ءتورت ەلدىڭ دزيۋدوشىلارى قازاقستاندىقتارمەن وقۋ-جاتتىعۋ جيىنىن وتكىزۋدە

استانا. قازاقپارات - شىمكەنت قالاسىنىڭ «بيك» سپورت كەشەنىندە دزيۋدودان ەرلەر قۇراماسىنا ارنالعان حالىقارالىق وقۋ-جاتتىعۋ جيىنى وتۋدە، دەپ حابارلايدى قازاقپارات ءتىلشىسى.

حالىقارالىق وقۋ-جاتتىعۋ جيىنىنا قازاقستان سپورتشىلارىنان بولەك، 4 ەلدىڭ دزيۋدوشىلارى قاتىسۋدا.

اتاپ ايتساق، ازەربايجاننان - 21، وزبەكستاننان - 27، قىرعىزستاننان - 18 جانە بەلگيادان 4 سپورتشى «بيك» بازاسىندا بىلىكتىلىكتەرىن شىڭداۋدا.

قازاقستان دزيۋدو فەدەراتسياسى ۇيىمداستىرعان حالىقارالىق وقۋ-جاتتىعۋ جيىنى 27- ناۋرىزعا دەيىن جالعاسادى.

ەستەرىڭىزگە سالا كەتسەك، ۇلتتىق قۇراما وسى وقۋ-جاتتىعۋ جيىنىنان كەيىن تبليسيدە وتەتىن گران-پري تۋرنيرىنە قاتىسادى.

اۆتور: كۇنسۇلتان وتارباي