شىنجاڭ حالىق ۇكىمەتى ءتوراعاسىنىڭ ورىنباسارى قازاقستانمەن ينۆەستيتسيالىق سەرىكتەستىككە جوعارى باعا بەردى
بۇل تۋرالى «قازاقپارات» ح ا ءا- نىڭ قىتايداعى ءتىلشىسى حابارلادى.
«ساياسي جانە ەكونوميكالىق سالالارداعى قازاقستان مەن قىتايدىڭ قارىم- قاتىناسى وتە جوعارى دەڭگەيدە. ەكى ەل اراسىنداعى ءوزارا ارەكەتتەستىك شىنجاڭ- ۇيعىر اۆتونوميالىق ولكەسى ارقىلى جۇزەگە اسۋدا. سەبەبى ش ۇ ا ءو مەن قازاقستاننىڭ شەكاراسى 1740 شاقىرىمدى قۇرايدى. ورتاق اۋماقتا 7 باقىلاۋ- وتكىزۋ بەكەتى جۇمىس جاساۋدا. «قورعاس» حالىقارالىق ورتالىعىن قۇردىق. قازاقستان شىنجاڭنىڭ ءىرى ساۋدا ارىپتەسى بولىپ تابىلادى. ەكىجاقتى ينۆەستيتسيا كولەمى ارتىپ كەلەدى»، - دەدى ول بەيجىڭدە وتكەن جالپى قىتاي حالىقتىق وكىلدەرى جينالىسىنىڭ سەسسياسى اياسىندا قازاقپارات ءتىلشىسىنىڭ سۇراقتارىنا جاۋاپ بەرە وتىرىپ.
يساميدين ق ح ر ءتوراعاسى شي جينپيڭنىڭ 2013 -جىلدىڭ قىركۇيەك ايىندا «جىبەك جولى ەكونوميكالىق بەلدەۋى» بىرلەسكەن قالىپتاستىرۋ باستاماسىن استانادا جاريالاعانىن ەسكە سالدى. ەكى مەملەكەت باسشىسى تاياۋ جىلدارى ساۋدا اينالىمىن 40 ميلليارد دوللارعا جەتكىزۋدى كوزدەگەن.
«ورتالىق ازيا ەلدەرىمەن شەكارالاساتىن شىنجاڭ ءۇشىن «جىبەك جولى ەكونوميكالىق بەلدەۋى» ۇلكەن مۇمكىندىكتەرگە جول اشادى. ءبىز وڭىردەگى باستى كولىك تورابى بولا الامىز»، - دەپ اتاپ ءوتتى قىتايلىق شەنەۋنىك.
