ميلاندا ارنايى جۇلدە العان قازاق فيلمى قىتاي، ا ق ش جانە ەۋروپا ەلدەرىندە كورسەتىلۋى مۇمكىن - فوتو
ناۋرىزدىڭ 19 ى مەن 26 سى ارالىعىندا وتكەن يتاليا كينويندۋسترياسىنداعى بىرەگەي جانە دارا فەستيۆال جارتى عاسىر بويىنا ءۇش قۇرلىقتىڭ مادەنيەتىن بايلانىستىرىپ كەلەدى.
23- ناۋرىزدا سپاتسيو وبەردان كينوتەاترىندا قازاقستاندىق «ماركو پولونىڭ جىبەك جولى» عىلىمي-كوپشىلىك فيلم يتالياندىق كورەرمەنگە ۇسىنىلدى.
بۇل جايىندا ق ر مادەنيەت جانە سپورت مينيسترلىگى قازاق عىلىمي-زەرتتەۋ مادەنيەت ينستيتۋتىنان ءمالىم ەتتى، دەپ حابارلايدى قازاقپارات.
فيلمنىڭ كورسەتىلىمىنە قازاقستاننىڭ يتالياداعى ەلشىلىگىنىڭ ءبىرىنشى حاتشىسى الماسبەك ءجۇمادىلوۆ، قازاق عىلىمي-زەرتتەۋ مادەنيەت ينستيتۋتىنىڭ باس ديرەكتورى اندرەي حازبۋلاتوۆ، كولۋمبيا ۋنيۆەرسيتەتىنىڭ پروفەسسورى رافيس ابازوۆ، «امبروزيانا» اكادەمياسى ازيا سىنىبىنىڭ عالىم حاتشىسى، پروفەسسور ەدواردو كانەتتا، MondoMostre حالىقارالىق جوباسىنىڭ جەتەكشىسى ماريا اززۋرا لا روزا، ميلاننىڭ مادەنيەت جونىندەگى كوميسسياسىنىڭ ءتوراعاسى پاولو بوسسي، پروديۋسەرلەر، كينو سىنشىلارى جانە ميلان قالاسىنىڭ تۇرعىندارى قاتىستى.
كورسەتىلىم الدىندا قازاق عىلىمي-زەرتتەۋ مادەنيەت ينستيتۋتىنىڭ باس ديرەكتورى اندرەي حازبۋلاتوۆ قازاقستان مادەنيەت جانە سپورت ءمينيسترى ارىستانبەك مۇحامەدي ۇلىنىڭ اتىنان قۇتتىقتاۋ ءسوز سويلەدى.
وندا: «ازيا، افريكا جانە لاتىن امەريكاسى فيلمدەرىنىڭ كينو فەستيۆالى - بۇل شىن مانىندە حالىقارالىق كينو يندۋسترياسى ءۇشىن ۇلكەن مادەني وقيعا. كينو فەستيۆال كوپتەگەن ەلدەر ءۇشىن قازىرگى زامانعى قوعامدى دامىتۋدىڭ اجىراماس اتريبۋتىنا، شىعارماشىلىق الىس-بەرىس ءۇشىن تاماشا الاڭعا اينالعان.
وندا اركىمگە دە ءوز ەلىنىڭ مادەنيەتىن كورسەتۋگە بىرەگەي مۇمكىنشىلىك بەرىلگەن. قازاقستان كينو فەستيۆالگە العاش رەت قاتىسىپ، ۇلى يتالياندىق ساياحاتشى تۋرالى «ماركو پولونىڭ جىبەك جولى» عىلىمي-كوپشىلىك فيلمىن ۇسىنىپ وتىر»، - دەلىنگەن.
سونىمەن قاتار حازبۋلاتوۆ فيلمنىڭ ءتۇسىرىلىم جۇمىستارى يتاليا، قىتاي جانە قازاقستان جەرىندە جۇرگىزىلگەندىگىن اتاپ ءوتتى. فيلمگە وتاندىق جانە حالىقارالىق عالىمدار، ساياحاتشىنىڭ ءومىر جولىن زەرتتەپ جۇرگەن ساراپشىلار قاتىسقان.
اعىمداعى جىلى فيلمدى قىتاي، ا ق ش جانە ەۋروپا ەلدەرىندە كورسەتۋ جوسپارلانىپ وتىر. ايتا كەتەيىك، «ماركو پولونىڭ جىبەك جولى» عىلىمي-كوپشىلىك فيلمى ايگىلى يتالياندىق كوپەس ماركو پولونىڭ ۇلى دالا ساياحاتتارى تۋرالى كىتابىنىڭ جەلىسى نەگىزىندە تۇسىرىلگەن.
فيلمدە ورتالىق ازيا مەن قازىرگى قازاقستان شەكاراسىنا ەرەكشە نازار اۋدارىلعان. رەجيسسەرلىك شەشىم عىلىمي پىكىرتالاس پەن تاريحي قايتا قۇرۋدى ۇشتاستىرۋدىڭ نەگىزىندە قۇرالعان.
اۆتور: مارلان جيەمباي
