ماڭعىستاۋلىق زەرگەر ەكسپوعا دايىندالۋدا - فوتو
شەبەر كورمەگە ماڭعىستاۋدىڭ ستيلىندە جاسالعان ساقينا، وڭىرجيەك، القا، سىرعا، بىلەزىك الىپ بارماق.
ساعيدوللا ورازوۆ مەكتەپ وقىپ جۇرگەن كەزىنەن سۋرەت ونەرىنە جاقىن بولىپ وسكەن. بوس ۋاقىتىندا قولىنا كارانداشىن الىپ، سۋرەت سالاتىن. ءىنىسىنىڭ بويىنداعى سۋرەتكە، زەرگەرلىك ونەرگە قاجەتتى قاسيەتتەرىن بايقاعان اعاسى ماماندىق تاڭدايتىن ۋاقىتتا اقىلىن ايتىپ، كەڭەسىن بەرەدى.
اعاسى تۇگەلدىڭ ايتۋىمەن ساعيدوللا اباي اتىنداعى مەملەكەتتىك ۋنيۆەرسيتتەتتىڭ كوركەم سۋرەت جانە قولدانبالى ونەر فاكۋلتەتىنە قۇجات تاپسىرادى. تاجىريبەلى مامانداردان ءدارىس الىپ، شەبەرلىگىن شىڭدايدى. ۋاقىتىنىڭ كوبىن شەبەرحانادا وتكىزىپ، ىزدەنەدى.
«العاشقى دۇنيەمدى دە الماتىدا وقىپ جۇرگەن كەزىمدە جاسادىم. 1990-1992-جىلدارى كۇمىس تاپشى كەزدەر عوي. ساقينا جاسادىم. جاساعان ساقينام ۇناماي قالىپ، ونى 10 رەت وزگەرتتىم. ءبارىبىر كوڭىلىمنەن شىقپادى. كەيىن ءبىر اپتا وتىرىپ، تاستارمەن كومكەرىلگەن توسپالى، ادەمى بىلەزىك جاساپ شىعاردىم. ەڭ العاشقى دۇنيەلەرىم سولار بولعاندىقتان جانىما وتە جاقىن. جالپى ارعى اتا-بابالارىمىز دا اعاشتان بەسىك جاساپ، ءتۇيىن تۇيگەن. زەرگەرلىك ونەر سول كىسىلەردەن دارىعان قاسيەت»، - دەيدى ساعيدوللا ورازوۆ.
شەبەر تاپسىرىسقا قاراعاندا ءوز قيالىنان تۋعان دۇنيەنى جاساعاندى ۇناتادى. زەرگەرلەردىڭ اسا كوپ جاسايتىنى-ايەلدەردىڭ اشەكەي بۇيىمدارى.
«ءبىر ساقينانى كوبىنەسە ءبىر ساعاتتا دايىندايمىن. ءار نارسە ساتىنە قاراي جاسالادى. ءبىر كۇندە 5-6 ادامنىڭ تاپسىرىسىن دا جاساپ شىعاراتىن ۋاقىتتار بولادى. امالدا، قازاقتىڭ جاڭا جىلى ناۋرىز مەرەكەسىنىڭ قارساڭىندا تاپسىرىستار كوپ تۇسەدى. كەلىن ءتۇسىرۋ، قىز ۇزاتۋ مەرەكەلەرىندە دە تاپسىرىستار كوبەيەدى. كەيبىر ادامدار دايىن سىزبا اكەلىپ جاتادى، الايدا ءوز قيالىنان تۋعان دۇنيە ءساتتى شىعادى. مەن وزگەرتىپ ۇسىنعان كەزدەرىمدە تاپسىرىس بەرۋشىلەر دە جاقسى قابىلداپ جاتادى. ماڭعىستاۋ وڭىرىنەن بولەك، تاپسىرىس بەرۋگە وڭتۇستىك قازاقستان، استانا، الماتى، ورال وبلىستارىنان دا قوناقتارى دا كوپ كەلەدى»، - دەيدى زەرگەر.
ساعيدوللا ورازوۆتىڭ قولىنان شىققان دۇنيەلەر ءار جىلدارى ەلىمىزدىڭ باس قالالارىندا وتكەن كورمەلەرگە قاتىسىپ، كوپشىلىكتىڭ جوعارى باعاسىن الدى. ەندىگى ارمانى- پاريجدىڭ تورىنەن قازاقتىڭ ادەمى بۇيىمدارىنان جاساقتالعان كورمە وتكىزۋ. جانە وبلىس ورتالىعىنان ارنايى زەرگەرلىك مەكتەبىن اشىپ، شاكىرت تاربيەلەۋ.
«الدىمەن ەلوردامىز استانا قالاسىندا وتەتىن «ەكسپو-2017» حالىقارالىق كورمەسىنە قاتىسىپ، تاجىريبيە جيناقتاپ العىم كەلەدى. حالىقارالىق كورمەگە جان-جاقتان كەلەتىن قوناقتار قازاقتىڭ سالت-داستۇرىنەن، ادەپ-عۇرىپىنان ازعانتاي بولسا دا تۇسىنىك بولۋ ءۇشىن ەستەلىككە، سىيعا زات ساتىپ الادى عوي. سوندىقتان دا كورمەگە اپارۋعا قولجەتىمدى باعاعا ساتىلاتىن ساقينا، بىلەزىك، القا، وڭىرجيەك جاساپ جاتىرمىن. جۇزىكتەردىڭ باعاسى-10 مىڭ تەڭگەدەن باستالادى»، - دەدى مامان.
زەرگەردىڭ جەتىستىكتەرىنە توقتالار بولسا، 2004-جىلى 8-حالىقارالىق «شابىت» شىعارماشىل جاستار فەستيۆالى اياسىندا وتكىزىلگەن وبلىستىق بايقاۋدا «ساندەمە قولونەر» نوميناتسياسى بويىنشا 1-ورىندى يەلەنگەن. 2008-جىلى «ماڭعىستاۋ جۇلدىزدارى» فەستيۆالىندە «فەستيۆالدىڭ جارىق جۇلدىزدارى» ەرەكشە ديپلومىمەن ماراپاتتالعان.
2011-جىلى وتكەن «ۇزدىك كاسىپكەر» بايقاۋىندا «حالىقتىق قولونەر سالاسىنداعى ۇزدىك كاسىپكەر» نوميناتسياسى بويىنشا جەڭىمپاز اتانسا، سول جىلى «كاسپي دوستىق تەڭىزى» فەستيۆالىندە «ەڭ ۇزدىك ساندىك - قولدانبالى قولونەرى تۋىندىلارى» سايىسىنىڭ «حالىقتىق ءداستۇردى ساقتاعان ۇزدىك تۋىندى» نوميناتسياسى بويىنشا 1-ورىندى قانجىعالاعان. 2013-جىلى 5-«شەبەر-2013» قازاقستان قولونەرشىلەرى بايقاۋىنىڭ جەڭىمپازى.
