وڭتۇستىك كورەيانىڭ پرەزيدەنتى سارايىنان كەتتى
وڭتۇستىك كورەيانىڭ ساياسي جانە بيزنەس ەليتاسىن دۇربەلەڭگە سالعان كوررۋپتسيا جانجالىنا ىلىككەن 65 جاستاعى پاك كىن حە جۇما، ناۋرىزدىڭ 10 ى كۇنى ەلدىڭ كونستيتۋتسيالىق سوتى پارلامەنتتىڭ پرەزيدەنتكە يمپيچمەنت جاريالاۋىن زاڭدى دەپ تانىعاننان كەيىن قىزمەتىنەن ءبىرجولا شەتتەتىلگەن.
بۇل جانجالعا وتكەن جىلى قازاندا پرەزيدەنتتىڭ قۇربىسى چحۆە سۋن سيلدىڭ مەملەكەت باسشىسىنا ىقپالى تۋرالى باسپا سوزدە جاريالانعان دەرەكتەر تۇرتكى بولعان ەدى. جۇرگىزىلگەن تەكسەرۋلەر ناتيجەسىندە چحۆە سۋن سيل بىرنەشە جىل بويى مەملەكەتتىك باسقارۋ ىسىنە ارالاسىپ، ساياسي شەشىمدەر قابىلداۋعا ىقپال ەتكەن دەگەن كۇدىككە ىلىنگەن. سونىمەن بىرگە، تەرگەۋ ورگاندارى پرەزيدەنت قۇربىسىنا كەيبىر كومپانيالارعا قىسىم جاساۋ ارقىلى ءوزىنىڭ باقىلاۋىنداعى قورلارعا ونداعان ميلليون دوللار اقشا اۋدارۋعا ماجبۇرلەگەن دەگەن ايىپ تاققان. وڭتۇستىك كورەيا وپپوزيتسياسى پاك كىن حە قۇربىسى چحۆە سۋن سيلدىڭ كوررۋپتسيالىق شىرماۋىنا ىلىنگەن نەمەسە ەڭ كەمى ول جونىندە حاباردار بولعان دەپ سانايدى.
2016 -جىلعى جەلتوقساندا وڭتۇستىك كورەيا پارلامەنتى كوررۋپتسياعا باتقان جانە بيلىكتى تەرىس پايدالانعان دەگەن ايىپقا قالعان پرەزيدەنت پاك كىن حەگە يمپيچمەنت جاريالاعان بولاتىن.
پاك كىن حەگە يمپيچمەنت جاريالانعان سوڭ پرەزيدەنت مىندەتىن ۋاقىتشا اتقارۋ پرەمەر-مينيستر حۆان كە- انعا تاپسىرىلعان.
«ازاتتىق»
