قازاعىم ەڭسەسىن كوتەرىپ ءجۇرسىن دەپ جۇمىس ىستەۋدەمىن - مەملەكەت باسشىسى

استانا. قازاقپارات - قازاعىم ەڭسەسىن كوتەرىپ ءجۇرسىن دەپ جۇمىس ىستەۋدەمىن.

وتاندىق تەلەارنالاردان كورسەتىلگەن رەسپۋبليكالىق ب ا ق وكىلدەرىنە سۇحباتى بارىسىندا ق ر پرەزيدەنتى نۇرسۇلتان نازاربايەۆ وسىلاي دەدى، دەپ حابارلايدى قازاقپارات.

سۇحبات بارىسىندا «قازاقستان» تەلەارناسىنىڭ «ايتۋعا وڭاي» باعدارلاماسىنىڭ جۇرگىزۋشىسى بەيسەن قۇرانبەك ەلباسىدان كۇنى-ءتۇنى تىنباستان جۇمىس ىستەۋگە كۇش-قۋاتتى قايدان الاتىندىعىن سۇراعان بولاتىن.

«شىر ەتىپ جەرگە تۇسكەندە اللانىڭ بەرەتىن كۇشى بولادى. سول كۇش-قۋات تاۋسىلعانشا ءومىر سۇرەسىڭ. بىتكەندە كەتەسىڭ. سوندىقتان مەن قازاقستاندى، جەر شارىن ارالاپ جۇرۋگە كۇش-قۋات بەرگەنىنە ريزامىن. سول كۇش-قۋات بار كەزدە جۇمىس ىستەپ قالۋ كەرەك. سەندەر تەپسە تەمىر ۇزەتىن كەزدەسىڭدەر، ىزدەنۋ كەرەك. ءوز جۇمىسىڭدا ىزدەنسەڭ، العا قاراي ىلگەرىلەۋگە بولادى»، - دەدى ەلباسى.

ق ر پرەزيدەنتى ونىڭ دۇنيەجۇزىندەگى مىسالى اقپارات قۇرالدارىندا مولىنان ەكەندىگىن باسا اتاپ ءوتتى.

«كەيبىر جاعدايدا مۇمكىنشىلىك تە بولمايتىن شىعار. ءبىراق، مۇمكىندىكتى بولدىرۋ كەرەك. بارلىعىنان دا سولارمەن بىردەي بولۋعا، ولاردان اسىپ تۇسۋگە تىرىسۋ كەرەك. مەن دە وسىنداي جولمەن ءجۇرىپ كەلەمىن. ەلىمدى باسقا ەلدەرمەن قاتار، تەرەزەسى تەڭ بولسىن، ەشكىمنەن كەم بولماسىن دەپ، قازاعىمنىڭ ەڭسەسى كوتەرىلىپ ءجۇرسىن دەپ، ءار ۋاقىتتا دا بارلىعىنا تومەننەن جوعارى قاراماي، كەرىسىنشە قازاقتىڭ وزىنە سولاي قاراسىن دەپ ءومىر ءسۇرىپ، جۇمىس ىستەپ ءجۇرمىن. سول جۇمىستارىمدى ايتىپ جاتسا، باعالاپ جاتسا مەن ءۇشىن مارتەبە»، - دەدى نۇرسۇلتان نازاربايەۆ.

اۆتور: مارلان جيەمباي