قازاقستان تۇڭعىش رەت قىتاي نارىعىنا ءبيداي كەبەگىن ەكسپورتتاماق
ساپار اياسىندا دەلەگاتسيا ق ح ر ساپانى قاداعالاۋ، ينسپەكتسيا جانە كارانتين جونىندەگى باس باسقارماسىنىڭ ءتوراعاسى چجي شۋپينمەن كەزدەستى، دەپ حابارلايدى قازاقپارات.
كەزدەسۋ بارىسىندا تاراپتار قازاقستاننىڭ اۋىلشارۋاشىلىق ونىمدەرىنىڭ قىتاي نارىعىنا كىرۋى مەن شەكتەۋلەردى الۋ ماسەلەلەرىن تالقىلادى.
اتاپ ايتقاندا، قىتاي تاراپى ق ح ر- دىڭ جەتكىزۋشى كومپانيالار رەەسترىنە ەنگىزۋ ءۇشىن بيىلعى ساۋىردە قوي ەتىنىڭ ءوندىرىسى جۇيەسىن جانە ەت وڭدەۋشى كاسىپورىنداردى ينسپەكتسيالايتىنىن راستادى.
قازاقستاننان قىتايعا ەكسپورتتالاتىن 34 ونىمگە قاتىستى ۆەتەرينارلىق جانە فيتوسانيتارلىق تالاپتار تۋرالى حاتتاما جوباسىن قابىلداۋدى جىلدامداتۋ ماسەلەسى دە ءسوز بولدى. سونداي-اق، قازاقستان تاراپى ەل اۋماعىندا اۋىل شارۋاشىلىعى ونىمدەرىنىڭ ساپاسى مەن قاۋىپسىزدىگىن باقىلاۋعا ارنالعان بىرىككەن زەرتحانا قۇرۋ تۋرالى باستاما كوتەردى.
كەزدەسۋ قورىتىندىسىنا سايكەس كورشىلەس ەلگە ەكسپورتتالاتىن بيداي كەبەگى پارتيالارىنا قويىلاتىن ينسپەكتسيا، كارانتين جانە سانيتارلىق تالاپتار تۋرالى حاتتاما جاسالدى. وسى كەلىسىمنىڭ ارقاسىندا قازاقستاندىق بيزنەسمەندەر العاش رەت قىتاي نارىعىنا بيداي كەبەگىن ەكسپورتتاۋعا قول جەتكىزبەك.
ەسكە سالا كەتەيىك، ەكى كۇندىك جۇمىس ساپارىنىڭ اياسىندا قازاقستاندىق دەلەگاتسيا قىتايدىڭ اۋىل شارۋاشىلىعى مينيسترلىگى، ق ح ر حالىقارالىق ساۋدا-ساتتىققا اتسالىسۋ كوميتەتى، ق ح ر كوممەرتسيا مينيسترلىگى باسشىلىعىمەن جانە دە جەرگىلىكتى بيزنەس قاۋىمداستىعى وكىلدەرىمەن كەزدەسپەك. وندا ەكى ەلدىڭ ساۋدا-ساتتىعى ءۇشىن اسا ماڭىزدى ءبىرقاتار ماسەلەلەر شەشىمىن تابادى دەپ كۇتىلۋدە.
اۆتور: قانات مامەتقازى ۇلى
