توزاققا اپارار جول: ايەلى مەن ءوزىن ولتىرگەن سۋپەر بوكسشى
سونداي تۇمان ءوز باسىندا دا تۇرعانداي سەزىنەتىن. كوبىنە مۇنداي ساتتەر كوكۋي ىشكەن سوڭ باستالادى. تىم ءتاتتى ليكەر بالانىڭ باسىنا ءسىڭىپ كەتىپ، ومىرىنە جاڭا ماعىنا بەرگەن بولادى.
ول تاعى دا چيكانى ەسىنە ءتۇسىرىپ، كوكۋي قۇتىسىن اۋزىنا قالاي الىپ باردى. باسىنداعى تۇمان قىزىل قانعا بويانعانداي بولىپ تۇر. چيكا دۇنيەدەن وتكەن كۇنى قاتتى جاڭبىر جاۋىپ تۇرعان، ءبىراق ءيتى باۋدى تىستەپ الىپ، ەدۆيندى كوشەگە قاراي سۇيرەدى.
الدارىنان ەدۋاردو شىقتى. جارالى بۇقا سەكىلدى اشۋلانشاق جىگىت. ونى ماسكۇنەم اكەسى كوپ ۇراتىن، ول بولسا ەسەسىن باسقا بالالاردان قايتاراتىن. ەدۋاردو اكەسىنەن تاعى ءبىر تاياق جەپ الىپ، ءوز لاشىعىنىڭ الدىندا تۇرعان. ونى كورگەن چيكا جاقىنداي ءتۇستى.
ەدۋاردو ءبارىن ءۇنسىز ىستەدى. قولىنا ۇلكەن جۇمىر تاستى الدى دا، چيكانىڭ باسىن جاڭعاق شاققانداي مىلجالاپ تاستادى. بۇل از بولعانداي، ەزىلگەن دەنەسىن بىرنەشە رەت تەۋىپ جىبەردى. شارۋاسىن تىندىرىپ تاستاعان ول ەدۆيندى كۇتىپ ءتۇر. چيكانىڭ جانى قانعا بويالعان. ەندى ءبىر عانا سۇراق تۇر: ەدۆين نە ىستەيدى؟
ول شەشىمدى تەز قابىلدادى. ەدۆين ەدۋاردودان كىشكەنتاي بولاتىن، ءبىراق قورىقپاي العا ۇمتىلدى. ەدۋاردونىڭ ءبىر سوققىسىن دا سەزگەن جوق. بار قالاعانى ءيتىن ولتىرگەن ادامنىڭ موينىنان ۇستاپ الىپ، ەندى اۋا جۇتپايتىنداي قىلىپ تۇنشىقتىرۋ. جارتىلاي جالاڭاش ەرەسەك كىسى باسىنا مىلتىق تاقاعاندا ەسىن جينادى.
قورقىنىشتان كوزى شىعىپ كەتكەلى تۇرعان ەدۋاردونى جىبەرۋگە تۋرا كەلدى.
- اۋزىڭدى اش، بوقمۇرىن! - دەدى ەدۋاردونىڭ اكەسى. ەدۆين ونىڭ بۇيرىعىن ورىنداعاندا مىلتىقتى اۋزىنا سالدى. ءولىمنىڭ ازۋىنا ىلىنگەلى تۇرعان ساتتە عانا ەدۆين ءومىر سۇرگىسى كەلەتىنىن سەزدى.
- اكە، ميىن شاشىپ جىبەر، - دەدى ەدۋاردو ورنىنان تۇرىپ جاتىر. اكەسىنىڭ كەك العانىن قالاپ تۇر. ءبىراق اكەسى مىلتىقتى بالانىڭ اۋزىنان الىپ، ءوز ۇلىن سابادى.
- سەن - وتباسىمىزدىڭ ماسقاراسى. جىلان قۇرتىنداي كىشكەنتاي بالادان جەڭىلىپ قالدىڭ، بيشارا، سەنى كۇلكى ەتتى! - دەپ ايقايلادى ۇلىن تەۋىپ جاتىپ.
ەسىن جيعان ەدۆين چيكانى ۇستاپ الىپ، ۇيىنە جۇگىرىپ كەتتى. قولىنا كۇرەكتى الىپ، شۇڭقىر قازدى دا، ءيتىن سول جەرگە تاستادى.
سۇيىكتى يتىمەن بىرگە ول جاڭبىرلى كۇندە اياقتالعان ءوزىنىڭ بالالىق شاعىن دا جەرلەدى.
2.
