شىمكەنتتە ءاز ناۋرىزدى تويلاۋ باستالدى - فوتو

شىمكەنت. قازاقپارات - شىمكەنتتە ءاز ناۋرىزدى تويلاۋ باستالىپ، «سەيىل - قوشقار اتا» شاراسى ءوتتى. قوشقار اتا وزەنىنىڭ بويىندا ۇيىمداستىرىلعان فەستيۆالدە ءتۇرلى ۇلتتىق ويىندار ۇيىمداستىرىلىپ، ۇلتتىق تاعامدار دايىندالدى، دەپ حابارلايدى قازاقپارات ح ا ا ءتىلشىسى.

 كوكتەمنىڭ باسىن بۇلاق باستاۋىنان تويلاۋ ءۇردىسى شىم شاھاردا وتكەن جىلدان بەرى جالعاسىن تاۋىپ كەلەدى. بۇگىنگى «سەيىل- قوشقار اتا» شاراسىندا شىم شاھاردىڭ تۇرعىندارى سەيىل قۇرىپ، ۇلتتىق تاعامداردان ءدام تاتتى. قولونەرشىلەر كورمەسىن كورىپ، وزگە ۇلت وكىلدەرىنىڭ كونسەرتتىك باعدارلاماسىن تاماشالادى.

 فەستيۆال اياسىندا سونداي- اق كىل مىقتى مەن كۇش اتاسىن ەڭسەرگەن ەرلەر انىقتالدى. اسىل تۇقىمدى قوشقارلار مەن قويلار دا تانىستىرىلىپ، قوشقار كوتەرۋدەن جارىس ۇيىمداستىرىلدى. مەرەكەنىڭ كوركى وسى - سالماعى 60 كەلىدەن استام قوشقاردى كوتەرگەن پالۋاندار سايىسى بولدى. وندا قوشقاردى يىعىنا سان رەت كوتەرىپ، قارسىلاستارىن سان سوقتىرعان اكبار ەلۋباي ۇلى جەڭىمپاز بولىپ تانىلدى. سوزاقتىڭ سەرىسى قوشقاردى يىعىنا 70 رەت كوتەرىپ، باس بايگەنى ۇتىپ الدى. شارادا ۇلتتىق ويىننىڭ وزگە دە تۇرلەرىنەن جارىستار ۇيىمداستىرىلدى. بوز كىلەمدە بەلدەسكەندەر قازاقشا كۇرەستىڭ جەڭىمپازىن انىقتادى. توعىزقۇمالاق، كىر تاسىن كوتەرۋشىلەر دە ءوزارا مىقتىلاردى مويىنداتتى. قىلقالام شەبەرلەرى دە مەرەكەنىڭ كوركىن كەلتىرىپ، مەزگىل مەن مەرەكەنىڭ سۇلۋلىعىن سۋرەتتەۋدەن سىنعا ءتۇستى.

 اۆتور: اينۇر اقبايەۆا