تۇركيادا حاليفا التايدى ەسكە الۋ كەشى ءوتتى
شارا اياسىندا تۇلعانىڭ تۇركيادا جانە قازاقستاندا باسىلىپ شىققان كىتاپتارىنىڭ كورمەسى ۇيىمداستىرىلدى، دەپ حابارلايدى قازاقپارات. جيىنعا قازاقستان، تۇركيا، فرانسيا ەلدەرىنەن كەلگەن عالىمدار مەن قوعام قايراتكەرلەرى، پاريج، ىستانبۇل قالالارىندا تۇراتىن ءابدىسامات التاي، مەشكۇرە، شەكۇرە سەكىلدى باسقا دا ۇرپاقتارى، جاقىن تۋىستارى قاتىسىپ ءسوز سويلەدى.
حاليفا التايدىڭ ءومىر جولىنا، تۇركى دۇنيەسىندەگى ورنى مەن ەلگە ورالۋ تاريحىنا، شىعارماشىلىعى جانە ونى زەرتتەۋ ماسەلەلەرىنە قاتىستى الماتى قالاسىنان كەلگەن ۇلى ءابدىراحيم التاي، دۇنيەجۇزى قازاقتارى قاۋىمداستىعى حاتشىسى بوتاكوز ۋاتقان، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى «وتىرار كىتاپحاناسى» عىلىمي ورتالىعى ديرەكتورىنىڭ ورىنباسارى، تاريح عىلىمدارىنىڭ دوكتورى داناگۇل ماحات ءسوز سويلەدى.
ميمار سينان ۋنيۆەرسيتەتىنىڭ پروفەسسورى، تاريح عىلىمدارىنىڭ دوكتورى ءابدىۋاقاپ قارا دا حاليفا التاي جايلى ۇلكەن تەبىرەنىسپەن اڭگىمە ءوربىتتى. ونىڭ ايتۋىنشا، تۇركيا مادەنيەت مينيسترلىگىنىڭ قولداۋىمەن 1980-جىلى جارىق كورگەن حاليفا التايدىڭ «اتاجۇرتتان انادولىعا» اتتى ەڭبەگى ەرەكشە باعالاۋعا تۇرارلىق. وندا ءور التايدان قازىرگى تۇركياعا كوشكەن قايمانا قازاقتىڭ تاعدىر-تاۋقىمەتىنەن تىڭ دەرەكتەر كەلتىرگەن.
«الاش جۇرتى حاليفا التايمەن ماقتانامىز. تەك تۇركياداعى قازاقتار عانا ەمەس، بۇكىل تۇركى دۇنيەسى حاليفا التايمەن ماقتانادى. ويتكەنى ول قۇران كارىم سياقتى قاسيەتتى كىتابىن قازاق تىلىندە سويلەتكەن تۇلعا. سونىمەن قاتار، ونىڭ ەڭبەكتەرى حالىقارالىق كولەمدە ءماندى بولىپ وتىر. ونى زەرتتەگەن نەمىس عالىمدارى بار. مارك كيشنەر گيسسەن ۋنيۆەرسيتەتىنىڭ پروفەسسورى كەزىندە حاليفا التايدان ساباق العان، كومەك العان. ول كىسىنىڭ دە حاليفا التاي جايلى زەرتتەۋلەرى، ماقالالارى بار. ەندەشە حاليفا التاي بۇكىل تۇركى الەمىنە جانە ەۋروپاعا تانىمال ۇلى ازامات»، - دەدى پروفەسسور ءابدىۋاقاپ قارا.
ۇيىمداستىرۋشىلاردىڭ ايتۋىنشا، الدا عۇلامانىڭ مەرەيلى 100 جىلدىق مەرەيتويىنا ارنالعان حالىقارالىق كونفەرەنسيا استانا قالاسى مەن ەۋروپانىڭ ءبىرقاتار ەلدەرىندە وتكىزىلەدى دەپ جوسپارلانعان.
اۆتور: الماس مۇقاش ۇلى
