نەسيەگە بەلشەسىنەن باتقان جۇلدىزدار كىمدەر؟ - فوتو

استانا. قازاقپارات - بۇگىندە نەسيە الىپ، بار تاپقان-تايانعانىن ونى تولەۋگە جۇمسايتىندار از ەمەس.

حالىقتىڭ كوبى نەسيەنى توي جاساۋ، ءۇي الۋ، كولىك، قۇرىلىس جۇمىستارى سەكىلدى دۇنيەلەر ءۇشىن الىپ، قارىزعا بەلشەسىنەن باتىپ جاتادى. ماشاقاتى دا، پايىزى دا كوپ نەسيە بۇگىندە ەكىنىڭ ءبىرىنىڭ باسىندا بار. ال وتاندىق جۇلدىزدار نەسيەنىڭ كومەگىنە جۇگىنە مە؟

Muzzone ارناسى نەسيەسى بار جۇلدىزداردى نازارعا ۇسىنادى.

ءومىرقۇل اينيازوۆ

ءانشىنىڭ ايتۋىنشا، نەسيەنى ورنىمەن، اقىلمەن العاندا تۇرعان ەشنارسە جوق.

«نەسيە الۋعا قارسىلىعىم جوق. باسىمدا نەسيەم بار»، - دەگەن ءانشى ءوزىنىڭ نەسيەنىڭ كومەگىنە جۇگىنگەنىن جاسىرمادى.

ول الماتىداعى ەكى بولمەلى پاتەردى جارتىلاي نەسيەگە العان. ونىڭ جارتىسىن تولەگەنىمەن، بۇگىندە تولەنبەگەن بولىگى دە بار ەكەنىن تىلگە تيەك ەتتى ول.

ارمان قوڭىربايەۆ

ءانشى ارمان قوڭىربايەۆ تا نەسيە الىپ كورگەندەردىڭ قاتارىندا بولىپ شىقتى. ناقتى قانشا سوما العانىن ايتپاعان ءانشى، نەگىزىندە، نەسيەنى الۋعا قارسى ەكەن.

«ول مۇسىلماندىققا جات. پايىز دەگەن نارسەگە شاريعات بويىنشا تىيىم سالىنادى»، - دەدى ول.

اشا ماتاي

ارمان قوڭىربايەۆتىڭ جارى اشا ماتاي بولسا ومىرىندە نەسيە الىپ كورمەگەن «باقىتتى» جاندار قاتارىندا ەكەنىن تىلگە تيەك ەتتى.

ينديرا ەلەمەس

ينديرا ەلەمەس العاشقى نەسيەسىن ستۋدەنت كەزىندە العان. ءوزى قاتارلاس جاستار سەكىلدى ول IPhone 5 ۇيالى تەلەفونىن نەسيەگە العان. الايدا قىزىنىڭ ارەكەتىن ءبىلىپ قويعان اناسى، وعان رەنجىپ، ءانشى نەسيەسىن جاۋىپ تاستاعانىن ايتادى.