ەدۆين ەل- ۆيحيانىڭ تۇيىق كوشەلەرىمەن ايالداماعا دەيىن جىلدام ءجۇرىپ بارادى - بۇگىن بازاردا بارلىق جەمىستەردى ساتىپ جىبەردى، قالتاسىندا بوليۆارلار سىڭعىرلاپ كەلەدى. ەندى اناسى بەلبەۋمەن ۇرمايدى، ءتىپتى، كەشكى اسقا ءدامدى ءبىر نارسە بەرۋى دە مۇمكىن.
بار ويى ەمپانادوستا بولدى. ەت قوسىلعان قۇيماق. اناسى ءدامدى قىلىپ جاسايدى. ءبىراق جاقىن ارادا ونى جەي قويماس - ۇيدە ەت كوپتەن بەرى جوق. كوپ دەگەندە بۇگىن تامالە مەن جۇگەرى شەلپەگىن جەيدى. اكەسى وتباسىن تاستاپ، باسقا ايەلگە كەتىپ قالعالى، بۇل ۇيدە مۇنداي تاماق كوپ بولا بەرمەيتىن.
كەش باتىپ كەلە جاتقان. كوكۋيدىڭ اسەرى ەلىكتىرىپ بارادى. بىردە اناسى الكوگولدىڭ ءيىسىن سەزىپ قالىپ، ەدۆين قاتتى تاياق جەگەن. ءبىراق ىشىمدىكتىڭ ميعا اسەرى سونشالىق، اناسىنان تىعىلۋدى دا ۇمىتىپ كەتەتىن.
بۇل جولى دا سول ىشىمدىكتى تاتىپ الىپ، بازاردان بەرى اڭدىپ كەلە جاتقان ادامدى بايقاماي قالدى.
- ەي، cabron, اقشا بار ما؟ - ەدۆيننىڭ ەستىگەنى وسى بولدى. - كىشكەنتاي ماقۇلىق، ءۇنىڭدى شىعارساڭ، دەنەڭنىڭ پارشا-پارشاسىن شىعارىپ، شوشقالارعا جەم قىلامىن.
ءبىر قولىمەن قالتاسىن ءتىنتىپ شىقتى دا، بۇگىنگى تابىسىن الىپ كەتتى. ەدۆين ارتىنداعى ادامنىڭ اۋىر دەمىن ەستىپ، ونىڭ ويىندا اقشا عانا ەمەس ەكەنىن سەزدى.
- Merde! - دەپ ايقايلادى ول، تيىنداردى ساناپ تۇرىپ. - مۇندا ءبىر-ەكى گرام كوكسقا دا جەتپەيدى، بوقمۇرىن! ءاي، جارايدى، ەسەسىن تانىڭمەن قايتاراسىڭ.
ەدۆيندى ءبىر قولىمەن ۇستاپ تۇرىپ، شالبارىن شەشە باستادى. سول ساتتە ەدۆين قاشان دا وزىمەن بىرگە ۇستاپ جۇرەتىن پىشاعىن زورلاۋشىعا تىعىپ جىبەردى. ايۋداي قۇشاق السىزدەگەن سوڭ شاشىلىپ قالعان بوليۆارلاردى جيناپ الدى دا، قاشىپ كەتتى.
- قىمباتتىم، بارلىق جەمىستى ساتىپ جىبەردىڭ بە؟ - دەپ سۇرادى ماريا ەلويزا ءوز ۇلىنان. - اقىلدىم سول!
اناسىنا كۇلىپ قاراعان ەدۆين قالتاسىندا قانعا بويانعان پىشاعىن تىعىپ تۇردى.
3.
- قازىر سەنىڭ كىم ەكەنىڭدى كورەمىز، - پاكو ميىعىنان كۇلدى. - باس تەرىڭ سىپىرىلىپ تۇسكەنشە ۇرا بەرەمىن. قانداي ەكەنىڭدى كورەمىز، cabron.
ولار ورماندا ەدى، ەسپەدجونى تۇمان باسقان. تۇمان اراسىندا بوزبالالاردىڭ سۇلبالارى كورىنەدى. ءبارى دە پاكوعا باعىنادى. ەندى ءوز باسشىلارىنا ءتىل تيگىزگەن بالانى جازالاماق.
پاكونى ءبارى جىرتقىش رەتىندە تانيتىن، اۋلادا قانعا تولعان توبەلەستەردىڭ بارىنە قاتىسادى. تاڭعى اس ىشكەنىنەن كورى توبەلەسى ءجيى بولاتىن. ون جاستا بولسا دا، التىن تىستەرى جارقىراپ تۇر.
