شىمكەنتتە رۋلدەگى جۇرگىزۋشى ەسىنەن تانىپ، بەس بىردەي كولىكپەن سوقتىعىسقان
جول- كولىك وقيعاسىنان زارداپ شەككەندەرگە جەدەل جاردەم قىزمەتى شاقىرتىلدى، دەپ حابارلايدى قازاقپارات ح ا ا ءتىلشىسى. جول- كولىك وقيعاسى قالداياقوۆ پەن جانگەلدين كوشەلەرىنىڭ قيىلىسىندا بولعان. «BMW» كولىگىمەن كەلە جاتقان جۇرگىزۋشى جولدا كەزدەسكەن «BMW Х5»، «نەكسيا»، «تويوتا» مەن ەكى بىردەي «فولكسۆاگەن» كولىكتەرىن سوققان.
ارتىنشا جولداعى قورشاۋدى جۇلىپ ءتۇستى. جول اپاتىن جاساعان جىگىتتى كولىكتەگى قاۋىپسىزدىك جاستىعى امان الىپ قالىپتى. تاعى ءبىر جۇرگىزۋشىنىڭ باس ميى شايقالىپ، اۋرۋحاناعا جەتكىزىلدى. «اۋىر دەنە جاراقاتىن العاندار جوق. بارلىعىن تەكسەرىپ شىقتىق. تەك قانا ءبىر جۇرگىزۋشىنىڭ باسى اۋىرىپ، ونى جەدەل جاردەم الىپ كەتتى. كولىكتەگى وزگە جۇرگىزۋشى مەن جولاۋشىلار قاتتى جاراقات الماعان»، - دەيدى جەدەل جاردەم قىزمەتىنىڭ مامانى.
ال، كىنالى جۇرگىزۋشىنىڭ اناسى بولسا جول اپاتى ورىن العاندا ۇلىمەن بىرگە كولىكتە بولعانىن ايتادى. سول مەزەتتە بالاسى مازاسىزدانىپ، ەسىنەن تانىپ قالىپتى. ءبىراق تەجەگىشتى باسىپ ۇلگەرگەن. دارىگەرلەر وعان ءۇش اپتادان سوڭ وتا جاساۋى قاجەت ەكەن.
«قالاي بولعاندا دا قازىر جول كولىك وقيعاسىنىڭ سەبەپ سالدارى انىقتالۋدا. جەرگىلىكتى پوليتسيا قىزمەتكەرلەرى تاراپىنان كىنالى جۇرگىزۋشىگە قاتىستى اكىمشىلىك ءىس قوزعالىپ، تەكسەرۋ شارالارى جۇرگىزىلۋدە. كولىكتەرگە قانشالىقتى شىعىن كەلگەنى دە الداعى ۋاقىتتا بەلگىلى بولادى. ول تۋرالى قوسىمشا حابارلايتىن بولامىز»، - دەدى وبلىستىق ءى ءى د باسپا ءسوز قىزمەتىنىڭ جەتەكشىسى سالتانات قاراكوزوۆا.
اۆتور: اينۇر اقبايەۆا
