باس پروكۋرور قازاقستانداعى ۇرىلارعا قارسى «سوعىس» اشتى

استانا. قازاقپارات - باس پروكۋرور جاقىپ اسانوۆ زاڭدىلىقتى، قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ وتىرىسىندا قازاقستانداعى ۇرىلارعا «سوعىس» اشتى،

دەپ حابارلايدى قازاقپارات.

 «ۇرىلار ءبىزدى، ياعني، قۇقىق قورعاۋ ورگاندارىن مازاق قىلىپ ءجۇر. مىسالى، اتىراۋداعى تۇرعىن ۇيلەردىڭ بىرىندە 2016 -جىلى 21 رەت ۇرلىق تىركەلىپتى. 21 رەت! ال، سول ءۇيدىڭ ءبىرىنشى قاباتىندا پوليتسيا بولىمشەسى ورنالاسقان ەكەن. بۇل مازاق ەمەي نەمەنە؟ بۇلار ءبىزدى باسىنايىن دەدى. ولارعا قارسى اشىق سوعىس جاريالاۋ كەرەك»، - دەدى جاقىپ اسانوۆ.

باس پروكۋرور سونداي- اق قۇقىق قورعاۋشىلار ۇرلىقپەن كۇرەستە قازىر ماقساتسىز جۇمىس ىستەپ وتىرعانىنا توقتالدى.

 «سىزدەردىڭ (قۇقىق قورعاۋشىلاردىڭ) باياندامالارىڭىزدا ماقسات جوق. ماقسات بولماسا، جەلكەنسىز قايىقتاي، جەل قاي جاققا سوقسا، سول جاققا كەتە بەرەمىز. ءبىز ءۇش جىل ىشىندە ۇرلىق فاكتىسىن بەلگىلى ءبىر كولەمدە ازايتامىز دەگەن ماقساتتى ۇستانايىق»، - دەدى اسانوۆ.

اۆتور: كەنجەكەي توقتامۇرات قىزى