قازاقستانداعى سۋ بوگەتتەرىنىڭ قاۋىپسىزدىگى تۋرالى زاڭ جوباسى ازىرلەنەدى

استانا. قازاقپارات - سەناتتا اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ باسشىسى سەرگەي پلوتنيكوۆتىڭ ءتوراعالىق ەتۋىمەن «سۋ رەسۋرستارىن پايدالانۋدى، ونىڭ ىشىندە شەكاراارالىق وزەندەر ماسەلەلەرىن زاڭنامالىق تۇرعىدان رەتتەۋ» تاقىرىبى بويىنشا دوڭگەلەك ۇستەل وتىرىسى ءوتتى.

شاراعا پارلامەنت دەپۋتاتتارى، مەملەكەتتىك ورگانداردىڭ وكىلدەرى مەن ساراپشىلار قاتىستى. پارلامەنت سەناتى ءتوراعاسىنىڭ ورىنباسارى سەرگەي گروموۆ تىڭداۋدى اشا كەلىپ، ەلىمىزدىڭ حالقىن سۋمەن قامتاماسىز ەتۋ كۇردەلى ءارى ونى شەشۋدىڭ ءتيىمدى جولدارىن تالاپ ەتەتىن مىندەت ەكەنىن اتاپ ءوتتى.

ءتوراعا ورىنباسارى قازاقستان اۋماعىنىڭ سۋمەن قامتاماسىز ەتىلۋى ەۋرازيا قۇرلىعىنداعى ەلدەر ءۇشىن اسا ماڭىزدى ەكەنىنە نازار اۋداردى. پرەزيدەنت ن. نازاربايەۆتىڭ «قازاقستان-2050» ستراتەگياسى: قالىپتاسقان مەملەكەتتىڭ جاڭا ساياسي باعىتى» جولداۋىندا سۋ رەسۋرستارىنا زارۋلىك  21- عاسىرداعى جاھاندىق ون قاتەردىڭ قاتارىندا اتاپ وتىلگەن بولاتىن. س. گروموۆ سۋ شارۋاشىلىعى قىزمەتىن زاڭنامالىق تۇرعىدا قامتاماسىز ەتۋ جونىندە پارلامەنت جۇيەلى جۇمىستار اتقارىپ كەلە جاتقانىن ەسكە سالدى.

اتاپ ايتقاندا، ەكولوگيالىق قاۋىپسىز، ءارى سۋدى پايدالانۋدىڭ وڭتايلى ەكونوميكالىق دەڭگەيىنە قول جەتكىزۋ مەن ونى قولداۋ جانە سۋ قورىن قورعاۋعا باعىتتالعان سۋ زاڭناماسى جۇيەلى تۇردە جەتىلدىرىلىپ كەلەدى. سەنات ءتوراعاسىنىڭ ورىنباسارى تالقىلانىپ وتىرعان ماسەلە الەۋمەتتىك-ەكونوميكالىق جانە ساياسي ەرەكشە مانگە يە، ءارى حالىقتىڭ ءال-اۋقاتىنىڭ ماڭىزدى كورسەتكىشتەرىنىڭ ءبىرى دەپ تۇيىندەدى ءسوزىن.

اۋىل شارۋاشىلىعى ءمينيسترىنىڭ ورىنباسارى ەرلان نىسانبايەۆ سۋ كودەكسىنىڭ نەگىزگى ەرەجەلەرىن ىسكە اسىرۋ، سۋدى پايدالانۋ جۇيەسىن جەتىلدىرۋ جانە سۋ رەسۋرستارىن قورعاۋ ماسەلەلەرى تۋرالى دەپۋتاتتاردى حاباردار ەتتى.

بايانداماشى سۋ سالاسىنا قاتىستى قۇرىلىستاردىڭ قاۋىپسىزدىگىنە ەگجەي-تەگجەيلى توقتالىپ، 2018-جىلى بوگەتتەردىڭ قاۋىپسىزدىگى تۋرالى زاڭ جوباسىن ازىرلەۋ كوزدەلىپ وتىرعانىن اتاپ ءوتتى. ە. نىسانبايەۆ سۋدى پايدالانۋ جانە شەكاراارالىق وزەندەردى قورعاۋ ماسەلەلەرىن رەتتەۋ تۋرالى دا ايتتى.

مينيستر ورىنباسارىنىڭ ايتۋىنشا، بۇگىنگى تاڭدا شەكاراارالىق وزەندەردىڭ سۋىن ءبولىسۋ جونىندەگى ق ح ر- دان باسقا ىرگەلەس مەملەكەتتەرمەن ۋاعدالاستىقتار بار. بۇل ولقىلىقتى تۇزەتۋ ءۇشىن قازاقستان مەن قىتاي اراسىندا ەكىجاقتى كەلىسىم ازىرلەيتىن ارنايى جۇمىس توبى قۇرىلدى.

ايماقتاعى سۋ رەسۋرستارىن پايدالانۋ ماسەلەلەرىن رەتتەۋ ءۇشىن ورتالىق ازيا ەلدەرىمەن جۇمىستار جۇرگىزىلىپ جاتىر. دوڭگەلەك ۇستەل بارىسىندا اۋىل شارۋاشىلىعى مينيسترلىگى سۋ رەسۋرستارى جونىندەگى كوميتەتىنىڭ ءتوراعاسى يسلام ابىشەۆ، ينۆەستيتسيالار جانە دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق جونىندەگى كوميتەتىنىڭ ءتوراعاسى مارحابات جايىمبەتوۆ، «قازاقستان سۋ ارناسى» سۋمەن قامتاماسىز ەتۋ جانە سۋ بۇرۋ كاسىپورىندارى اسسوتسياتسياسىنىڭ پرەزيدەنتى ۆالەري سيۋنديۋكوۆ، «گەوگرافيا ينستيتۋتى» ج ش س ديرەكتورى احمەتكال مەدەۋ، حالىقارالىق «ارالدى قۇتقارۋ قورى» ديرەكتورىنىڭ ورىنباسارى ءامىرحان كەنشيموۆ، ورتالىق ازياداعى مەملەكەتارالىق سۋ شارۋاشىلىعى ۇيلەستىرۋ كوميسسياسىنىڭ عىلىمي-اقپاراتتىق ورتالىعى بولىمشەسىنىڭ ديرەكتورى ناريمان قىپشاقبايەۆ ءسوز سويلەدى.

سەناتورلار داريعا نازاربايەۆا مەن قۋانىش ايتاحانوۆ تالقىلانىپ وتىرعان ماسەلەلەر بويىنشا ءوز ويلارىن ورتاعا سالدى. تالقىلاۋدى قورىتىندىلاي كەلىپ، سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ ءتوراعاسى سەرگەي پلوتنيكوۆ وتىرىستا پايدالى ءارى ناتيجەلى اڭگىمە ورىستەگەنىن ايتتى.

شەكاراارالىق وزەندەردەگى سۋدى پايدالانۋ جانە ونى رەتتەۋگە بايلانىستى ءبىرقاتار وزەكتى ماسەلەلەر تالقىلاندى. پىكىرسايىس بارىسىندا ايتىلعان ۇسىنىستار ءتيىستى مەملەكەتتىك ورگاندارعا جىبەرىلەتىن ۇسىنىمدارعا قوسىلادى جانە پارلامەنتتىڭ زاڭ شىعارۋ جۇمىستارى بارىسىندا پايدالانىلادى.

اۆتور: سەرىك قاراجان