قۇرىلىسى اياقتالماعان ءۇيىن اراق شىعاراتىن قۇپيا ورىنعا اينالدىرعان

استانا. قازاقپارات - ەكىباستۇزدا ءتارتىپ ساقشىلارى قۇرىلىسى اياقتالماعان ۇيدەن الكوگولدىك ىشىمدىك قۇيىلعان ءۇش مىڭعا جۋىق شولمەك تاپتى.

ونىڭ 279 بوتەلكەسىندە اكسيزدىك ماركالار بولماعان، دەپ حابارلايدى pavlodarnews.kz.

وبلىستىق ءى ءى د باسپا ءسوز قىزمەتىنىڭ مالىمەتىنشە، زاڭسىز تاۋار تاركىلەنگەن ءۇي 56 جاستاعى تۇرعىنعا تيەسىلى.

بۇدان باسقا، قۇرىلىس ورنىنان قۇيعىش، مايتۇتىك، قابىقشا، سۋ قايناتاتىن قۇرال تابىلعان. زاڭسىز كاسىپكەرلىكپەن اينالىسۋ فاكتىسى بويىنشا اتالعان ەر ادامعا قاتىستى ق ر ق ك- ءنىڭ 214-بابىنا سايكەس سوتقا دەيىنگى تەرگەۋ جۇرگىزىلۋدە.

«ناۋرىز مەرەكەسى قارساڭىندا وبلىس تۇرعىنى تىزگىندەگەن «فولتسۆاگەن» اۆتوكولىگىنەن ءتيىستى قۇجاتتارى جوق، قولدان جاسالعان 200 شولمەك تابىلدى.

سونىمەن قاتار، «اقجول» باقىلاۋ پۋنكتىندە «لادا 2121» كولىگىمەن قۇجاتتارسىز 40 شولمەك سپيرت (200 ليتر) تاسىعان 53 جاستاعى پاۆلودارلىق ۇستالدى. ولاردىڭ بارلىعى اكىمشىلىك جاۋاپكەرشىلىككە تارتىلدى»، - دەدى باسپا ءسوز قىزمەتىندە.

ايتا كەتەيىك، وبلىس اۋماعىندا الكوگولدىك ءونىمدى ساتاتىن 106 دۇكەن تاۋلىك بويى جۇمىس ىستەيدى. سپيرتتىك ىشىمدىكتەردى زاڭسىز ساۋدالاۋ بويىنشا 83 ساتۋشى اكىمشىلىك جاۋاپكەرلىككە تارتىلعان.