پاكو ەدۆينگە ءبىر قاراپ-اق ونىڭ باسقالاردان نە ايىرماشىلىعى بار ەكەنىن بايقادى. باكەنەنىڭ كوزىنەن قورقىنىش كورىنبەيدى، تەك جەك كورىنىش بار. پاكو ايناعا قاراپ تۇرعانداي بولدى. بۇل ەدۆين ءۇشىن ءولىم جازاسى ەدى، سەبەبى پاكو مەريدادا سونداي تاعى بىرەۋدىڭ بولعانىنا توزە المايدى.
ەدۆين قولىنا قۇتىسىن ۇستاپ، رەكۋەلادان ءدام تاتىپ الدى دا، پاكوعا ءبىرىنشى بولىپ جۇگىرگەن، ءبىراق بىردەن قۇلاتىپ تاستادى.
پاكو ەدۆيندى سوققىعا الدى. جارتى ساعاتتان سوڭ ەدۆيننىڭ كوزى شارداي بولىپ ءىسىپ كەتتى. اۋزىنان قان اعىپ، ءتوس قۋىسى سىنىپ كەتكەندەي بولدى. ءبىراق ورنىنان قايتا تۇرىپ، سوققىعا جاۋاپ قايتارۋعا تىرىستى.
كوپ ۇزاماي پاكو دا شارشادى. ەدۆيندى ۇرا بەرىپ، جۇدىرىعى ءىسىپ كەتتى. كوپ جىلدان بەرى پاكو ءبىرىنشى رەت قورقىپ كەتتى - دەنەسىنىڭ اۋىرعانىنان ەمەس، تاياق جەگەن بالانىڭ كوزىندەگى ازازىلدەن.
توبەلەس تىپ-تىنىش ءوتتى. ەشكىم جاپقان اۋزىن اشقان جوق. توبەلەسىپ جاتقان ەكى بالانىڭ دەمى عانا ەستىلەدى.
ەدۆين ەشتەڭە كورىپ تۇرعان جوق، تەك ىشكى سەزىمىمەن عانا قوزعالۋدا. كەزەكتى رەت ورنىنان اتىپ تۇرىپ، بار كۇشىن جينادى دا، قارسىلاسىنىڭ باسىنان سوققى جاسادى.
پاكو الدىمەن تىزەرلەپ، كەيىن باسپەن قۇلادى. ەدۆين ونىڭ باسىن ءسال كوتەردى دە، موينىنا پىشاقتى جاقىنداتتى. ولاردى قورشاپ تۇرعان بوزبالالار جەڭىمپازعا قول شاپالاقتادى، ال پاكو ءجاي عانا جىميىپ، «amigo» دەدى.
پاكو وزىنەن دە مىقتى قۇرداسىنىڭ پايدا بولعانىن ءتۇسىندى. ەندى ونىڭ بانداسىندا جاڭا باسشى بولادى.
4.
- مەن وسكار ورتەگامىن، وسى تاماشا زالدىڭ باپكەرى. مۇندا ناعىز مىقتىلار عانا جۇدىرىقتاسادى، - دەدى كەپەش كيگەن قارت كىسى. ەدۆين ونىڭ جانىنا كەلىپ، جاڭا فرانسيسكو رودريگەس بولعىسى كەلەتىنىن ايتقان. - ساعان بىردەن ايتايىن، سەن وليمپيادا چەمپيونى بولمايسىڭ، بوقمۇرىن. جوق، مىناعان قاراڭدارشى، قايداعى جوق سايقىمازاق كەلىپ، ۆەنەسۋەلانىڭ جاڭا ءۇمىتى بولامىن دەيدى. فرانسيسكو رودريگەس بولۋدىڭ نە ەكەنىن تۇسىنەسىڭ بە ءوزى؟ ساعان تۇگەل ءبىر ەل بولۋ قاجەت. كەدەي، شالاجانسار ۆەنەسۋەلالىقتاردىڭ ءۇمىتى بولۋىڭ كەرەك. ولار ءۇشىن فرانسيسكو رودريگەس - شىنايى ومىرمەن بايلانىستىرىپ تۇرعان جالعىز ءجىپ.
- ماعان كەز كەلگەن بوكسشىڭدى بەر، ءدال قازىر مۇرنىن بەت قىلامىن، - دەدى ەدۆين. ونى بۇرىن بۇلاي ماسقارالاماپ ەدى. - قالاساڭ، سەنى دە قان قاقساتامىن، cabron!
