بايشەشەكتى جۇلساڭىز جاۋاپقا تارتىلاسىز
قازىرگى تاڭدا جەتىسۋ جەرىندە اتالعان گۇلدىڭ سانى كۇرت سيرەگەن. «كوكتەم كەلىسىمەن بايشەشەككە قىزىعاتىندار كوبەيەدى. زاڭنامالارعا سايكەس، گۇلدىڭ بۇل ءتۇرىن جيناۋعا تىيىم سالىنادى. سوندىقتان ءوڭىردىڭ ءتارتىپ ساقشىلارى ەرەكشە قورعالاتىن گۇلگە قامقورلىق تانىتۋدى تالاپ ەتۋدە»، - دەدى وبلىستىق ءى ءى د باسپا ءسوز قىزمەتىنەن.
قازىر وبلىس پوليتسەيلەرى جانە تابيعاتتى قورعاۋ مەكەمەلەرىنىڭ وكىلدەرى «تابيعات» الدىن-الۋ شاراسىن وتكىزۋدە.
ول 6- ساۋىرگە دەيىن جالعاسادى. مۇنداي ماقساتتى رەيدتەر جەتىسۋ ءوڭىرىنىڭ بيولوگيالىق ارالۋاندىعىن ساقتاۋعا باعىتتالعان. ءۇش كۇننىڭ ىشىندە تابيعاتتى قورعاۋ زاڭنامالارىن بۇزعان 22 فاكتى تىركەلدى. ونىڭ بىرەۋى بايشەشەك جيناۋمەن بايلانىستى. وقيعا تالعار اۋدانىندا بولعان. زاڭسىز گۇل جيناعان جەرگىلىكتى 52 جاستاعى تۇرعىننىڭ ۇستىنەن ق ر ق ك 339-بابىنا سايكەس قىلمىستىق ءوندىرىس باستالدى.
اۆتور: سامال قابىشيەۆا
