تالدىقورعاندا مۇقتاج جاندارعا تاۋارلار تەگىن تاراتىلۋدا

تالدىقورعان. قازاقپارات - تالدىقورعان قالاسىندا ورنالاسقان دۇكەن مۇقتاج جاندارعا تاۋارلارىن تەگىن تاراتۋدا. الماتى وبلىسى ىسكەر ايەلدەر كەڭەسى قالادا ورنالاسقان «بارلىعى راحمەت ءۇشىن» اتتى دۇكەندە بولىپ قايتتى، دەپ حابارلايدى قازاقپارات ءتىلشىسى.

 الەۋمەتتىك دۇكەن قالا تۇرعىندارىنان كيىم- كەشەكتەن باستاپ، ىدىس- اياق، تۇرمىسقا قاجەتتى زاتتار مەن ويىنشىقتارعا دەيىن قابىلدايدى. وسىلايشا، دۇكەن كۇندەلىكتى قولدانىسقا قاجەتتى زاتتارمەن تولىعىپ، كەيىننەن ونى مۇقتاج جاندارعا تەگىن ۇلەستىرۋمەن اينالىسادى. وبلىسىق ىسكەر ايەلدەر كەڭەسى شاراپاتتى ىسپەن اينالىسىپ وتىرعان دۇكەن قىزمەتىمەن تانىسىپ قانا قويماي، الەۋمەتتىك دۇكەنگە كىشىگىرىم كومەكتەرىن الا كەلگەن.

 «ءبىزدىڭ دۇكەن كوپ جاندارعا ءۇمىت، جىلۋ سىيلاپ وتىرعان ورتالىققا اينالدى. قىسقا عانا ۋاقىتتا دۇكەن يەسى قيىن جاعدايدا قالعان جاندارعا قولداۋ جاساپ وتىر. بۇنداي الەۋمەتتىك جوبالاردى مەملەكەت تە، حالىق تا كەڭىنەن قولداۋى كەرەك دەپ ەسەپتەيمىن»، - دەدى ىسكەر ايەلدەر كەڭەسىنىڭ ءتورايىمى ماميلا مۇسابەكوۆا.

دۇكەننىڭ نەگىزىن قالاعان اجار قىدىرالينانىڭ ايتۋىنشا، الەۋمەتتىك دۇكەن قۇرىلعانىنا 10 ايدان اسقان. وسى ۋاقىت ارالىعىندا 200 دەن استام وتباسىعا كومەك بەرىلگەن.

«زاتتاردى، كيىم- كەشەكتەردى وزدەرى كەلىپ الا الماعان وتباسىلارعا جەتكىزىپ بەردىك. دەگەنمەن، كيىمدەردى بىردەن دۇكەننەن الىپ كەتەتىندەر كوپ. سوندىقتان قورىمىز تاۋسىلماس ءۇشىن بىزگە ەرىكتىلەر مەن قايىرىمدى جانداردىڭ كومەگى قاجەت. قالا تۇرعىندارىن قايىرىمدىلىق جاساۋعا شاقىرعىم كەلەدى»، - دەيدى اجار قىدىرالينا.

ايتا كەتەيىك، الەۋمەتتىك دۇكەن اشقان كاسىپكەردىڭ قول استىندا ەكى قىزمەتكەرى بار. ولار قالالىق جۇمىسپەن قامتۋ ءبولىمى جەلىسىمەن جۇمىسقا ورنالاسقان. كاسىپكەر كەلەشەكتە تۇرمىستىق زاتتاردى قايتا كادەگە جاراتۋ بويىنشا جاڭا جوبانى قولعا الماق.

 اۆتور: سامال قابىشيەۆا