندا تەمىر جول جانە اۆتوۆوكزالداردا، اۋەجايلار مەن پورتتاردا، ياعني ادامدار ەرىكسىز تۇردە ۇزاق ۋاقىت بولاتىن ورىنداردا ءدىني ءىس- شارالاردى وتكىزۋگە ارنالعان ءۇي- جايلاردى اشۋعا قويىلعان تىيىم الىنىپ تاستالدى"، - دەلىنگەن حابارلامادا.

الايدا 300 مەتر بويىنشا شەكتەۋلەر ءبىلىم بەرۋ مەكەمەلەرىنە قاتىستى كۇشىندە قالدى. اتالعان تالاپ رۋحاني ء(دىني) ءبىلىم بەرۋ ۇيىمدارىنا قاتىستى قولدانىلمايدى. وسى رەتتە، عيبادات ەتۋ بولمەلەرىن اشۋ كەزىندە بەلگىلى ءبىر تالاپتاردى ساقتاۋ قاجەتتىگىن ەرەكشە اتاپ وتكەن ءجون. مىسالى، ءدىني ءىس- شارالاردى وتكىزۋگە ارنالعان ءۇي- جايلار دارەت الۋ ءۇشىن قاجەتتى سانيتارلىق توراپپەن قامتاماسىز ەتىلۋى ءتيىس جانە جالپى العاندا قازاقستان رەسپۋبليكاسىنىڭ قولدانىستاعى زاڭناماسىنا سايكەس سانيتارلىق- ەپيدەميولوگيالىق تالاپتارعا ساي بولۋى شارت. اتالعان تالاپتار عيبادات ەتۋ راسىمدەرىن ورىنداۋ كەزىندە قولايلى جاعدايلاردى قامتاماسىز ەتۋ ماقساتىندا ەنگىزىلىپ وتىر.

 "نۇسقاۋلىق جوباسىندا قولدانىستاعى زاڭناماعا سايكەس نىساننىڭ مەنشىك يەسىنىڭ ءۇي- جايداعى سانيتارلىق، ءورت جانە باسقا قاۋىپسىزدىكتەر ءۇشىن جاۋاپ بەرەتىندىگى كورسەتىلگەن. ءتيىستى نورماتيۆتىك قۇجات كەلىسۋ پروتسەسىنەن وتكەن سوڭ عيبادات ەتۋ بولمەلەرى، سونىڭ ىشىندە نامازحانالار، جاڭا جاعدايدا جۇمىس ىستەيتىن بولادى. ءدىندارلار ءۇشىن مۇنداي ءۇي- جايلاردا عيبادات ەتۋ راسىمدەرى قاۋىپسىز جانە بارىنشا قولايلى جاعدايلاردا ورىنداۋ مۇمكىندىكتەرىمەن قامتاماسىز ەتىلەتىن بولادى. جالپى العاندا، عيبادات ەتۋ بولمەلەرىن اشۋ تۋرالى شەشىم وسى نىسانداردىڭ مەنشىك يەلەرى تاراپىنان قابىلداناتىن بولادى"، - دەيدى ماماندار.

  

اۆتور: ارمان اسقاروۆ