ديماش جايلى ەرتەگى
ەرتەدە ءبىر حانزادا ءومىر ءسۇرىپتى. ول ءان ايتۋدى ەرەكشە ءسۇيىپتى. ونىڭ داۋىسىن ەستىگەن پەندە، جان- جانۋار، كۇللى تىرشىلىك يەسى "بۇل نە قۇدىرەت؟ " دەپ تاڭىرقاپ، قاراپ قالاتىن. حانزادا ەرەكشە سىمباتتى ەدى. كوزى ۇلكەن، بويى ۇزىن، تۇلا- بويى سىمداي تارتىلعان جاس جىگىت قىز- قىرقىننىڭ اياۋلى ارمانىنا اينالدى. "بۇل حانزادانىڭ حانشايىمى كىم بولار ەكەن؟ " دەگەن سۇراق ءار بويجەتكەننىڭ جۇرەگىن سەلت ەتكىزەتىن. حانزادا كوپ ادام بىلە بەرمەيتىن شاعىن پاتشالىقتا عۇمىر كەشتى. پاتشالىقتا ادامدار ەكى تىلدە سويلەيتىن، ال اتادان بالاعا مۇرا بولعان انا ءتىلىن كوبىنە تەك قاراپايىم شارۋا ادامى عانا قولداناتىن. حانزادانىڭ بالا كەزدەن بەرى كەلە جاتقان ۇلكەن ارمانى بار ەدى. ول وسى ءبىر قاراپايىم حالقىمنىڭ قازىناسىن ءان ارقىلى الەم نازارىنا ۇسىنىپ، انا ءتىلىمنىڭ مارتەبەسىن وسىرۋگە ءبىر تامشى ۇلەس قوسسام دەپ ارماندايتىن. ءوزى ءومىر سۇرگەن پاتشالىقتا بارلىق سالا ەندى- ەندى دامي باستادى، سونىڭ ىشىندە ونەر سالاسى دا اياقتان تۇرۋ كەزەڭىن باستان وتكەرىپ جاتقان. حانزادا اكە- شەشەسىنىڭ ەڭبەكقورلىعىنىڭ ارقاسىندا تۇرمىستان ەش قيىندىق كورمەي، جاتسا دا، تۇرسا دا، ءوز ەلىن الەمگە تانىتۋدى ارماندايتىن بولدى.
وسى جولدا تابيعات بەرگەن سيقىرلى داۋىسىن سوزىپ، ءتۇرلى جاتتىعۋ جاساۋدان جالىقپاي، ءوز- ءوزىن دامىتا بەردى. ول ءوزىنىڭ جۇلدىزدى ءساتىن اسىعا كۇتتى. ءبىراق كەيبىر ادامدار حانزادانىڭ سيقىرلى داۋىسىن مويىنداعىسى كەلمەي، جىگىتتىڭ بولاشاعىنا كۇمانمەن قارادى. حانزادا بۇنداي كەزدەرى قاتتى كۇيىنىپ كەتەتىن. "سيقىرلى داۋىس باسقا ەمەس، تەك ماعان بەرىلدى، ەندەشە مويىماۋىم كەرەك" دەپ ءوز- ءوزىن العا سۇيرەيتىن. كۇندەردىڭ ءبىر كۇنىندە 17 ميلليون تۇرعىنى بار ەلدە تۇراتىن حانزادا 1 ميللياردتان استام ادام ءومىر سۇرەتىن پاتشالىققا بارىپ، سيقىرلى داۋىسىن پاش ەتپەك بولادى. حانزادا بۇل ساپارعا وزىمەن بىرگە جان دوسىن ەرتىپ اپارادى. حانزادانىڭ ماقساتى ورىندالىپ، ول 1 ميلليارد ادامنىڭ الدىندا ءوز انا تىلىندە ءان شىرقاپ، ءوز ەلىنىڭ مۋزىكالىق اسپابىمەن كۇي ورىندايدى. جىگىتتىڭ سيقىرلى داۋىسىن ەستىگەن پاتشالىق تۇرعىندارى قاتتى تاڭىرقايدى. "بۇل نە عالامات؟ !"، "الەمدە وسىنداي دا ەل بار ەكەن- اۋ"، "قانداي عاجايىپ داۋىس، قانداي سۇلۋ ءتىل، قانداي سىمباتتى جىگىت!" دەسكەن حالىق ورىندارىنان تۇرىپ جىگىتكە قوشەمەت كورسەتىپ، كوزدەرىنە جاس الادى. وسىلايشا حانزادا 1 ميلليارد ەلدىڭ سۇيىكتى جۇلدىزىنا اينالادى. 1 ميلليارد حالىق حانزادانىڭ تۋعان ەلىنە، تۋعان تىلىنە ەرەكشە قۇرمەت ءبىلدىردى. ويتكەنى بۇنداي ادامدى دۇنيەگە اكەلگەن حالىق قاسيەتتى بولسا كەرەك.. . ءبىر كۇنى حانزادا تاعى دا ساحناعا شىعىپ، ءان ايتپاق بولادى. ءبىراق تاڭەرتەڭ تۇرسا، سيقىرلى داۋىسى جوعالىپ كەتىپتى! داۋىسى شىقپاي، تەك سىبىرلاي الاتىن حالگە ءتۇستى. حانزادا ءوزىن كۇتىپ وتىرعان ميلليارد حالىقتىڭ الدىنا قالاي شىعاتىنىن ويلاپ، قاتتى ۋايىمدايدى. "سيقىرلى داۋىسىمدى قايتارىپ بەرە گور" دەپ تاڭىرگە جالبارىنادى. وسى ارادا حالىق تا حانزادانىڭ داۋىستان ايىرىلعانىن ءبىلىپ قالىپ، قاتتى قاپالانادى. ونىڭ داۋىسىن ۇيىقتاپ جاتقان جەرىنەن مىستان كەمپىر ۇرلاپ كەتكەن ەدى. حالىق مىستان كەمپىرگە بارىپ: "سۇيىكتى حانزادامىزدىڭ سيقىرلى داۋىسىن وزىنە قايتار" دەپ تالاپ ەتەدى. مىستان كەمپىر وسىنشاما حالىقتى كورىپ قاتتى قورقىپ، حانزاداعا داۋىسىن قايتارادى. مىنە، سول كۇننەن باستاپ حانزادا قايتادان سيقىرلى داۋىسىمەن كۇللى الەمدى تەربەتىپ كەلەدى.. .
Massaget.kz
