ۇكىمەت باسشىسىنا باتىس قازاقستان ماشينا جاساۋ كومپانياسىنىڭ ءوندىرىسى كورسەتىلدى

استانا. قازاقپارات - ق ر پرەمەر- ءمينيسترى باقىتجان ساعىنتايەۆ باتىس قازاقستان وبلىسىنا جۇمىس ساپارى بارىسىندا ءىرى جوعارى تەحنولوگيالىق ءوندىرىس كەشەنى - باتىس قازاقستان ماشينا جاساۋ كومپانياسىنىڭ جۇمىسىمەن تانىستى.

بۇل تۋرالى primeminister.kz حابارلادى.

نىساندى ارالاۋ بارىسىندا ب. ساعىنتايەۆقا گاز تۋربينالارى مەن مۇناي- گاز جابدىقتارىن وندىرەتىن سەحتى جوندەۋ جۇمىستارى جۇرگىزىلەتىن سەرۆيستىك ورتالىقتىڭ جۇمىسى تۋرالى باياندالدى.

 ماشينا جاساۋ كومپانياسى مەتالل قۇراستىرىلىمدارىن، تۇرعىن موبيلدى عيماراتتارىن، قۇرىلىس جابدىقتارىن جانە اۋىل شارۋاشىلىعى جابدىقتارىن شىعارۋمەن اينالىساتىن جوعارى تەحنولوگيالىق وندىرىستىك كەشەن. سونىمەن قاتار، زاۋىت ەلىمىزدىڭ قورعانىس ونەركاسىبىنىڭ ماڭىزدى قۇرامداس بولىگى بولىپ تابىلاتىن اسكەري جانە ازاماتتىق ماڭىزعا يە اۆياتسيالىق قوزعالتقىشتاردى جوندەۋ جۇمىستارىن دا جۇرگىزەدى.

 بۇدان وزگە، ق ر پرەزيدەنتىنىڭ تاپسىرماسىمەن كاسىپورىن بازاسىندا General Electric كومپانياسىمەن بىرلەسكەن تۇردە، اتالعان فيرما جابدىقتارىنىڭ جۇمىستارىن ورىنداۋعا قاۋقارلى قازاقستانداعى جالعىز رەسمي ورتالىق بولىپ تابىلاتىن گاز تۋربينالارىن جوندەيتىن سەرتيفيكاتتالعان سەرۆيستىك ورتالىق قۇرىلدى.

ق ر پرەمەر- ءمينيسترى باقىتجان ساعىنتايەۆ باتىس قازاقستان وبلىسىنا جۇمىس ساپارى اياسىندا ورال قالاسى اۋەجايىنىڭ جولاۋشىلار تەرمينالى مەن قاۋىپسىزدىك جۇيەسىنىڭ جۇمىسىمەن، سونىمەن قاتار اۋەجايدى قايتا جوندەۋ جۇمىستارىنىڭ جوسپارىمەن دە تانىستى.

ورال قالاسىنىڭ حالىقارالىق اۋەجايى 1972 -جىلى پايدالانۋعا بەرىلگەن. ايرو ۆوكزالدىڭ وتكىزۋ قابىلەتى ساعاتىنا 200 جولاۋشىنى، تەرمينالدىڭ وتكىزۋ قابىلەتى - ساعاتىنا 100 جولاۋشىنى قۇرايدى. اۋەجاي كەشەنى قاجەتتى ارنايى تەحنيكامەن جانە اۋە كەمەلەرىنە، جولاۋشىلارعا قىزمەت كورسەتۋ مەن ۇشىپ- قونۋ جولاعىن ءارى پەرروندى قولدانىستىق كۇيدە ساقتاۋ ءۇشىن قىزمەت كورسەتەتىن قىزمەتكەرلەرمەن قامتاماسىز ەتىلگەن.

 بۇعان دەيىن 2014-2015 -جىلدارى اۋەجايدىڭ جاساندى ۇشىپ- قونۋ جولاعىندا قايتا جوندەۋ جۇمىستارى جۇرگىزىلگەن. ول بارلىق تۇردەگى زاماناۋي اۋە كولىكتەرىن قابىلداۋعا قاجەتتى ساناتتى الۋعا مۇمكىندىك بەردى.

پرەمەر- مينيستر جۇمىس ساپارى بارىسىندا «بولاشاق ت» ج ش س سالىپ جاتقان تۇرعىن ۇيلەر قۇرىلىسىمەن، باسقا دا ءبىرقاتار كاسىپورىندار جانە «جاڭگىر حان» جەكە بالاباقشا جۇمىسىمەن تانىسپاق. سونداي- اق ب. ساعىنتايەۆ جاڭگىر حان اتىنداعى باتىس قازاقستان اگرارلىق- تەحنيكالىق ۋنيۆەرسيتەتىندە بولىپ، «نۇرلى جەر» باعدارلاماسىن جۇزەگە اسىرۋ ماسەلەلەرى بويىنشا كەڭەس وتكىزەدى.

اۆتور: ەلجان ەرالى