ۇشاقتا بويجەتكەننىڭ قۇلاققابى جارىلىپ، بەتى كۇيىپ قالدى

استانا. قازاقپارات -  بەيجڭنەن مەلبۋرنگە بەت العان ۇشاق ىشىندە بويجەتكەن قىزدىڭ باتارەيكالارمەن جۇمىس ىستەيتىن قۇلاققابى جارىلدى.

 ۋاقيعا ۇشاق اۋەگە كوتەرىلگەننەن كەيىن ەكى ساعات وتكەن سوڭ ورىن العان. جولاۋشى بويجەتكەن مۋزىكا تىڭداپ دەمالىپ جاتقان كەزىندە اياق استىنان قۇلاققابى جارىلدى، دەپ حابارلايدى اۆستريا كولىك قاۋىپسىزدىگى بيۋروسىنىڭ سايتى.

بويجەتكەن كوزىن اشىپ، باسىن بۇرعان ساتتە قاتتى قىزىپ كەتكەن قۇرىلعىدان بەتىنىڭ كۇيگەنىن بايقاعان. شوشىپ كەتكەن ول وت شاشىپ جاتقان قۇلاققاپتى باسىنان تەز شەشىپ الىپ، ەدەنگە لاقتىرىپ جىبەرگەن. وسىدان كەيىن، بويجەتكەنگە كومەككە كەلگەن بورتسەرىكتەر جانىپ جاتقان وتتى سۋ شاشىپ سوندىرگەن.

جولاۋشىنىڭ اتى- ءجونى مەن جارىلعان قۇلاققاپتىڭ ماركاسى تۋرالى مالىمەتتەر قازىرشە قۇپيا كۇيدە ساقتالىپ وتىر. الايدا، ۆەدومستۆو جاريالاعان فوتودان بويجەتكەننىڭ بەتى مەن قولدارى قاتتى جاراقاتتانعانىن بايقاۋعا بولادى.

وقيعا ۇشاقتى اپاتتى جاعدايدا قوندىرۋعا سەبەپشى بولعان جوق، الايدا ۇشۋ كەزىندە جولاۋشىلاردىڭ باسىم بولىگى ەرىپ- بالقىعان جەلىمنىڭ، كۇيگەن شاشتىڭ ءيىسىن سەزىنگەن. كۋاگەردىڭ ءبىرىنىڭ ايتۋى بويىنشا، كەيبىر جولاۋشىلار جوتەلىپ، تىنىس الۋى اۋىرلاعان.

كولىك قاۋىپسىزدىگى بيۋروسىنىڭ باسشىلىعى باتارەيكامەن جۇمىس ىستەيتىن قۇرىلعىلاردى قولدانۋشىلار سانىنىڭ ارتىپ كەلە جاتقانىن اتاپ ءوتتى. وسىعان بايلانىستى، وسىنداي بالاما گاجدەتتەردى قولدانۋ كەزىندە ساق بولۋعا جانە ولاردى قول جۇگىمەن بىرگە الىپ جۇرۋگە كەڭەس بەرەدى.

دەرەككوزى: dni.ru