ساعىنتايەۆ ساپاربايەۆتى كلونداۋدى ۇسىندى

اقتوبە. قازاقپارات - اقتوبەدەگى مەملەكەتتىك-جەكە مەنشىك سەرىكتەستىك نەگىزىندە سالىنىپ جاتقان الەۋمەتتىك نىسانداردىڭ قۇرىلىسىمەن تانىسقان ۇكىمەت باسشىسى باقىتجان ساعىنتايەۆ اقتوبەلىكتەرگە العىسىن ءبىلدىردى.

ءتىپتى، بۇل ءىستىڭ ءبارىن جاساپ جاتقان وبلىس اكىمى بەردىبەك ساپاربايەۆ بولسا، وندا ونى كلونداۋ قاجەت دەپ ۇسىنىس ايتتى، دەپ حابارلايدى قازاقپارات ءتىلشىسى.

بۇگىن تۇستەن كەيىن ۇكىمەت باسشىسى باقىتجان ساعىنتايەۆ الەۋمەتتىك جاڭعىرتۋ باعدارلاماسىنىڭ ورىندالۋىنا ارنالعان جيىنعا قاتىستى.

كەزدەسۋگە اۋدان اكىمدەرى مەن دەنساۋلىق ساقتاۋ، ءبىلىم، سپورت، مادەنيەت سالاسىنىڭ باسشىلارى، قىزمەتكەرلەرى قاتىستى. كەشە كەشكىلىك اقتوبەگە كەلگەن ۇكىمەت باسشىسى قار جاۋىپ، بورانداتقان اقتوبەنىڭ جۇمىستارىنا ءدان ريزا ەكەنىن جاسىرمادى.

«كورگەن نارسەگە كوز تويىپ وتىر. وتكەن جىلى كەلگەن بولاتىنمىن، بيىل كوپ نارسە وزگەرگەن. ەلىمىزدەگى ەكونوميكانىڭ ءوسۋى، ەلباسى بەرگەن تاپسىرمالاردىڭ جەرگىلىكتى جەردە دۇرىس ورىندالۋى، حالىقتىڭ ءال-اۋقاتىنىڭ ارتۋى. وسى جۇمىستىڭ ءبارى اتقارىلىپ جاتىر. بەردىبەك ماشبەك ۇلىنا، اقتوبەلىكتەرگە ريزاشىلىعىمدى ايتامىن»، - دەدى ۇكىمەت باسشىسى باقىتجان ساعىنتايەۆ.

اقتوبەگە كەلگەن ۇكىمەت باسشىسى «سىمبات» جەكە مەكتەبىن، «كوزايىم» وفتالمولوگيالىق ورتالىعى، جەدەل جاردەم بەكەتىنىڭ قۇرىلىسىمەن تانىستى. ءبارى مەملەكەتتىك-جەكە مەنشىك سەرىكتەستىك نەگىزىندە ىسكە اسىرىلىپ جاتقان جوبا.

«اقتوبەنىڭ ەرەكشە اۋراسى ما، ول جاعىن بىلمەيمىن. ءبارى وسى جەرگە كەلەدى. ەلىمىزدىڭ باسقا وبلىستارى عانا ەمەس، شەتەلدىك ينۆەستورلار دا كەلەدى. جەدەل جاردەم بەكەتىنىڭ قۇرىلىسىنا باردىم. نەگە تەك اقتوبە وبلىسىندا مەملەكەتتىك-جەكە مەنشىك سەرىكتەستىك نەگىزىندە سالىنىپ جاتىر؟ بارلىق وبلىس ورتالىعىندا ءدال وسىنداي جەدەل جاردەم بەكەتى بار. نەگە ولار شەتەلدىك ينۆەستورلاردى قىزىقتىرمايدى؟ شەتەلدىكتەر تەك كەلىپ قانا قويماي، قۇرىلىس جۇرگىزىپ جاتىر. ولار ءوز قارجىسىنا جەدەل جاردەم بەكەتىن سالىپ جاتىر. ەگەر بۇل ءىستىڭ ءبارى بەردىبەك ماشبەك ۇلىنىڭ ارقىسىندا بولسا، وندا ونى كلونداۋ كەرەك»، - دەدى پرەمەر- مينيستر ب. ساعىنتايەۆ.

جيىن كەزىندە ۇكىمەت باسشىسى الەۋمەتتىك سالانى ەركىندىككە جىبەرۋ قاجەت ەكەنىن ايتتى. باسەكەلەستىك ورتادا بۇل سالانى دامىتۋعا بولادى. ءتىپتى، ۇلكەن سەنىم بار. ءسويتىپ، ءبىلىم، مەديتسينا، مادەنيەتكە مەملەكەت جاۋاپتى دەگەن قاساڭ ويدى بۇزۋعا بولادى.

«اقشا الىپ، بالاباقشا، اۋرۋحانا سالۋ كەرەك. بۇل جۇمىستىڭ ءبارىن تەك مەملەكەت اتقارىپ كەلدى. اقتوبەدەن كورىپ وتىرمىز، جەكەنىڭ ءوزى-اق سالىپ بەرەدى. ءتىپتى، مەملەكەتتەن ارزانعا، ساپاسىن جوعارى ەتىپ سالادى. ول ءۇشىن نە ىستەۋ كەرەك؟ كاسىپكەردىڭ جاعدايىن جاساۋ كەرەك. ينفراقۇرىلىمى قىمبات. ونى اپارىپ بەرۋ كەرەك. مەملەكەت ەسەبىنەن سالسا دا سول ينفراقۇرىلىم تارتىلادى عوي. جەرىن تەگىن بەرسە... ءبارىن جاساعاننان كەيىن قۇرىلىس وڭاي بولادى. كاسىپكەر مەملەكەتتىك تاپسىرىس ارقىلى پايدا تابادى»، - دەدى ب. ساعىنتايەۆ.

اۆتور: التىناي ساعىندىقوۆا