ساياسات تانۋشى ميرزيەيەۆتىڭ ساپارى جايىندا: ەجەلگى تۇركى الەمى بىرىگۋى ءتيىس

استانا. قازاقپارات - تانىمال ساياساتتانۋشى ەرلان سايروۆ وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆتىڭ استاناعا مەملەكەتتىك ساپارىنىڭ قورىتىندىسىنا وراي پىكىر ءبىلدىردى، دەپ حابارلايدى قازاقپارات.

«مەنىڭشە، ءبىزدىڭ وزبەكستانمەن اراداعى ەكونوميكالىق بايلانىستارىمىز ەندىگى ۋاقىتتا بارىنشا قارقىندى دامي تۇسەتىن بولادى. بۇعان قوسا، سوڭعى اقپاراتتارعا سايكەس، جالپى سوماسى 1 ميلليارد دوللارعا جۋىقتايتىن شامامەن 50 كەلىسىمشارتقا قول قويىلدى. وزىمىزدە دامۋىمىز ءۇشىن قازاقستان سپاررينگ- ارىپتەس قاجەت. كوپتەگەن ادامدار وزبەكستانعا ساپارلاي باستادى. ياعني، بۇل دا مادەني، رۋحاني بايلانىستار دەۋگە بولادى»، - دەدى سايروۆ.

 ساياسات تانۋشىنىڭ اتاپ وتۋىنشە، بۇعان دەيىن ەكى ەلدىڭ اراسىنداعى شەكارانى جابىق بولدى دەسەك ارتىق ايتقاندىق ەمەس. ساۋدا- ەكونوميكالىق بايلانىستار دا وتە تومەن بولعان ەدى. قازىرگى ۋاقىتتا وزبەكستاندا جەكەشەلەندىرۋ جۇرگىزىلۋى مۇمكىن. بۇل رەتتە قازاقستاندىق كاسىپكەرلەر وعان قاتىسىپ، تابىسقا جەتە الادى. ويتكەنى، قازاقستان بيزنەسى بۇگىندە اياعىنا نىق تۇرعان. بيزنەسكە ءار ۋاقىتتا دا جاڭا كەڭىستىك، جاڭا بايلانىستار قاجەت. ەگەر مۇنداي بايلانىس ورنايتىن بولسا، وندا ەكى تاراپقا دا ءتيىمدى بولادى. سونىمەن قاتار ەرلان سايروۆ بۇگىنگى كۇنى قازاقستاندىقتاردىڭ وزبەك ەلىنە ءجيى ساپارلاي باستاعاندىعىن دا باسا ايتتى. وزبەك تاراپى ءۇشىن دە قازاقستان الەۋمەتتىك مۇمكىنشىلىك سانالادى. سەبەبى وزبەكستاندا ەڭبەك رەسۋرستارى وتە كوپ. ال قارقىندى دامىپ كەلە جاتقان قازاقستان كوپتەگەن وزبەك ازاماتىن جالاقىسى جوعارى جۇمىس ورىندارىمەن قامتي الادى.

وزبەكستان حالقىنىڭ دىنگە جوعارى بولۋىنا بايلانىستى قاۋىپتەر تۋىنداۋى مۇمكىن بە دەگەن ساۋالعا جاۋاپ بەرگەن سايروۆ ودان قورقۋدىڭ ەش قاجەتى جوق ەكەندىگىن باسا ايتتى. ساياسات تانۋشى قايتا ەجەلگى تۇركى الەمى ءدىني ەكسترەميزم مەن تەرروريزمنىڭ دامۋىمەن بايلانىستى سىرتقى سىن- قاتەرگە قارسى تۇرۋى ءۇشىن بىرىگۋى قاجەتتىگىنە ەرەكشە توقتالىپ ءوتتى.

 اۆتور: مارلان جيەمباي