07:12, 29 - ناۋرىز 2017 | GMT +5
گەرمانيادا الەمدەگى ەڭ ۇلكەن التىن مونەتا ۇرلاندى
استانا. قازاقپارات - بەرليندەگى مۇراجايلاردىڭ بىرىنە ۇرى ءتۇسىپ، الەمدەگى ەڭ ۇلكەن التىن مونەتا قولدى بولدى، دەپ حابارلايدى 24.kz.
بۇل ساف التىننان قۇيىلعان جادىگەر. ول الەمدەگى ەڭ قۇندى ۆاليۋتا رەتىندە گيننەستىڭ رەكوردتار كىتابىنا ەنگەن. الەم بويىنشا بۇل جادىگەردىڭ تەك بەس داناسى عانا بار. سالماعى 100 ك گ، نومينالدىڭ قۇنى 1 ميلليون كانادا دوللارى بولعانمەن، زەرگەرلەر ونى 4 ميلليون ەۋروعا باعالاپ وتىر. ۇرىنىڭ اسا قىمبات ءارى اۋىر زاتتى قالاي الىپ شىققانى ازىرگە بەلگىسىز.
«ۇرلىق تاڭەرتەڭ بولعان. قىلمىسكەرلەر ساتى ارقىلى تەرەزەدەن مۇراجاي ىشىنە كىرىپ، مونەتالار كورمەسىنە وتكەن. ولار تەك وسى مونەتانى الۋدى كوزدەگەن. مونەتانى قورشاپ تۇرعان قالىڭ اينەك ۇرىلارعا ەش كەدەرگى بولا الماعان»، - دەيدى بەرلين قالاسى پوليتسياسىنىڭ وكىلى ۆينفريد ۆەنسەل.