- تابىتقا بارۋعا ەرتە ساعان. جاتتىعۋ جاساپ كور. ەندى زالدا ءومىر سۇرەسىڭ، ءۇيىڭ الىس ەكەن. وتباسىڭا حات جازىپ، قانىشەردىڭ تۇتقىنىنا تۇسكەنىڭدى حابارلا.
ەدۆين باسىن يزەدى.
6.
- سەنى سۋپەرچەمپيون قىلۋدى قالايمىن، - دەدى وسكار ەدۆينگە. كەيدە سەنىڭ جەكپە-جەكتەرىڭە بارعىم كەلمەيدى. سەن ءۇشىن ەمەس، تارتىلعان ەتكە اينالاتىن قارسىلاستارىڭ ءۇشىن قورقىنىشتى. گونسالەس سەنىڭ جاسىڭدا ءالسىز بولعان. سەن مەنىڭ ەڭ سۇيىكتى شاكىرتتەرىمنىڭ ءبىرىسىڭ. تاماشا بوكسشىسىڭ. ءبىراق، ەدۆين، سەنى جەك كورەمىن. ادام رەتىندە ەشكىم ەمەسسىڭ. تەك بوكسقا عانا كوڭىل ءبولشى!
- كوپ سويلەمە، باپكەر! مەنى تەك بوكسقا عانا باۋلى. ادام رەتىندە ءوزىم دە قالىپتاسامىن، - دەدى ەدۆين ءسال كۇلىمدەپ.
7.
ەدۆين ءوزىن مۇلدەم قىزىقتىرماسا دا، سول قىزدىڭ قاسىندا كەلە جاتتى. ءبىراق ويى وتباسىن تەرەڭگە باتىرعان كەدەيلىكتە. قاسىنداعى قىز دا سول تاقىرىپتى ايتا باستاعاندا، ءسال جىميىپ كۇلدى.
- مىنە، ۇيىمە جەتتىك. مەنىڭ ءسىڭلىم دجەننيگە بىردەڭە دەشى. انە، ساعان قول بۇلعاپ تۇر، دەمەك، ۇناعانسىڭ.
ەدۆين باسىن كىشكەنتاي قىزعا قاراي بۇرعان، ونى كورىپ جۇرەگى دۇرسىلدەي جونەلدى. بالكوننان كىشكەنتاي بولسا دا، عاجايىپ قىز قاراپ تۇر.
- مىنا ءسوزىمدى ۇمىتپا، بۇل قىز ءبىر كۇنى مەنىڭ ايەلىم بولادى.
ءسويتىپ، از ۋاقىتتان سوڭ ەدۆين دجەننيگە كەلە باستادى. ەكەۋى بىرگە جۇرگەندە دجەننيفەر قاسىنداعى جىگىتتىڭ بۇزاقى ەكەنىن بايقايتىن، ءبىراق وعان ءمان بەرمەدى. ءتىپتى، ەدۆين ونى ۇيدەن قاشىپ كەتۋگە دە شاقىردى.
- كەشكى اسقا سيىر ەتىن ءپىسىرىپ بەرەسىڭ، - دەپ كۇلدى ول. - مەن اقشا تابامىن، ال سەن ءدامدى اس دايىندايسىڭ. جاقىندا ەكەۋىمىز مىندەتتى تۇردە ۇيلەنەمىز. ەڭ ادەمى كويلەكتەردى عانا كيەسىڭ.
دجەننيفەر كۇلىمدەپ، جولىنىڭ بولعانىن عانا ويلاي الدى.
8.
- ىرىكتەۋدەن ءوتىپ، سيدنەيدەگى وليمپياداعا بارامىن دەپ ۇمىتتەنەمىن - ەدۆيننىڭ داۋسىنان ارمانشىل ءۇن ەستىلدى. اپكەسىمەن سويلەسىپ وتىرعان. - فرانسيسكونىڭ جەتىستىگىن قايتالاعىم كەلەدى!
- ول تۋرالى ايتا بەرمەشى! - ياريما قارسى شىقتى. - ۇلى اتانۋ ويىڭدى جاۋلاپ العان. ءبىراق سەن مەنىڭ باۋىرىمسىڭ. سەنى جوعالتقىم كەلمەيدى.. . دجەنني دە سودان قورقادى.
ەدۆين قالتاسىنان شىلىمدى شىعارىپ، تۇتاندىرا باستادى:
- اشۋلانا بەرمەي، اسپانداعى جۇلدىزدى قاراشى. ءار ادامنىڭ ءوز تاڭداۋى بار: وسى جۇلدىزدار سەكىلدى جارقىراپ تۇرۋ نەمەسە جەرگە قۇلاپ، سول جاقتا ءشىرىپ جاتا بەرۋ.
