داۋرەن ابايەۆ: قازاق ءتىلىنىڭ مارتەبەسى وسەدى
مەكەمە باسشىسى قازاق تىلىنە قاتىستى ماسەلەلەردى جاريالاۋ اياسىنداعى وتاندىق ب ا ق- تىڭ پوزيتسياسىنا تاڭ قالاتىنىن ايتتى. «قازاق ءتىلى مەن قازاق ادەبيەتىنە قاتىستى بارلىق دۇنيەلەر ءاردايىم وتكىر بولماق. ءبىلىم جانە عىلىم مينيسترلىگى بارىنشا تولىق تۇسىنىكتەمە بەردى. ولار، كەرىسىنشە، سىناق تاپسىرۋداعى قازاق ءتىلىنىڭ ءرولىن كۇشەيتتى. ازىرگە ب ع م ۇ ب ت- نى ەكىگە ءبولدى: مەكتەپتەگى ءبىتىرۋ ەمتيحاندارى جانە ج و و- عا ءتۇسۋ ەمتيحاندارى. مەكتەپ ءبىتىرۋ ەمتيحاندارىندا قازاق ءتىلى قالدى جانە ول اتتەستاتقا ىقپال ەتەتىن بولادى. مەكتەپ بىتىرۋشىلەردىڭ سانى ۋنيۆەرسيتەتكە تۇسەتىندەر سانىنان الدەقايدا كوپ، سوندىقتان قازاق ءتىلىنىڭ مارتەبەسى وسەدى»، - دەدى مينيستر.
وتكەن اپتاداعى بارلىق اقپاراتتار اعىنىنان داۋرەن ابايەۆ الماتىلىق ۆياچەسلاۆ پوپوۆتىڭ مالىمدەمەسىن ەرەكشە اتاپ ءوتتى. ۆ. پوپوۆ فەيسبۋكتاعى پاراقشاسىندا جارتى جىلدا قازاق ءتىلىن ۇيرەنىپ الۋعا نيەتتى ەكەنىن جازدى.
«مەن جەكە ءوزىم ءۇشىن ۆياچەسلاۆ پوپوۆتىڭ قازاق ءتىلىن ۇيرەنۋ تۋرالى مالىمدەمەسىن ءتۇرتىپ الدىم. بۇل ۇمتىلىستى ۇنەمى باقىلايتىن بولامىن. ءبىزدىڭ قوعامدا قازاق ءتىلى وقىتىلماي جاتىر دەگەن ماسەلە قىزۋ تالقىعا تۇسەدى، ءبىراق ازاماتتاردىڭ قازاق ءتىلىن ءوز بەتىنشە ۇيرەنۋگە جاساعان ۇمتىلىستارى كولەڭكەدە قالا بەرەدى. اقپارات جانە كوممۋنيكاتسيالار ءمينيسترى رەتىندە مەنى بۇل ماسەلە تاڭعالدىردى»، - دەدى مينيستر.
