الاياقتار تانىمال قازاقستاندىقتاردىڭ اتىن جامىلىپ اقشا تاپقان
الاياقتار فەيزبۋك پاراقشالار ارقىلى ءتۇرلى ءدارى-دارمەكتەر ساتىپ كەلگەن، دەپ حابارلايدى قازاقپارات.
بىرنەشە كۇن بۇرىن قازاقستاننىڭ ەڭبەر ەرى، الىس-جاقىن شەتەلگە ەسىمى بەلگىلى كارديوحيرۋرگ يۋري پيا سونداي «سۇحباتتىڭ» كەيىپكەرىنە اينالدى. جالعان سۇحباتتا كارديوحيرۋرگ گيپەرتونيادان ەمدەلۋگە بولاتىن ءدارىنىڭ اتىن اتادى دەپ ايتىلعان.
ۇلتتىق عىلىمي كارديوحيرۋرگيا ورتالىعىنىڭ باسپا ءسوز قىزمەتىنە حابارلاسقانىمىزدا، قىزمەتكەرلەر ول اقپاراتتى جوققا شىعاردى.
ياعني، ورتالىق ءتوراعاسى يۋري پيا ەشقانداي جارناماعا تۇسپەگەن، ەشكىمگە سۇحبات بەرمەگەن. باسپا ءسوز قىزمەتىنەن حابارلاعانداي، ورتالىق قىزمەتكەرلەرى ءبىر جىلدان بەرى وسىنداي فەيزبۋك پاراقشالارمەن كۇرەسىپ كەلەدى ەكەن.
«ءبىز پوليتسياعا ارىز تۇسىردىك. ماسەلەنىڭ ءمان-جايىن پوليتسيا انىقتاپ جاتىر. ورتالىقتىڭ زاڭگەرلەرى ماسەلەنى قاداعالاپ وتىر. ياعني، ءبىر كۇن عانا جۇمىس ىستەيتىن سايتتار اشىلادى دا تانىمال ادامداردىڭ اتىن جامىلىپ، جارناما بەرەدى. وسىعان دەيىن ءبىزدىڭ كارديولوگ ماحاببات بەكبوسىنوۆا، نەيروحيرۋرگ سەرىك اقشولاقوۆ پەن بىرنەشە الماتىلىق دارىگەردىڭ اتىن جامىلعان جارنامالاردى كوردىك»، - دەيدى ماركەتينگ جانە بيزنەستى دامىتۋ ءبولىمىنىڭ باسشىسى اسەل ماجىبايەۆا.
اسەلدىڭ ايتۋىنشا، فەيزبۋك پاراقشالار كوبىنە ەمدىك قاسيەتى بار بىلەزىكتەردى، تابلەتكالار مەن ءشارباتتاردى جارنامالاعان. «باعاسى ۋداي بۇنداي زاتتاردى ساتىپ الىپ، الاياقتارعا الدانعان ادامدار بىزگە حابارلاسىپ جاتادى»، - دەيدى ول.
بۇنداي جارنامالارمەن قالاي كۇرەسۋگە بولاتىندىعىن انىقتاۋ ءۇشىن «قازاقپارات» اگەنتتىگى ىشكى ىستەر مينيسترلىگىنە رەسمي ساۋال جولدادى.
اۆتور: كەنجەكەي توقتامۇرات قىزى