- دەمەك، سەن ەكىنشى نۇسقانى تاڭدايدى ەكەنسىڭ، اقىماق، - دەدى دە، ياريما ۇيگە كىرىپ كەتتى.
9.
- ءاي، ۆالدەرمير. قازىر بۇكىل برازيليا سەنىڭ كىم ەكەنىڭدى كورەدى. سەن مەنىڭ سيدنەيگە بارار جولىمداعى كىشكەنتاي عانا كەدەرگىسىڭ.
قىزىل جەيدەدەگى جىگىت بۇل ءسوزدى ەستىپ، قولىمەن بەتىن جابۋمەن عانا بولدى. جەكپە-جەك بويى ەدۆيننىڭ ءار سوققىسى وعان گراناتا جارىلعانداي سەزىلدى. ءبىراق برازيليالىق بوكسشى باپكەرى بەرگەن نۇسقاۋدى تولىق ورىنداپ، قورعانىستا ءجۇردى دە، ءساتى كەلگەندە سوققى جاساپ قالدى. جەڭىس ءۇشىن سول دا جەتكىلىكتى ەدى. ەدۆين ءۇش راۋند بويى ۆالدەميردى قۋىپ ءجۇرىپ سابادى، ءبىراق كەزدەسۋدەن كەيىن رەفەري برازيليالىقتىڭ قولىن كوتەردى.
ەدۆين ءتىلىن شىعارىپ، جەڭىلىسكە ءبارىبىر ەكەنىن بايقاتقانداي بولدى. ءبىراق ىشىندە الاۋ جانىپ جاتقان. كۇمىس مەدالعا ءبىر رەت تە قاراعان جوق.
ول جەڭىلىپ قالدى... ءيا، بۇرىن دا جەڭىلگەن ەدى. ءبىراق بۇل مانسابىنداعى ەڭ ماڭىزدى جەكپە-جەگى بولاتىن.
كاراكاستىڭ اۋەجايىندا جەڭىلىستەن قۇسا بولىپ وتىرعان ەدۆين اۆتوبۋستىڭ باسقا جاققا بارا جاتقانىن بايقاعان جوق. ناتيجەسىندە اۆتوبۋسقا قارۋلى باندا كەلىپ، ەدۆيننىڭ قۇجاتىن، اقشاسى مەن مەدالىن الىپ كەتتى. كەيىن ورتالىق جانە وڭتۇستىك امەريكا چەمپيونى اتاعىنا تالاسىپ، مەكسيكالىق فرانسيسكو بوحادودان باسىم ءتۇستى. كەزدەسۋدەن كەيىن ول باپكەرى وسكاردىڭ قولىن الىپ، كاسىپقوي بوكسقا اۋىساتىنىن حابارلادى.
اۋەسقوي بوكستا ەدۆين 86 جەكپە-جەكتە جەڭىسكە جەتىپ (45 ءىن - نوكاۋتپەن)، 6 رەت جەڭىلىپ قالدى.
10.
- Prohibito! - اشۋلانعان ەدۆين لوس-اندجەلەستەگى بەس جۇلدىزدى قوناق ءۇيدىڭ ءنومىرىن باسىنا كوتەردى. - تىيىم سالىنعان! ماعان قالاي تىيىم سالىنادى؟ ەستەن تاندىڭدار ما؟ ول جاقتا اۋەسقويلار جۇمىس ىستەسە، Golden Boy Promotions-پەن نەگە كەلىسىم-شارتقا وتىردىم؟
بولمەنىڭ ءبىر بۇرىشىندا باپكەر دجو ەرناندەس پەن مەنەدجەر دجوەل دە لا حويا وتىردى. ۆەنەسۋەلالىق بوكسشى ءوز وتانىندا سەگىز جەكپە-جەكتى تاماشا ستيلدە جەڭىپ العان سوڭ ەدۆينمەن جۇمىس ىستەي باستاعان. كاسىپقوي بوكسقا شىڭعا تەز كوتەرىلە الاتىن پانچەر كەلدى.
وسى ەكەۋىنىڭ ايتۋىمەن ەدۆين لوس-اندجەلەستى باعىندىرۋعا كەلگەن ەدى. ءبىراق مەديتسينالىق تەكسەرىستەن ءوتۋ قاجەت ەكەن.
