ەكسپو ساقشىلارى جەر استى تيرىندە جاتتىعادى - فوتو

استانا. قازاقپارات - بۇگىن استاناداعى ەكسپو حالىقارالىق كورمەسى اۋماعىندا ەسىل اۋداندىق ىشكى ىستەر باسقارماسىنىڭ پوليتسيا بولىمشەسى ءوز جۇمىسىن باستادى، دەپ حابارلايدى قازاقپارات ءتىلشىسى.

 ەكى قاباتتى عيماراتتا ورنالاسقان بولىمشەدە جەر استى پاركينگى، سپورت زالى، سونداي- اق ءتارتىپ ساقشىلارى جاتتىعاتىن ارنايى تير بار.

 «وسى بولىمشەدە كەزەكشى ءبولىمى، تەرگەۋ توپتارى، شۇعىل ارەكەت جاساقتارى مەن كريميناليستەر وتىرادى. ولاردىڭ بارلىعى كورمە كەزىندەگى قوعامدىق قاۋىپسىزدىككە جاۋاپ بەرەدى. ال كورمە وتكەننەن كەيىن بولىمشەنىڭ قىزمەتكەرلەرى وسى اۋماقتا جانە وعان جاقىن تەرريتوريادا ءوز جۇمىسىن جالعاستىراتىن بولادى»، - دەيدى استانا قالالىق ىشكى ىستەر دەپارتامەنتىنىڭ باسشىسى امانتاي اۋباكىروۆ.

 دەپارتامەنت باسشىسىنىڭ ايتۋىنشا، كورمە كەزىندە 9000 مىڭ ءتارتىپ ساقشىسى قوعامدىق قاۋىپسىزدىكتى قامتاماسىز ەتەتىن بولادى. ولاردىڭ ىشىندە 1500 ادام استانالىق دەپارتامەنتتىڭ ماماندارى بولسا، قالعاندارى - باسقا دەپارتامەنتتەردەن جىبەرىلگەن ساقشىلار، ىشكى ىستەر مينيسترلىگىنە قاراستى جوعارى وقۋ ورىندارىنىڭ كۋرسانتتارى، ۇلتتىق ۇلان مەن كۇزەت قۇرىلىمدارى.

 «بۇدان بولەك، كورمە اۋماعىندا 2 مىڭنان استام بەينەكامەرا بار. سونىڭ ءبارى ءبىر جەلىگە قوسىلىپ، قوعامدىق ءتارتىپ ارنايى باسقارۋ ورتالىعىنان باقىلانادى. ءبىز دە مىنا جاقتان قاراپ وتىراتىن بولامىز»، - دەپ اتاپ كورسەتتى ول.

 اۆتور: ارمان اسقاروۆ