الماتى وبلىسىندا كولىگىمەن ادام قاعىپ، ءىزىن سۋىتقان جۇرگىزۋشى ۇستالدى

تالدىقورعان. قازاقپارات - الماتى وبلىسىندا ايەل ادامدى كولىگىمەن قاعىپ، ارتىنشا ءىزىن سۋىتقان جۇرگىزۋشى ۇستالدى.

جاياۋ جۇرگىنشى وقيعا ورنىندا كوز جۇمدى، دەپ حابارلايدى قازاقپارات ءتىلشىسى.

الماتى وبلىستىق ءى ءى د باسپا ءسوز قىزمەتىنىڭ مالىمەتىنە سايكەس، جەرگىلىكتى جەدەل ىزدەستىرۋ ءبولىمىنىڭ پوليتسەيلەرى 57 جاستاعى ايەلدى قاققان شەتەل كولىگىنىڭ جۇرگىزۋشىسىن انىقتاپ، ۇستادى.

وقيعا 21- ناۋرىز كۇنى تۇندە «الماتى - وسكەمەن» تاس جولىنىڭ ىلە اۋدانىنا قاراستى بولىگىندە ورىن الدى.

57 جاستاعى شىعىس قازاقستان وبلىسىنىڭ تۇرعىنى وقيعا ورنىندا كوز جۇمدى. «تولىقتاي تەكسەرە كەلە، ول جەردەن كولىك بامپەرىنىڭ سىنىقتارى تابىلدى. وسى ايعاق زات ماشينانىڭ ماركاسىن انىقتاۋعا ءوز سەپتىگىن تيگىزدى. «حيۋنداي اكسەنت» كولىگىنىڭ 29 جاستاعى جۇرگىزۋشىسى الماتى قالاسىنىڭ تۇرعىنى ەكەنى انىقتالدى»، - دەلىنگەن باسپا ءسوز بايانىندا.

قازىر اتالعان فاكتى بويىنشا تەرگەۋ جۇمىستارى جالعاسۋدا. قاجەتتى ساراپتامالار تاعايىندالعان. كولىك ايىپ تۇراعىنا قويىلدى.

اۆتور: سامال قابىشەۆا