- ا ق ش- تا ونەر كورسەتە المايسىڭ دەگەنىڭ قالاي؟ - ەدۆين بولمەدەگى جيھازدى لاقتىرا باستادى. - قالاي بولعانى؟ مەن ون ەكى رەت قارسىلاستى ءبىرىنشى راۋندتا نوكاۋتپەن جەڭدىم. ءتۇسىنىپ تۇرسىڭدار ما؟ مەن ءۇشىن قارسىلاستار - بالاپان، مويىندارىن جۇلىپ الامىن. ءتىپتى، سەنىڭ ۇلىڭدى دا، دجوەل، قازىر-اق جەڭەمىن. ەريك مورالەستى ۇتقان مەنني پاكياونىڭ ءوزى ماعان گرۋشا سەكىلدى كورىندى. ەندى ماعان ا ق ش- تا رينگكە شىعا المايسىڭ دەگىلەرىڭ كەلە مە؟
- ەشتەڭە ىستەي المايمىز... - دەدى دجوەل. - ەدۆين، agarrado, سەن ءوزىمشىل ادامسىڭ! ن ۆ و- مەن كەلىسىم-شارتقا وتىرۋىڭ كەرەك ەدى. ءبىراق باسىڭا وتا جاسالعان. سىرقات ميىڭمەن سەنى ەشكىم رينگكە شىعارمايدى. باسىڭدا نە بالە بار ەكەنىن بىردەن ايتۋىڭ كەرەك ەدى. ءبىراق ساعان، اقىماق، ءبارى قىزىق ەمەس قوي...
قوناقتار كەتىپ قالعان سوڭ، ەدۆين ەسىرتكىسىن شىعارىپ، ءبىر دەمالىپ الماق بولدى. ءتىپتى، بولمەدەگى جيھازداردى دا سىندىرىپ تاستادى.
ءبىر-ەكى ساعاتتان سوڭ دجەنني مەن بوكسشىنىڭ ۇلى كىشى ەدۆين ەكەۋى كەلدى. نومىردەگى ويراندى كورگەن دجەنني ءۇن-ءتۇنسىز جيناي باستادى.
- قايدا ءجۇرسىڭ؟ - دجەنني ەدۆيننىڭ سۇراعىن ەستىمەگەندەي بولدى. اشۋلانعان بوكسشى ورنىنان اتىپ تۇرىپ، ايەلىن ۇستاپ الدى دا، ايقايلاپ سول سۇراقتى قايتالاي بەردى.
- جەتەر! قۇربىلارىممەن كەزدەستىم. مەنسىز نە ىستەگەنسىڭ؟ قۇدايدان قورىق، ەدۆين. كىشكەنتاي بالاڭ بار، جاۋاپكەرشىلىكتى ۇمىتپا. قىمباتتىم، ۆەنەسۋەلاعا قايتايىقشى. امەريكا ساعان جامان جاعىنان اسەر ەتىپ جاتقان سياقتى.
- مەنىڭ دە كەتكىم كەلەدى، سۇيىكتىم، - دەدى ەدۆين باسىلىپ. - ءبىزدىڭ chamito ەسپەدجونىڭ باۋرايىندا ءوسۋى كەرەك.
13.
ۆيسەنتە موسكەرا. El Loco. وسىنداي لاقاپ اتتارىن باعالايتىن پانامالىق ۆيسەنتە قارسىلاس ايامايتىن. قارسىلاسقا حۋك، دجەب، اپپەركوت دەگەننىڭ ءبارىن سىيلايدى. ءبىراق وعان تيەسىلى WBA بەلبەۋى ءۇشىن كەلگەن ۆەنەسۋەلالىق بوكسشىنىڭ مىقتى ەكەنىن بىلەدى. ءبىراق جەڭىلىس تۋرالى ويلاعان دا جوق. ول ەدۆيندى قولىنان ۇستاپ، توزاقتىڭ تورىنە اپارىپ تاستاعىسى كەلدى. ءبىراق قازىر اناياكا تۋرالى ويلاپ وتىر. جەڭە الماعان قارسىلاسى جالعىز سول - سۇلۋ كەلىنشەك.
