اقتوبەدەگى ءتىس ەمحاناسىندا توتەنشە جاعداي تىركەلدى - كەسكىن
ەرلى-زايىپتىلار اجىراسقانىمەن، 24 جاستاعى جىگىت ءوزىنىڭ بۇرىنعى كەلىنشەگىن كەپىلگە الىپ، «ولتىرەمىن» دەپ قورقىتقان، دەپ حابارلايدى قازاقپارات ءتىلشىسى.
اقتوبە قالاسىنداعى ءا. مولداعۇلوۆا داڭعىلىندا ورنالاسقان ستوماتولوگيالاردىڭ بىرىندە 1991-جىلعى ازاماتشا كەپىلگە الىندى. قىلمىسكەر وسى مەكەمەدە ىستەيتىن ايەلىن اكەلۋدى تالاپ ەتكەن.
جىگىت 7- ناۋرىز كۇنى اجىراسقان. 24 جاستاعى ەر ادام بۇرىن ۇرلىق جاساعانى ءۇشىن ءىستى بولعان. ەش جەردە جۇمىس ىستەمەيدى.
«كەشە ساعات 15:00 دە قىلمىسكەر بۇرىنعى ايەلىن ءولتىرۋ ءۇشىن ونىڭ تۋىستارىنىڭ ۇيىنە بارىپ، ەنەسىن پىشاقتاعان. قازىر وسى وقيعاعا بايلانىستى قىلمىستىق كودەكستىڭ «دەنساۋلىققا قاساقانا اۋىر زيان كەلتىرۋ»، «قارۋ قولدانىپ ادامدى كەپىلگە الۋ» باپتارى بويىنشا ءىس قوزعالدى.
وبلىستىق ىشكى ىستەر دەپارتامەنتى مەن ىشكى ىستەر باسقارماسى اقتوبە قالاسىنىڭ پروكۋرورلارىمەن بىرلەسە 5 ساعات بويى كەلىسسوز جۇرگىزدى. كەپىلگە الىنعان ادامنىڭ ومىرىنە شىن مانىندە قاۋىپ ءتوندى.
قىلمىسكەر كەلىسىمگە كەلۋدەن ءۇزىلدى-كەسىلدى باس تارتىپ، وقيعا ورنىنا جەتكەن تۋعان-تۋىستارىمەن تىلدەسۋگە كەلىسپەدى»، - دەدى وبلىستىق ءى ءى د باسپا ءسوز قىزمەتى.
قىلمىسكەر ايەلىن اكەلۋدى تالاپ ەتىپ، ونى ءولتىرۋدى بۇرىننان جوسپارلاپ جۇرگەنىن جاريالاعان.
ايتا كەتەيىك، تۇتقىنداعى ادامدى قۇتقارۋ ءۇشىن قۇقىق قورعاۋشىلارى ءتۇن ورتاسىندا ارنايى وپەراتسيا جۇرگىزىپ، ءار مينۋت سايىن ادام ومىرىنە قاۋىپ توندىرگەن قىلمىسكەردىڭ كوزىن جويدى.
ارنايى وپەراتسيا كەزىندە كەپىلگە الىنعان ستوماتولوگيا اكىمشىسى دارىگەرلەر مەن پسيحولوگتاردىڭ كومەگىنە جۇگىندى.
