استانا «جەر ساعاتى» ەكولوگيالىق اكسياسىنا قاتىسادى
بيىل اكسياعا ەلىمىزدىڭ بارلىق ءىرى قالالارى قوسىلىپ، كوشەلەردەگى شامداردى جانە باس ساۋلەت نىساندارىنىڭ جارىقتاندىرىلۋىن وشىرەدى. استانادا «بايتەرەك» مونۋمەنتى، «اقوردا» پرەزيدەنت رەزيدەنتسياسى، ۇكىمەت عيماراتتارى جانە باسقا دا نىسانداردىڭ جارىقتاندىرىلۋى وشىرىلەدى، دەپ حابارلايدى ەلوردانىڭ رەسمي سايتى.
بۇعان قوسا، بارلىق قالالاردا جۇزدەگەن ادامداردىڭ قاتىسۋىمەن قورشاعان ورناتى قورعاۋ تاقىرىبىندا فلەشموبتار جانە ۆەلوجارىستار وتەدى. اتالعان اكسيانى جىل سايىن دۇنيەجۇزىلىك جابايى تابيعات قورى ناۋرىزدىڭ سوڭعى سەنبىلەرىنىڭ بىرىندە وتكىزەدى، وعان سايكەس، بەلگىلەنگەن كۇنى بۇكىل الەم بويىنشا ادامدار ءبىر ساعاتقا ەلەكتر شامدارىن جانە باسقا دا ەلەكتر قۇرالدارىن وشىرەدى.
«جەر ساعاتى» - تابيعاتقا ۇقىپتىلىقپەن قاراۋعا ۇندەيتىن اكسيا، بۇل جەر كليماتىن ساقتاۋ مەن ونىڭ شەكتەۋلى قورلارىنا قامقورلىقپەن قاراۋعا قوعامدىق ۇندەۋ شاراسى.
بۇگىنگى كۇنى «جەر ساعاتى» ادامزات تاريحىنداعى ەڭ ۇلكەن اكسيا بولىپ تابىلادى. العاش رەت بۇل شارا 2007-جىلى سيدنەي (اۆستراليا) قالاسىندا وتكىزىلگەن. كەلەسى جىلى جاھاندىق وقيعانى كوپتەگەن مەملەكەتتەر قولداپ شىقتى.
اكسياعا الەمنىڭ 35 مەملەكەتىنەن 100 ميلليوننان اسا ادام قاتىستى. قازاقستان حالىقارالىق اكسياعا 2009-جىلى رەسمي تۇردە ۇلەس قوستى. ول كەزدە شاراعا استانا جانە الماتى قالالارى قاتىسقان بولاتىن.