ەدۆين دە دجەننيفەر تۋرالى ويلادى، ەكى بالاسىنىڭ اناسى. ۇلى مەن قىزىن الىپ ول دا پاناماعا كەلگەن. ءوز كۇيەۋىن El Loco-عا قارسى جەكپە-جەكتە قالاي قولداماسىن؟
ءبىرىنشى راۋند باستالدى - ەدۆين بىردەن العا ۇمتىلىپ، ۆيسەنتەگە سوققى جاۋدىردى. العاشقى راۋندتا شىداعان پانامالىق كەيىن ءوزىنىڭ بەكەرگە جۇلدىز سانالمايتىنىن كورسەتتى. ءۇشىنشى راۋندتا ۆيسەنتە باسىمدىقتى قولىنا الدى - ەدۆين رينگ قوجايىنىنان سوققى الىپ، نوكداۋنعا ءتۇستى. رەفەري ونعا دەيىن ساناي باستاعاندا، ۆەنەسۋەلالىق بوكسشى جەكپە-جەكتى جالعاستىرا الاتىنىن كورسەتتى. بۇل ونىڭ كاسىپقوي بوكستاعى جالعىز نوكداۋنى بولاتىن.
نامىستانعان ەدۆين العا ۇمتىلىپ، چەمپيوندى سوققىنىڭ استىنا الدى. ونىنشى راۋندتا ءبارى ءبىتتى. El Loco رينگ بۇرىشىندا وزىنە ءالى كەلە الماي وتىرعاندا ەدۆينگە جارتىلاي جەڭىل سالماقتا الەم چەمپيونى بەلبەۋىن تاعىپ جاتتى.
ەدۆين مەن دجەننيفەر ۆەنەسۋەلا تۋىن ورانىپ الىپ، قۇشاقتاسىپ تۇردى. ولاردى قورشاعان توپتىڭ ىشىندە جاپونيالىق پروموۋتەر اكيحيكو حوندا بولعان. ول ەدۆينگە تالاي كومەكتەسىپ، ءار ەلدەردە كوپتەگەن كەزدەسۋلەر ۇيىمداستىرعان. سوندا كەتكەن قارجىنىڭ ءبارىن جەكپە-جەكتەن سوڭ شىعارىپ الاتىن.
14.
ەدۆيننىڭ چەمپيوندىق اتاقتى ەنشىلەگەن كەزدەگى قۋانىشىنان ءبىر عانا وقيعا باسىپ وزا الادى. بۇل - دجەننيفەرمەن وتاۋ قۇرۋ. بۇگىن سول ءسات تە جەتتى. ەكەۋى ەل- ۆيحي سوبورىندا نەكەگە وتىردى.
- ەندى ءبىزدى تەك اجال عانا اجىراتا الادى، - دەدى ەدۆين ايەلىنە. ءبىراق دجەننيفەر بۇل سوزدەن قۋانىش ەمەس، قورقىنىش سەزدى.
15.
سول باقىتتى ساتتەن كوپ ۋاقىت وتكەن سوڭ ەدۆين دجەننيفەرگە قول كوتەردى. ءجاي عانا ۇرعان جوق، رينگتەگى قارسىلاسى سەكىلدى سابادى. مۇنداعى جالعىز سەبەپ - دجەنني باپكەر ادامسقا ەدۆيننىڭ پوليتسيامەن ماسەلەسى بولىپ جاتقانىن ايتىپ قويعان ەدى.
ايەلىن قاتتى قىزعاناتىن ەدۆين جاتتىعۋعا كەتىپ بارا جاتقاندا دجەننيدى ۇيىنە قۇلىپتاپ كەتەتىن. دجەننيدىڭ كوزىندە باياعى قۋانىش جوق، تەك قورقىنىش بار. كۇيەۋى جاتتىعۋدان كەلگەن سوڭ ءبارى قالىپتى بولسا ەكەن دەپ تىلەيدى.
ەدۆين كولۋمبيالىق بوكسشىمەن جۇدىرىقتاسۋعا دايىندالىپ جاتقان. جەكپە-جەك الدىندا ادامستى جۇمىستان شىعارىپ جىبەرىپ، روبەرت الكازاردى الدى.
وستيندە ول كولۋمبيالىق 39 جاستاعى پيتالۋامەن جۇدىرىقتاستى. ول ەلۋ جەكپە-جەگىنىڭ قىرىق ءبىرىن نوكاۋتپەن جەڭگەن. ازۋلى قارسىلاس. الايدا ەدۆين ونى ەكىنشى راۋندتىڭ باسىندا-اق نوكاۋتقا ءتۇسىردى.
16.
كەيىن كەزەكتى قارسىلاسىن تاياقتىڭ استىنا الىپ، كافەدە تويلاپ بولعان سوڭ، ۇيىنە قايتىپ كەلدى. ۇيدە دجەنني كۇتىپ العان جوق. ونى ىزدەپ بولمەسىنە كىرگىسى كەلگەن. ءبىراق ول جابىق تۇر ەكەن.
