قازاقستاندىقتاردىڭ قۇقىعىن شەتەلدە قورعاۋ مۇمكىندىگى ارتادى
دەپ حابارلايدى قازاقپارات.
«قازاقستان ازاماتتارىنىڭ شەتەلدە جەكە وتباسىلىق جانە ىسكەرلىك مۇددەلەرىن قۇقىقتىق قورعاۋدى جەتىلدىرۋ بويىنشا ەلباسىنىڭ تاپسىرماسىن ىسكە اسىرۋ اياسىندا حالىقارالىق جەكە قۇقىق جونىندەگى گااگا كونفەرەنسياسىنىڭ جۇمىسىنا قاتىسۋ ۇسىنىلىپ وتىر. بۇگىندە بۇل ۇيىمعا 81 مەملەكەت جانە ەۋروپالىق وداق كىرەدى. اتالعان حالىقارالىق ۇيىمنىڭ ماقساتى - حالىقارالىق جەكە قۇقىق نورمالارىن بىرىزدەندىرۋ، وسى سالاداعى مەملەكەتتەردىڭ ىنتىماقتاستىعىنا جاردەم كورسەتۋ»، - دەدى ق ر ادىلەت ءمينيسترى مارات بەكەتايەۆ زاڭ جوباسى بويىنشا بايانداماسىندا.
ونىڭ سوزىنە قاراعاندا، گااگا كونفەرەنسياسىنىڭ اياسىندا 39 كونۆەنتسيا جاسالعان. ولار ازاماتتىق ءىس جۇرگىزۋ اياسىندا قۇقىقتىق كومەك كورسەتۋگە باعىتتالعان. قازاقستاننىڭ گااگا كونفەرەنتسياسىنداعى حالىقارالىق زاڭ شىعارۋشىلىق جۇمىسىنا تىكەلەي قاتىسۋى شەتەلدە ءبىزدىڭ ازاماتتاردىڭ قۇقىقتارىنىڭ نەعۇرلىم ءتيىمدى قورعالۋىن قامتاماسىز ەتەدى.
«ۇيىمعا مۇشەلىك گااگا كونفەرەنتسياسىنىڭ ساياساتىن بەلگىلەيتىن ەكى كەڭەستىڭ جۇمىسىنا قاتىسۋعا مۇمكىندىك بەرەدى. بۇل تۇرعىدا جالپى ىستەر جانە ساياسات بويىنشا كەڭەس پەن ديپلوماتيالىق وكىلدەر كەڭەسى قامتىلىپ وتىر. كەڭەس مۇشەلەرىنىڭ شەشىمدەرى كونسەنسۋس نەگىزىندە قابىلدانادى، ياعني بارلىق قاتىسۋشى مەملەكەتتەر ۇستانىمىن ەسەپكە الۋعا مۇمكىندىك بەرىلەدى. بۇل ءبىزدىڭ مەملەكەت ءۇشىن جاڭا حالىقارالىق شارتتاردى جاساسۋعا، ۇيىمنىڭ باسقا مۇشەلەرىنىڭ جەكە ازاماتتىق قۇقىق سالاسىندا ىنتىماقتاستىقتى دامىتۋعا، حالىقارالىق دەڭگەيدە ءوز مۇددەلەرىن قورعاۋعا مۇمكىندىك بەرەدى»، - دەدى مينيستر.
ءسوز سوڭىندا ول گااگا كونفەرەنتسياسىنىڭ جارعىسىندا قازاقستان كونستيتۋتسياسىنا قايشى كەلەتىن نورمالار جوق ەكەنىن، ۇيىمعا قوسىلۋ جىل سايىنعى مۇشەلىك جارنانى (6850 ەۋرو) تولەۋدى كوزدەيتىنىن اتاپ ءوتتى. بۇل شىعىستار ق ر سىرتقى ىستەر مينيسترلىگىنىڭ ءتيىستى بيۋدجەتتىك باعدارلاماسىندا كوزدەلگەن.
اۆتور: رۋسلان عابباسوۆ
