قازاقتىڭ تابيعات تۋرالى ىرىمدارى
- كۇننىڭ كۇركىرەگەنىن العاش ەستىگەن ادام ءبىر تەمىردى الىپ، اۋىرعان جەرىنە تيگىزسە، اۋرۋ جازىلادى نەمەسە ارقاسىن قابىرعاعا ۇيكەسە، اۋرۋ-سىرقاۋ جولامايدى.
- نايزاعاي ويناپ، جاۋىن جاۋعاننان كەيىن جاڭبىر سۋىنا جالاڭ اياق جۇرسە، ادام اۋىرمايدى نەمەسە بۇرىنعى اۋرۋىنان ايىعادى.
- جاڭا اي تۋعاندا تۇسكەن كەلىنشەك بالانى كوپ تۋادى.
- ەكى جاس ۇيلەنگەن ءتۇنى جۇلدىز كوپ بولسا، ولاردىڭ ۇرپاقتارى دا كوپ بولادى.
- كۇن العاش كۇركىرەگەندە تىلەگەن تىلەك قابىل بولادى.
- جازعىتۇرى كۇن العاش كۇركىرەگەندە: «مال جەلىنى ساۋ بولسىن، ءسۇت مول بولسىن!» - دەپ، شومىشپەن اق الىپ شىعىپ، جابىققا جاعادى، بوساعاعا توگەدى.
- بىرەۋدىڭ ءۇيى ورتەنسە، ارتى جاقسىلىق بولادى دەپ ىرىمدايدى.
- ورەدەن جاس قۇرت الىپ جەسە، جاڭبىر جاۋادى.
- اۋىل جانىنداعى سۋدا جۇرگەن قۇستى اتۋعا، ۇركىتۋگە بولمايدى.
- بالاپان شىعارعان قۇستى اتپايدى.
- دالادا، جولدا تۇرعان جالعىز اعاشتى كەسپەيدى. ول قىستا بەلگى، جازدا پانا رەتىندە ساقتالعان.
- بۋاز، ءتول ەرتكەن اڭدى اتپايدى.
- جاڭا ءوسىپ كەلە جاتقان كوكتى جۇلمايدى. «كوكتەي سولعىر» دەگەن قارعىس وسىندايدان شىققان.
- كۇن كۇركىرەمەي سۋعا تۇسپەيدى، دالا جۋاسىن جەمەيدى.
- وتپەن وينامايدى، وتقا تۇكىرمەيدى، وتتى اتتامايدى.
- قۇدىققا تۇكىرمەيدى، ماڭايىن لاستامايدى، جانىنا دارەتكە وتىرمايدى.
- كۇلدى باسپايدى، ءۇي جانىنا توكپەيدى.
- جار باسىنا، سۋعا وتە جاقىن جەرگە ءۇي تىكپەيدى.
- كۇنگە، ايعا قولىن شوشايتپايدى.
- قۇمىرسقانىڭ يلەۋىن، قۇستىڭ ۇياسىن بۇزبايدى. قۇمىرسقانىڭ يلەۋىن باسقان ايەل بالا كوتەرمەيدى دەگەن قاعيدا بار.
- جول ۇستىندە كولىك دوعارمايدى، جول ۇستىنە قونبايدى، دارەتكە وتىرمايدى.
- اعاشتى، وسىمدىكتى سارسەنبى كۇنى وتىرعىزادى.