دجەننيگە ەسىكتى اش دەپ بۇيىرعانىمەن، ناتيجە بولمادى. كوڭىلدەسى تىعىلىپ تۇر دەپ ويلاسا كەرەك، بولمەنى ءبىر اقتارىپ شىقتى. ءسويتىپ، بۇرىشتا قورقىپ وتىرعان دجەننيدى ساباي باستادى...
ەدۆين ەسىن جيسا، اۋرۋحانادا وتىر ەكەن. ەسىندە تۇك تە جوق. بەتى قانعا بويالعان دجەنني كەرۋەتتە جاتىر.
- مۇنى كىم جاسادى؟ - دەپ ايقايلاپ جىبەردى. - سول كەمىستى كورسەتشى، مۇرنىن بەت قىلايىن.
دجەنني ۇندەمەي تۇردى دا، قولىمەن ەسىكتى كورسەتتى: «جوعال!».
- ءسىز تۇتقىندالدىڭىز، - دەدى دە پوليتسيا قىزمەتكەرى ونى الىپ كەتتى. ەدۆين تۇك تۇسىنگەن جوق. ءبىراق ۆەنەسۋەلا پرەزيدەنتىمەن جاقىن سويلەسەتىن ول تۇرمەدە كوپ وتىرعان جوق. دجەنني دە باسپالداقتان قۇلاپ كەتكەنىن ايتىپ، كۇيەۋىن اقتاپ الدى. ەڭ قورقىنىشتىسى - ەدۆين دجەننيدىڭ بۇل سوزىنە، راسىمەن دە، سەندى. ءسويتىپ، ءبىر اپتا پسيحياترلىق اۋرۋحانادا جاتىپ، بوستاندىققا شىقتى.
17.
ۆالەنسياعا بارا جاتقان ەدۆين مەن دجەنني جولدا Hotel Intercontinental-گە تۇراقتادى. ەدۆيندى بانديتتەر قۋىپ كەلە جاتقان. ۆالەنسياعا بارىپ، سول شارۋانى شەشىپ تاستاماق.
ەدۆيننىڭ پىكىرىنشە، بانديتتەر ونى ءولتىرىپ، دجەننيدى قۇلدىققا ساتىپ جىبەرمەك. سوندىقتان، ولاردى جاقىنداتپاۋ قاجەت. قوناق ۇيگە ورنالاسقان سوڭ تاعى دا ەسىرتكى پايدالانىپ الدى.
تۇنگە تامان بىرەۋ تەرەزەدەن كىرىپ، دجەننيدى الىپ بارا جاتقانداي كورىندى. جارىق ءسوندىرۋلى تۇر، سوندىقتان ءتۇرىن بايقاي المادى.
- ساعان دجەننيىمدى بەرمەيمىن، - دەپ تۇرا ۇمتىلدى دا، ونى بىرنەشە رەت پىشاقتاپ تاستادى. سول جەردە ەسىنەن تانىپ قالدى.
ەرتەسىنە ەسىن جيدى - باسى سىنىپ بارادى. اينالاسى قان ەكەنىن بايقادى - ءبىر ولىكتىڭ قاسىندا جاتىر. ولىكتىڭ كىم ەكەنىن كورگەن ول ءوز كوزىنە ءوزى سەنە العان جوق.
قوناق ءۇيدىڭ مەتردوتەلىنە بارىپ، قانعا ورانعان قولىن كورسەتتى: «مەن ءوز ايەلىمدى ءولتىرىپ تاستادىم!» ...
ەدۆين كامەرانىڭ ءبىر بۇرىشىندا وتىرىپ، بولعان جايتتى ويىنا الدى. وسى ۋاقىتقا دەيىن ءوزىن الداپ كەلىپتى. دجەننيدى اڭدىعان ەشقانداي بانديتتەر بولعان جوق، ەشقانداي كوڭىلدەس تە بولمادى.
تەك بىرەۋ عانا بولدى - ول ەدۆين ۆالەرونىڭ ءوزى. تاماشا ۇل مەن قىزدى سىيلاعان ايەلدىڭ ءومىرىن بۇزعان سول.
سوندىقتان ونىڭ دا ءومىرى اياقتالۋى ءتيىس. ءوز-وزىنە قول جۇمساعان ۇلى بوكسشىنىڭ ەڭ سوڭعى ويى بىرەۋ عانا بولدى - جۇماقتا دجەننيدى كورسە عوي، شىركىن!
prosports.kz
