شەشەنستاندا كوز جۇمعان قازاقستاندىقتىڭ ءولىمىن جاقىندارى جاڭالىقتاردان ءبىر-اق بىلگەن

استانا. قازاقپارات - شەشەنستاندا لاڭكەستەر قولىنان قازا تاپقان اقتوبەلىك اناتولي ەرمولايەۆتىڭ ءولىمى جايىندا ونىڭ وتباسى جاڭالىقتاردان ءبىر-اق بىلگەن.

ول اۋرۋحاناعا جەتپەستەن جولدا كوز جۇمعان دەپ حابارلايدى «ەۆريكا» باسىلىمىنا سىلتەمە جاساپ NUR. KZ.

24- ناۋرىز كۇنى تۇندە شەشەنستاننىڭ ناۋر اۋدانىندا رەسەي ۇلتتىق گۆارديا بولىمشەسىنە ءبىر توپ قارۋلانعاندار شابۋىل جاساعان. الايدا اسكەريلەر ولاردىڭ شابۋىلىن تويتارعان. دەگەنمەن، قازا بولعاندار دا بولدى. ءۇش اسكەري قىزمەتكەر كوز جۇمىپ، ۇشەۋى اۋىر جاراقات العانى تۋرالى حابارلانعان بولاتىن.

ولاردىڭ ىشىندە قازاقستان تۋمالارى دا بولعان. تورعاي وبلىسىنىڭ تۋماسى ەۆگەني ساۆينوۆ جاراقات السا، قاراعاندى تۋماسى دميتري گۋراد پەن اقتوبەلىك اناتولي ەرمولايەۆ قايتىس بولدى.

شەشەنستان اسكەري بولىمشەسىندەگى جايت تۋرالى كوپتەگەن ب ا ق اقپارات تاراتقان بولاتىن. اناتولي ەرمولايەۆتىڭ تۋىستارى ونىڭ ءولىمى تۋرالى جاڭالىقتاردان ءبىر-اق ەستىگەن.

«ەلدەر سەكىلدى ءبىز دە تەلەديدار ارقىلى بىلدىك. سوندا بىرگە اسكەري مىندەتىن وتەپ جۇرگەن ءىنىمىز الەكسەيمەن حابارلاستىق. ول بىزگە بولعان جايتتى تۇگەل ايتىپ بەردى.

شابۋىل كەزىندە قايتىس بولعان ەكەن. ول اۋرۋحاناعا بارار جولدا كوز جۇمعان ەكەن. ءومىرىنىڭ سوڭعى مينۋتىندا جانىندا ءىنىسى بولىپتى»، - دەيدى ونىڭ اپكەسى مارينا. اناتوليدىڭ ارتىندا 6 جاستاعى قىزى قالدى.