تانىمال جۋرناليست قىتاي جوباسىنىڭ وتاندىق ارنادان كورسەتىلۋىنە قارسى شىقتى
ونىڭ ايتۋىنشا، قىتايلىق تەلەجوبانى كورسەتۋ ارقىلى ءبىز ولاردى ناسيحاتتايمىز. ءارى ديماش قاتىسىپ جاتقان جوبا اياقتالۋعا جاقىن قالعاندىقتان، ونى قىرۋار قارجىعا ساتىپ الۋ اقشانى جەلگە شاشقانمەن تەڭ.
بۇل تۋرالى Stan.kz حابارلايدى.
«مەن قارسىمىن قىتايدىڭ جوباسىنىڭ ارنامىزدان شىعۋىنا!
قۇدايىم- اۋ، بۇل «حاباردىڭ» قاي ساسقانى؟ تورەلىگىن ايتىڭىزدارشى وزدەرىڭىز؟! سوندا ءبارىمىز ەندىگى بارلىعىن يتەرىپ قويىپ، قىتايلاردىڭ شوۋىن كورەمىز بە؟ قىتايلار بۇل جوبانى ارينە تەگىن بەرىپ قويمايدى وتاندىق ارناعا؟ سوندا ميلليونداعان قاراجاتقا ءوتىپ كەتكەن جوبانى ساتىپ الماق پا (بۇل جوبا جاقىن كۇندەرى اياقتالادى)؟ تۇك تۇسىنبەدىم.
ديماشتى الەۋمەتتىك جەلىدە قولداۋشى جۋرناليستەردىڭ ءبىرى ءوزىمىن. جەڭىپ شىقسىن دەپ ءار اپتا سايىن قۇدايدان تىلەپ وتىرامىن (وعان وزدەرىڭىز دە كۋاسىزدەر). الايدا، بۇل جوبانىڭ وتاندىق ارنادا كورسەتىلۋىنە ءۇزىلدى- كەسىلدى قارسىمىن! نە دەسەڭىزدەر، و دەڭىزدەر... ءيا، مەن قارسىمىن!
بۇل جوبا ارقىلى ءبىز قىتايدى ناسيحاتتايمىز. كەزىندە رەسەي مەن ۋكراينانىڭ شوۋلارىن كورسەتىپ الەك بولىپ ەدى ەلىمىزدەگى ارنالار. ەندى قالماعانى قىتايدىڭ جوباسى... ديماشتىڭ 8 كەزەڭىن يۋتۋب امان بولسىن سول جەردەن كورىپ قويدىق قوي. ەگەر «حابار» سونشالىقتى ديماشتى قولداعىسى كەلسە، ميلليونداعان قاراجاتقا ءدال وسىنداي مەگا-جوبا اشسىن! و نەسى، بارلىعى سۇيىنشىلەتىپ قىتايدىڭ ءوتىپ كەتكەن جوباسى وتاندىق ارنادان كورسەتەدى دەپ شۋلاپ.
ويلانىڭىزدار، ارىپتەستەر، ويلانىڭىزدار! بۇل جوبا ارقىلى ءبىز قىتايعا ەسىگىمىزدى اشامىز. بۇل جوبا ولارعا ءتيىمدى بولماق. تەلەارنا ارقىلى ولاردى ناسيحاتتايمىز. قالايشا وسىنى تۇسىنبەيدى؟ سوندا قىتاي انشىلەرىنىڭ قيقۋلاتقان ءانىن ءبىر ساعات بويى ءبىزدىڭ قازاق حالقى كورۋ كەرەك پە؟ قاي مەملەكەتتى كوردىڭىزدەر وزگە ەلدىڭ وسىنداي شوۋدى ساتىپ الىپ جاتقانىن؟! ۇيات! ماسقارا!
قۋانساق، قازاق بالاسىنىڭ سول جوبادا سىناقتان ءوتىپ، داۋىسىن الەم تىڭداعانىنا قۋاندىق. بوياۋشى، بوياۋشى دەگەنگە ءبىزدىڭ ارنالار وسى ساقالىن بوياپ بارا جاتقان جوق پا؟ پارادوكس. سوندىقتان دا، ءوز باسىم قارسىمىن!» - دەيدى بيبىگۇل داۋلەتبەك قىزى.
ەسكە سالا كەتەيىك، قىتايدا ءوتىپ جاتقان Singer جوباسىنىڭ 10 كەزەڭى ارتتا قالدى. 10-كەزەڭدە ءۇشىنشى ورىن العان ديماش قۇدايبەرگەن فينالعا ءوتتى.
